Ars moriendi

§ Hoe die verdoemde van gode ende van allen heylighen versceiden zullen wesen ende hoe grote pijne dat hem dat wesen sal.

IN die helle en is gheen hope noch gheloue ofte liefte ofte vrienscap. Ten iersten so en is in die helle gheenen hope noch enich troest mer een ewighe mistroest ende ongheloue Want si en doruen nummermeer hopen dat si tot enijgher tijt gheurijet ofte verlost moghen worden. Sij en mogen mit alle den scat der werlt nummermeer ghecost werden Daer en baet noch siluer noch costelike stenen. Ia dat een verdoemde siele alle die schat deser werlt gheuen mochte dat hoer pijn daer enen dach mede geurijet mochte zijn ten zoude hoer nochtans niet gheschien moghen. Alle verdoemde sielen zijn in ontsprekelike mistroesticheyt. Iae mochten si alsoe veel hopens hebben als tot eenre vren verlichtenisse toe daer souden si hem in verblijden. Mer dat is toe late nummermeer en moghen si enighe ghenade vercrigen. Want daer staet geschreuen. In inferno nulla est redemptio. Dat is te seggen In die helle en is ghene verlossinghe. of daer en sal nummermeer gheene verlossinghe comen. ¶ Die verdoemde sielen zijn verscheyden vander heyligher drye uoldicheyt. Ten yersten van gode den vader. Van gode den soen. Van gode den heylighen gheest. Hier omme hebben si alsoe grote droefenisse datmens nummermeer vutspreken en mach. ende dit hebben si altoes in ghedenckenissen ende in haer memorie.

[fol. 24v]

§ Si zijn oeck ewelick verscheyden van alle dat gheminde ghenoechlike geselscap des hemelschen heers. Si zijn mede verscheyden van alle die lieue heylighe engelen van allen archangelen van allen wtuercoren lieuen martelaren van allen confessoren ioncfrouwen ende oeck mede van allen heylighen ¶ Och och dese grote ontsprekelike blijscappe ende genoechte hebben si versuymt ouermits een wenich tijtlijker ghenoechten deser werlt. ¶ O vermaldide ydel glorie o hoe dwaes zijn die menschen de di begeren te ghebruken want si verliesen overmits di die ewighe glorie die altoes dueren sal. Si hebben ouer ghegeuen dat ghenoechlike gheselscappe des hemelscen houes ende si zijn ghedeelt mitten wreeden bosen duuelen daer si in ewicheyden altoes mede ghequelt ende ghepinighet sullen werden. Hoer troeste ende hoer hopen sal sonder eynde wesen ende die gruwelike ontsprekelike pijn en sal nummermere een eynde hebben. Hoer ghenoechte ende blijscap sal altoes ghemenghet wezen mit droefenisse want hen en sal nummermeer enighen troest noch ghenade van gode gheschien

§ Mochten die verdoemde ghenade tot enigher tijt crighen alle hoer pine en soude hem niet verdrieten. noch swaer duncken te wesen.