Ars moriendi

§ Hier nae volghen .iij. zonderlinge gauen die god den salighen sielen geuen sal.

INden hemel heeft die zalighe siele drye zonderlinghe costelike gauen. ¶ Ten iersten male dat claer anschouwen des godliken aensichts te gebruken in ontsprekeliker vrouden. want si en mach nummermeer van dat godlike aensichte ghescheyden werden ¶ Dese glorie is alsoe groet datmense niet en mach bedencken. Want si is die opperste glorie die de heylighen bi gode hebben Des zelue ghelikes is dit de alre meeste pijn den verdoemden sielen dat si nummermeer dat ghenoechlicke aensichte ons heren xpristi ihesu anschouwen en moghen.

[fol. 17r]

§ Van dezer blijsscappen leestmen een exempel.

HEt is ghesciet datter was een mensce die langhe tijt mit den duuel bezeten was ende waert iamerliken vanden duuel ghequelt. Doe hi langhe tijt aldus bezeten was soe ist geboert dat hi ouermits de ontfermherticheyt gods troest ende bijstant heeft creghen Want daer is een priester gecomen ende heeft den duuel bezworen bijden naem ons heren ihesu xpristi ende bijden godlijcken aensichte dat hy vten mensce solde rumen. Die duuel en mochte die costelijcke duerbaer woerden niet verdraeghen. hi most alte hantes nae des pryesters gheboden sceyden vanden bezetenen mensce. Doe sprack die priester den duuel toe seggende. O du onsalige duuel ick bezweer di bijden almachtighen god datstu mij seggeste dat ick di vraeghen zal. Die duuel antworde ende seyde Vraghe mi datstu wilste ende ick moet di seggen. Want die mogentheyt des almechtychen godes dwinct mi daer to dat ick niet wederstaen en mach ick en moet v seggen alle datstu wilste

¶ Doe sprac die priester totten duuel ende seyde. Soe segget mi o du onsalyge vermaledide creatuer oft dat aensichte ons ghezontmakers xpristi ihesu alsoe schoen ende so genoechlijcken is aen te schouwen alsmen ons seyt. Bescheyt mi van desen. du hebste dat langhe tijt bezeten in ontsprekeliker ghenoechten. daer omme bezweer ic v bi xpristum ihesum datstu mi dit seggen wilste

§ Doe anwoerde die duuel myt enen droeuighen moede ende seyde totten priester. Och ick hebbe dat schoen anschijn ghesien. ende ick en mach dat nu noch nummermeer weder sien. Mochte mi dat gheboren weder toe sien daer wolde ick omme lijden alle die pijne die dye verdoemde menschen inder hellen lijden Mer dat en mach mijn nummermeer geschien. ¶ Iae ghi vraghet of dat aensichte godes soe schoen ende claer is als men seyt. Ick segge dat gheen mensce bedencken en mach die glorie ende ghenoechte des godlijcken aenschouwens
§ Alte hants doe die duuel dit gheseyt hadde verscheen hi mit enen anxtelicken stanck. ende mit enen groten ghecrijs Die priester predicte allen menschen wat hi vanden duuel gehoert hadde. ende hoe genoechlick dattet aensichte ons heren ihesu xpristi te besitten is.

¶ Och dit versumen die onuerstandel menschen die verganclijcke dinghen soeken bouen godlijcke dinghen. Dese en dencken op dat genoechlijcke aensichte ons heren ihesu xpristi met. mer si dencken opter werlt genoechte te ghebruken Och zijn die menscen niet zeer verblint die dat beelt lieuer hebben dan den meyster die dat gemaect heeft. Is god niet bouen alle creaturen lief te hebben Sijn dese eertsche dinghen aldus genoechlic hoe genoechlick moet hi dan wezen an te schouwen diese ghemaect heeft.