Ars moriendi

§ Vanden groten dwanck die in dye helle is.

DIe bedroefde sielen en hebben ghene vriheyt als tot eenen voetstap toe. Mer si ligghen ghebonden ende ghesloten mit gloyenden yseren banden ende ketenen alsoe vast dat si niet een lit rueren en moghen. Die stockers diese binden dat zijn wrede quade nijdighe duuelen die alre gruwelickste helsche honden diemen bedencken mach. Dese en laten nummermeer af die sielen te pinighen.

§ Dese anxtelicke duuels sluyten dye onsalighe sielen mit groten scharen bij malcanderen mit gloyenden ijseren banden ende werpense ende tollense ghelijckerwijs ofte men enen bal van die een stede op die ander worpe. Nummermeer en moghen si rusten noch ophouden een oghenblick sonder pinighen Mer altijt worden si ghestoten ende ghepinicht sonder ontfermherticheyt

§ Hier af sprect dauid inden psalter O wie sal die banden der onsaligher ontsluten moghen daer si in ghebonden zijn. ofte wie salse moghen verlossen

[fol. 24r]

Vorwaer niemant. Want nummermere en moghen si verlost worden. noch hoer banden en moghen nummermeer ontsloten worden

§ O lieue mensche ouerdencket desse gruwelijcke anxtelijcke pijne des helscen vuers ende dat wrede geselschap der duuelen. ende en wilt doch vmmer niet mistrostich worden int gheloue mer bliuet stantachtich ende betrouwet altoes in die ontfermherticheyt gods Want zonder die hulpe ende die barmherticheyt godes. en moghestu nummermeer salich worden Want ons lieue here ihesus xpristus de seyt selue in sinen heylighen euangelio. Sonder mi en mach niemant salich oft ghezont worden. Recht oft hi segghen soude Ick bin die wech der salicheyt ende die in desen weghe niet en wandelt die en mach nummermeer salich worden. mer hi gaet tot die ewighe verdoemnisse ¶ Alle die ghene die in vleyschelijcker ghenoechten mit malcanderen gheleeft hebben op dese werlt. ende dye gene die in hat ende nijt gheleuet hebben. dese en laten nummermeer af malcanderen te pinighen ende te quellen mit schempen. ende verwijten tot malcanderen. die ene verwijtet den anderen alle lasterlicheyt der verdoemenisse. Op dat die een den anderen pinighen ende quellen mach. ende op dat haer verdoemenisse te zwaerder wesen mach