§ Van hoe groete machte dattet gheloue is leestmen een exempel
BI colen waren twee gheslachten die grote viantscap teghen malcanderen hadden Van welcken die een partije die crancste was ende timmerden een slot ende deden den anderen groten scade daer af. Doe si op een tijt enen geuanghen hadden zoe was hoerre drye die gheerne wat van hem gehadt hadden ende seyden. Ten si dattu ons ghelt gheuest wi zullen v pijnighen. ¶ Hi seyde ick heb drye penninghe nemet die ende roept daer drie wegghen mede ende eetse. Anders en zult ghi van mi niet crighen Hi was sterck int gheloue. ende sprack voert Ick hebbe te huus tien merck geldes in mijnre kisten ende een paer nieuwer schoen daer ic mede sint iacob gaen sal daer om en wil ics v niet gheuen. Op sinte steuens dach des morghens voer daghe sal ic wtgaen. Hoer verwonderde zeer die stantachticheyt zijnre ghelove ende doe die dach quam bonden si hem mit twe ijseren banden. ende leydenen in enen ouen. si setten bi hem achte mannen die hem bewaren souden. si sproken hem twe reysen toe ofte hi noch daer in waer. hi antwoerde iae. Mer doe zijt hem derdewerue vraghede en antwoerde hi niet. Want zijn stantachtighe geloue die hi op god ende op sinte iacob hadde verlosten hem waerachtelijcken wt den handen zijnre vianden. ende hi ghenc nae sinte iacob opten zeluen dach als hi dat te voren gheseyt hadde