Logo DBNL
Antilliaanse Cahiers. Jaargang 5 (1962)

Antilliaanse Cahiers. Jaargang 5

(1962)– [tijdschrift] Antilliaanse Cahiers–rechtenstatus Auteursrechtelijk beschermd

Vorige Volgende

Sjon Pichiri
komedia den 5 akto adaptá na papiamentu
pa May Henriquez for di ‘L'Avare’ di Molière

Participantenan

segun nan bai drentandu:

pancho - namorá di Elena
elena - jui di Don Pepe
roberto - jui di Don Pepe, namorá di Margarita
don pepe - Sjon Pichiri
flecha - criá di Roberto
simon - un corredor
mimichi - un mishirikeira
justina - criá di Don Pepe
juan - un protugés cu ta kokkie i chofer
chine - criá di Don Pepe
margarita  
recherche  
anselmo  

Sjon Pichiri

Acto I.

Esena I: Pancho, Elena

pancho

Ay ay ay, Elenita, ta kiko a sosodé, ta di kon bo tin un aire afligidu asina? Ta'worei ba hacimi loco i contentu cu bo palabanan di amistad i cariño, ta kiko por a pasa pa di pronto bo trek un cara tantu verdriet? Acaso ta duel bo cu ba dunami tantu felicidad? Acaso bo ta repentí di a pasa palaba, i lo bo ta preferá di ta liber atrobe, i sin ningún compromiso?

elena

No Pancho, nunca esei lo no por duelmi. Mi tin un gevoel manera ta mi angel wardadó mes a lei bo trece riba mi caminda - i tog, maske mi ta mashá contentu cu e situashón tal manera e tá, mi meste confesá cu tin ora mi ta sintimi preocupá i inkietu... Ta figurami cu mi no mester stimabo tantu.

pancho

Pero Elena, mi no ta weta pakiko esei mester preocupabo, un tin absolutamente nada malu eidén.

elena

Ay, tin cien miel cos: di promé, mi papa cu ta drenta un djiembi dos pa tres, caba un stel di famia i hende lenga largu i cla pa busca malu den tur cos, i pa último i mas importante, Pancho, mi tin miedu di bo corazón. Cuantu bez un mujé un ta stima cu tur su alma, i kiko ta su págo, un homber cu ta perde interes i ta lagué plantá!

pancho

Foei Elena, bo ta ofendémi si bo comparámi cu sorto di

lagarú asma, bo por acusami di otro cos, pero no djesei. Nunca lo mi por tratabo malu of abandonabo. Dios Libra! Bo'n ta realizá cuántu mi ta stimabo?

elena

Ay Pancho, semper tur homber un ta primintí meskos, te resultado só sa ta differènt.

pancho

Wel ya cu ta door di acshón só por demonstrá ki sorto di hende nos ta, mi ta suplicabo anto, di warda i weta mi trato, promé cu bo huzga. Mientras tantu no carga bo cabez cu tur sorto di sospecha. Duna mi un chens, un tiki ten pa mi conbensebo con sincero mi sintimentunan ta.

elena

Esta lijé pa nos kere hende cu nos ta stima. Bo sa Pancho cu realidad mi tin confianza den bo, i ora bo papia asina mi ta sinti cu lo ta ímpusibel pa bo por nek mi of troca den bo manera di pensa; pesei lo mi stop di preocupami i legumaai mala lengua i hacidónan di redu.

pancho

Y tog bo tin miedu di nan.

elena

Un ta miedu juist. Ta cu nan no conocebo manera mi conocebo, i door djesei nan no por comprondé e razonnan por lo cual mi ta stimabo i ta tratabo manera mi ta tratabo.

Den mi paden mi sá cu ta un mi lager a trece nos huntu. Cada be cu mi tin cu corda e peligro horroroso cu a haci nos topa cu otro. Cu ki generosidad ba ris ka bo bida, bula den laman ganchu, pa rankámi foi ola brutunan, fata poco ta hoga ma hoga. Caba con mi lubidá cu ki cariño ba sòru mi ora ba saca mi foi awa, con ba cuidami i con ba sigui stimámi apesar di tur dificultad, i na final di cuenta, con pa bo por a keda bande mia ba larga di bai back bo tera, i ba buska empleo aki seka mi papa. Por supuesto

cu mi ta masha agradecido, i mi sá di apreciá tur e acshónnan aki, pero tur e otro hendenan cu no sá, i no ta care, nan lo hanja straño.

pancho

Mi ke pa bo corda un cos só: tur loke ma haci, ta pasombra mi ta stimábu - i pa fabor no maha bo cabez tantu cu loke hendenan ta pensa.

Desgraciadamente tur e fregantina'ki ta culpa di bo tata. El a lanta bosnan asina streng, i asina será, cu ta milager mes cu nada mas erg un sosodé. Un ta por nada nan ta yamé Sjon Pichiri! Ta den tur cos mes e ta tránca. Disspensámi Elenita cu mi ta papia asina dilanti bo. Bo sá con e cos ta iritami. Pero enfin paseenshi, si mi logra manera mi ta spera, di tende di mi hendenan, tur cos lo drecha, i si mesté mi mes lo sali en buska di nan.

elena

Ay Pancho, bo'n ta meen di lagami in de steek no? Un ta mihó bo keda i bo haci bo best pa Pai hanja gustabo?

pancho

Justamente - bo'n ta weta cuantu buelta mi ta tin cu saka pe nami e job aki - i awó cuantu pantomina mi mester haci pa please e, i purba di gana su cariñu?

Pero mi ta haciendo progreso, ya mi ta birando maestro di trastereis - ya mi sá, cu si bo ke cai den gracia, bo mester ta clá pa balia riba e wijs cu e ke toka - sera wowo pa tur su defectonan, y aplaudí tur su chistenan maske con laaf nan ta. Ta un rol cu bo'n por biba exagerá.

Un ta existí un pushi cu no ta kai pa flikflooierij, cos di mas ridículo i inberosímil cu por tin, nan ta traga, basta bo dunanan é na un forma di ‘gabazón’! Naturalmente mi ta sinti cu mi actuashón no ra ni bunita ni sinsero, pero ora ta mester bo mester di un tercio, cuá ke haci.

Ademas nos por pensa cu no ta esún cu ta flikflooi só tin fout, sino esún cu ta clá pa guli tur cos manda abao tambe!

elena

Bisámi pakiko bo'n ta purba di hanja ayuda di mi rumán homber. Corda cu e criá sá nos secretu, y por ta pusibel cu e tin lenga largu.

pancho

Ta dificil pa mi por manehá tantu cos huntu. Na e momentu aki tur mi atenshón ta concentrá riba Don Pepe - pakiko abo, cu conoce Roberto su caracter mihó cu ningun hende, un ta spliké e caso y trata di conkísté pa nos - Até ta bini - Probechá.

Bon señorita, te aworó.

elena

Mi'n ta sigur cu mi por saka curashi pa conté tur cos.

Esena II: Roberto, Elena.

roberto

Mi ta contentu di topa bo só aki den, Elena, pasombra mi tin un cos di contabo - pero ta un secreto, pa fabor weta pe no lèk!

elena

Sure, ata mi clá pa scuchabo Roberto, ta kiko e cos ta?

roberto

Wel ta un cuenta largísimo, ma pa mi bisabo den dos palaba - mi ta namorá.

elena

Abo? Namorá?

roberto

Ami, morto namorá i prome bo bisa nada:

(na wijs di letanía)
Mi sá cu mi ta depende di nos papa, mi sá cu como jui mi meste obedece, cu mi no tin derechi di haci nada sin pidi permiso, cu Dios a haci cu ta nos grandinan ta doño di nos deseonan, cu nan nunca sa haci fout, nos semper ta vra-vra, cu muchanan djawendia tur ta caba malu, patati patata ad infinitum. Ma dunabo e letanía aki, pa bo no gasta bo rosea resami un preek.

elena

Bo'n por bisámi, ba comprometé caba cu bo mosa?

roberto

Nò, ainda no, ma mi ta resuelto di pidié pronto, i mi ta suplicabo no purba di discutí e punto ei cu mi!

elena

Bon, ta pa ki sorto di hende bo ta tuma mi antó?

roberto

Un ta pa nada, pero mi sá cu bo no ta namorá, pesei bo no por sá ta kiko varna sinti hende su curazón yen di ternura, yen di dulzura... mi'n por splica i anyhow lo bo no comprendemi tog, bo t'asina serio!

elena

Serio? Ami? T'asina bo por biba banda djun hende, sin conocé su caracter - Awor mi ta supone, mi ta core risku di kibra bo ilushón i di cai den bo bista.

roberto

Ta kiko bo ta klets, al contrario - Acaso bo ke men cu bo támbe ta namorá?

elena

Si, si, pero laga nos laga esei un banda un ratu, contámi ta ken te poyollo?

roberto

Umm - Ta un mosita linda, un cos tur afó, mi ke cu ken cu weté, mesté cai pé, asina sweet e ta. Ta poco temp'ei numa nan a bin biba aki banda. Di momentu cu mi bista a cai riba djé, mi tabata perdí. E yama Margarita, i e ta biba den cas cu su mama, cu ta un señora un poco enfermizo. Ma si bo mira cu ki cariño e ta trata e mama, con e ta cuidé, i percurá pe, esei só ta basta pa ponebo gusté. Ademas e ta un hende masha simpática, kiko ke haci, e ta haci cu gracia, i un bondad, un dulzura... Ay Ele, lo mi tin masha gana pa bo siña conocé.

elena

Wel pa bo discripsjón, y e solo hecho cu bo ta stimé tantu, ta net manera cu mi conocé caba.

roberto

Awó ma saca fó, bao di man, cu nan no ta masha bon pará, in fact, mi tin idea cu nan ta hopi skaars. Caramba lo mi goza si mi por a yuda nan di un manera of otro. Mi ke cu ta placer di mas grandi di mundu, di por yuda un hende cu bo ta aprecia tantu.

Jammer cu Papa ta asina pichiri, cu mi no tin moda di por obsekia Margarita y mustré un prueba di mi amor. Un tin forma pe bieeuw los un cen.

elena

Mi ta cai na bo pena, y mi ta comprendé con bo tin cu cunsamí.

roberto

Cunsumí di berde. Ta pakiko nos mester biba manera hende desgraciá, pasa miseria, blo spaar - anto spaar cu ki doel? Pa nos hanja e placa ora nos ta bieeuw krèkèchè, con nos ta haci goza di dje e ora ei. Caba sin conta tur e debenan cu nos tin, hinteer ora bai mi ta hanjami obligá di fia placa ceka mi amigunan pa mi por sikiera bisti mi curpa decente.

Enfin, mi ke pidibo di sonsagá foi Papa con e ta pensa riba e afèr aki di mi, y si resultá cu e ta contra, anto mi ta barca bai foi tera cu Margarita pa bai purba suerte otro caminda. Tur es tén mi ta bai mira di ki moda mi ta bini clá pa hanja un poco placa fia, y si acaso bo ta hanjabu den mes un aprietu cu mi, y bo ke join nos, tantu mehó. Ya e pichiriheid aki a bira insoportable.

elena

Bo tin razon, foi dia cu Mai a muri, ta cada dia cos ta bira pió.

roberto

Scucha, mi ke cu mi ta rende su stem. Laga nos hala un cantu aki pa nos sigi traha nos plan di bataya, anto caba nos ta bin tekkel e.

Esena III: Don Pepe, Flecha.

don pepe

Ban drama akifó, y boca tapá - fusilá nan mester fusilábu!

flecha

(Aparte)
Kren Dios paders di mi bida mi'n topa un tercio mas fregá cu esaki, si mi'n ta kibocami ta famia di diabel mes e ta.

don pepe

Ta kiko bo ta gruña den bo djente ei?

flecha

Sa mi ke sa, pakiko sjon ke kuri cu mi.

don pepe

Chubatu, foi ki dia mi mester dunabu cuenta di razon? Dirti!

flecha

Ma ta kiko ma haci sjon?

don pepe

Ba haci cu mi tin gana pa bo donder op.

flecha

A mi ta criá di sjon su jui, y sjon su jui a duna mi ordi di warda riba djé aki.

don pepe

Anto hiza bo bela bo bai wardé riba caya, nada di para manera un skildwacht riba mi pa waak delaster un cos cu mi haci, scrudiña tur mi posesjonnan, y loer den tur hoeki pa weta kiko tin pa bo jop.

flecha

Ata baina! Hende por horta sjon? Sjon ta tranca tur cos bao di yabi cu candaal, anto pa ñapa para wárda di dia y anochi.

don pepe

Mi tin derechi di tranca lo ke mi tin gana, di para wárda ora mi tin gana. Semper mi'n bisa cu bo parce un spion? Den tur cos bo mester hinca bo nanishi largu.

(Aparte)
Dios sa cu en saca fó caba unda mi ta warda mi placa.

(Duru)
Basta bon bai plama boz cu mi tin placa scondí aki?

flecha

Sjon tin placa scondí aki?

don pepe

Nò, buricu, un t'esei ma bisa.

(Aparte)
Un ta cos di ponemi sulfurá?
(Duru)
Ma puntra si pa mal ehempel por ta bo por a plama boz.

flecha

Kiko nos tin cu nes si sjon tin o si sjon laga di tin, un ta meskos ta keda, sjon ta parti cu nos antó?

don pepe

(Lantandu man pa pasé un mep)
Tribí cu bo ta, cuidao mi'n plama bo boca na werki pa bo - pa delaster biá - laga cai!

flecha

Okay, ya mi ta bai.

don pepe

Wanta, bo'n jop nada, no?

flecha

Ta kiko mi po jop?

don pepe

Para, lagami listra. Habri man mi weta.

flecha

Ata.

don pepe

Otro.

flecha

Otro?

don pepe

Si.

flecha

Ata.

don pepe

(Sacudendu su pia di carzon)
Bo'n sconde nada ei den?

flecha

Listra sjon mes.

don pepe

(Ta fula su pianan)
E sorto di zapatu nan aki ta ideal pa sconde cos aden.

flecha

(Aparte)
Mi'n ta ladron - ma mi ta kishikí pa mi horté, djies pe hanja su merecí!

don pepe

Hen?

flecha

Con?

don pepe

Mi'n tendebu papia e palaba ‘horta’?

flecha

Mi di sjon si sa listra bon, pa weta cu mi'n horta sjon.

don pepe

Uhu, t'esei mes mi ta haci.

(Ta hinca man den su sacunan).

flecha

(Aparte)
E! Mare Pedgi po caba cu tur hende pichiri!

don pepe

Con, ki bo di?

flecha

Ki mi di?

don pepe

Si, ma tende e palaba pichiri.

flecha

Mi di mare Pedgi po caba cu tur hende pichiri!

don pepe

Di ken bo ta papia?

flecha

Di hende pichiri.

don pepe

Y ta ken nan ta? E hende pichirinan ei?

flecha

Mal hende - hende miskiña.

don pepe

Ta ken bo ta meen cu esei?

flecha

Kiko ta importá sjon?

don pepe

Ta importámi pasobra ta importámi.

flecha

Sjon ta kere cu ta riba sjon mi ta papia.

don pepe

Mi ta kere lo ke mi tin gana di kere, ma mi ke

bo
bisami ta riba ken bo ta papia.

flecha

Ma sjon por stop mi di zundra hende miskiña?

don pepe

Nò, ma mi por stop bo di haci cos di tribí y core cu bo aki fó.

flecha

Mi'n menta nomber di ni'un hende.

don pepe

Mi ta zemblabo un wanta si bo papia.

flecha

Esun ke zapatu ta pas, pusha su pia adén.

don pepe

Bo ta sera bo snater?

flecha

Cu ziep.

don pepe

Ahu.

flecha

(Mustrandu un sacu den su carzón)
Waak, ata un cu a pasa sjon voorbey aki; Sjon ta contentu awó?

don pepe

Ban, entregámi sin cu mi tin cu sigui buska.

flecha

Kiko?

don pepe

Loke ba lektu.

flecha

Ma si mi no a lektu nada.

don pepe

Sigur sigur?

flecha

Sigur sigur?

don pepe

Ajó! Bai na de donder!

flecha

Ta na unda esei?

Esena IV: Don Pepe só, despues: Elena y Roberto

don pepe

Esta un mucha grosero... E ta pone mi sanger herebé. Awó di berde un ta poco trabao e placa aki ta dunámi, ta un arte masha grandi di tin tur e placa ei scondí na bon caminda, anto tin djies dos tres een asina pa hende por gasta. Ta kibra mester kibra cabez pa inventa lugá pa sconde placa. Lo ke yama ami un tin un tiki confianza den caja di heru, mi ke cu nan ta mescos cu anzué, asina e ladron drenta prome cos ke ta hap te caja di heru.

(Awó Elena cu Roberto ta drenta conbersando patrás)

don pepe

(Kerendu su curpa só)
Mi'n tin un momentu di sosiego ora mi pensa cu un cos por pasa cu e placa cu ma coba dera ayera den jardín. 50 mil florin ma ricibí ayera, 50 mil florin na placa di oro, un ta chansa.

(Apercibiendu Elena y Roberto)
Tata na sjeloe, awe ta mi mes ta traicioná mi curpa, mester ta e calor ta hacimi bira chocho papia duru mi só.

(Duru)
Kiko ta?

roberto

Nada Pai.

don pepe

Hopi ora boso tin pará ei?

elena

Drenta nos ta drenta.

don pepe

Ba tende...

roberto

Kiko Pai?

don pepe

Cu...

elena

Kiko?

don pepe

Lo ke ma caba di bisa.

roberto

Nò.

don pepe

Masha bon, masha bon.

elena

Dispensá nos.

don pepe

Mi ta weta cu bosnan a scucha. Ta yora mi tabata yora mi pena con dificil ta awendía pa hende por gana poco placa, y mi tabata pensa ki feliz esnan cu tin un 50 mil florin asina den nan cas mester sinti nan curpa.

roberto

E cos ta, nos tabatin miedu di hala ceka pa nos no stroba Pai.

don pepe

Si, ma mi tin gana di splica bosnan e situashón drechi, pa bosnan no bai imaginá boso cu t'ami te hende cu tin e 50 mil florinnan ei.

roberto

Nunca nos no sa mete nos den Pai su asuntunan.

don pepe

Mara t'ami ta tin e 50 mil heeldunan ei.

roberto

M'in ta kere...

don pepe

Esei si lo ta un bon nogoshi.

elena

Sorto di cosnan ei.

don pepe

Jesus mi tin meste di nan.

roberto

Mi ke cu...

don pepe

Lo mi sintími gozá.

elena

Pero Pai...

don pepe

E orei lo mi'n tin mester di keha cu situashón ta malu.

roberto

Dios mío, Pai no tin razon di keha, tur hende sa cu Pai ta bon pará.

don pepe

Con, bon pará, ami? Ta gañamentu, mintira.

Pa mal ehempel nan ta plama e notisha ei.

roberto

No rabia, no rabia.

don pepe

Pensa cu ta mi juinan mes ta lanta contra mi.

roberto

Lanta contra Pai, pasombra ma bisa Pai ta bon pará?

don pepe

Sigur no - anto weta ken ta papia, bosnan cu ta rendu paranda y gasta placa manera rieuw. Si un dje dianan aki

nan bin corta mi garganta pa weta si mi ta furá den placa, lo ta boso falta.

(E ta pasa man riba su curpa pe sinti e placanan)

roberto

Ma ta ki ora ma gasta placa manera rieuw?

don pepe

Kiko ta dje Cadilec cu bo ta zwaai den stad cuné? Ta un skandaal, ayera mi tabata pleit a cu bo rumán, pero abo ta cien biá pió. Wetabo, di cabez te pia manera un dandy, un ta pornada ta hanja sorto di panja asina

(ta fula panja cu dos dede)
Ma bisabo binti bez: A jega momento pa bo troca bo moda di biba, y stop di skarmaai placa pa loco - Además un por ta pusíbel cu bo por afford sorto di lujo asina, anoser cu bo ta skamoteando algu di mi
(gestu di horta)
de bez en cuando.

roberto

Mi ke sa

con
mi ta haci skamutiá algu.

don pepe

Con ami por sa, pero di unda bo ta broei placa pa bo por cana asina petimèter?

roberto

Wel, ten ten mi ta gusta hala mi Jackpot, of mi ta cumpra un pi da billèchi, y como mi tin hopi suerte, Dios ta corda di mi - una bez cu mi ta gusta cana sport...

don pepe

Ta net ei ta bo fout, ora hende tin suerte na wega, nan mester siña profiteer dje ocashón pa spaar placa y poné producí interés. Por ejemplo - ta pasikiko tur 'e adornonan' aki

(dashi, lenzu, flor).
Un florin cada dia
(Aparte)
pa Prins Bernhard Fonds.
(duru)
Bo'n ta realizá cu riba e flornan aki so
(ta kité ta holé)
bo por haci un economía enorme - nan ta representá un capital di 365 florin pa aña.

roberto

Pai tin razón.

don pepe

Pero laga esei un banda awor, y ban papia di otro cos masha serio.

(E ta drei y ta ripará cu Elenita cu Roberto ta haciendu seña cu otro)
Eh!?
(Aparte)
Mi ke cu nan ta haciendu seña pa weta con nan por lektu mi potmonni.
(Duru)
Ta kiko e señanan ei ta nificá?

elena

Wel ta bati nos ta bati weta cua ta papia promé. Roberto cu mi tur dos tin cos di conta Pai.

don pepe

Famoso, ami tambe tin un cos di conta boso dos.

roberto

Ta riba casamentu nos ke conbersá cu Pai.

don pepe

Y ta riba casamentu cu mi tambe ke entretené bosnan.

elena

Ahu!!!

don pepe

Kiko e sklamasjón ke meen, Elena. Ta spanta ba spanta dje palaba casamentu? Of ta miedu di casa bo tin?

elena

Nos tur dos tin motibo di tin un poco skreek dje palaba casamentu, sobretodo nos tin miedu cu tal bez Pai su escojo no ta di acuerdo cu nos gustu.

don pepe

Tene pasenshi, y no alarmabo, mi sa precies cu ken bosnan mester wordu parejá. Pa cuminza

(cu Roberto)
nunca bo bista a cai riba un señorita cu yama Margarita, y cu ta biba den becindario aki?

roberto

Si Pai.

don pepe

Y abo, bo conocé?

(Cu Elena).

elena

Di nomber só.

don pepe

Bisámi jui, con e señorita ei ta parcebo?

roberto

Encantadora.

don pepe

Apariensha?

roberto

Nèchi y masha graciosa.

don pepe

Y su modalesnan?

roberto

Bon manera..., fini.

don pepe

Bo'n ta hanja cu un señorita nèchi asina merecé di wordu tumá na considerashón?

roberto

Con por laga.

don pepe

Bo'n ta considerá cu lo e ta un bon partida?

roberto

Tur afó!

don pepe

Un ta parcebo cu e mester had un bon esposa?

roberto

Indudablemente.

don pepe

Y cu un homber lo por biba su bida felíz cuné?

roberto

Te dia e muri.

don pepe

Desgraciadamente tin un drawback - mi ta comprondé cu e no ta masha bon pará.

roberto

Pero Pai, mi'n ta hanja cu placa mester hunga un rol asina grandi. Si e mosa mes ta 'sina bon hende y asina nèchi.

don pepe

Dispensámi! Dispensámi! Riba e punto ei nunca nos no ta di acuerdo; enfin, aunke no ta precies manera lo ma deseá, semper lo por inbentá cualke otro medio pa saca un gananshi

(gesto di placa).

roberto

Ja...

(dudoso).

don pepe

(Ta frega su mannan contra otro)
Mi ta sumamente contentu di mira cu bo ta sinti meskos cu mi riba e asunto aki, pasombra cu su bondad y su dulzura el a conkistami completamente y ma dicidí di casa cuné, asina mi bini cla cu e medio
(gesto di placa).

roberto

Ken?

don pepe

Con ken?

roberto

Pai ta dicidí...

don pepe

Di casa cu Margarita.

roberto

Ken??? Con??? Pai?!

don pepe

Si si, ami, ami.

roberto

Dios, mi cabez ta bai lagami, mi tin cu sali busca aire.

don pepe

Lo'n ta nada particular. Bai den cushina basha un glas grandi di awa bo bebe - zwaki zwaki, manera ratón di kerki. Si Elena - esei mi ta scohe pa mi curpa - awó pa Roberto ma scoje un biuda cu nan a gabámi masha tantu y abo Elena, ma resolbé di duna bo man na señor Anselmo.

elena

Na señor Anselmo?

don pepe

Si, ta un homber serio, prudente, sabí, ya di shertu edad y masha rico.

elena

(Hacindu un buiging)
Dispensámi Pai, ma mi no ta hiba di gustu di casa cuné.

don pepe

(Imitando Elena)
Mi jui stimá, ami sí ta hiba di gustu pa bo casa cuné. Dispensámi;

elena

(Otro buiging)
Mi ta pidi Pai di perdonámi.

don pepe

(Buiging)
Mi ta pidi mi jui di perdonámi.

elena

Mi tin masha hopi respet pa señor Anselmo, pero cu Pai su permit, mi no ta casa cuné.

don pepe

Mi tin masha hopi respet pa mi jui,

(buiging)
y cu bo permit, bo ta casa cuné awe nochi mes!

elena

Awe nochi mes?

don pepe

Awe nochi mes?

elena

Un tin risku pesei sosodé.

don pepe

Tin risku pesei sosodé.

elena

Nò.

don pepe

Sí.

elena

Nò y nò.

don pepe

Sí y sí.

elena

Ta un asuntu cu Pai no por obligámi.

don pepe

Ta un asuntu cu mi

por
obligábo!

elena

Mi ta tira mi curpa mata promé cu mi casa cu un papa progé asina.

don pepe

Bo no ta tira bo curpa mata y bo tá casa cuné.

Ma esta frepostu, no, nunca mi'n tabata sa cu un jui por tin tribilidad di papia asina cu su tata!

elena

Ma nunca mi'n tabata sa cu un tata por ke core casa su jui dje moda aki.

don pepe

Ta un partido di kita sombré, ban pusta tur hende lo ta eens cu mi?

elena

Ban pusta cu ni un hende bon bon na nan cabez por ta eens?

don pepe

(Su bista ta caì riba Pancho dja leeuw)
Ata Pancho, bo ke nos laga é para juez mira cuá di nos dos tin razon?

elena

Okay.

don pepe

Lo bo acepta su decishón?

elena

Si, lo mi tuma den.

don pepe

Di acuerdo.

Esena V: Don Pepe, Elena y Pancho.

don pepe

Scucha'ki Pancho, nos a caba di eligibo pa bo juzga cuá di nos dos tin razón.

pancho

Don Pepe naturalmente, un tin kuestión.

don pepe

Bo sa ta riba kiko nos ta papiandu?

pancho

Nó, pero como no ta pusibel cu Don Pepe por ta herá, Don Pepe tin hinteramente razón.

don pepe

Lagámi splicabu tog - awe nochi mi ke casa Elena cu un meneer masha rico y masha sabí - y e pesti ta lagami sa den mi cara cu e no tin tal idea. Ki ko bo dici awó?

pancho

Kiko mi dici awó?

don pepe

Si.

pancho

Eh... eh...

don pepe

Bo di...

pancho

Mi di - cu wetá di un banda Don Pepe tin razón - wetá di otro banda Elena un ta laga di tin razón!

don pepe

Con!! Señor Anselmo ta bajá foi sheloe, e tin tur cualidades dades pusíbel, e ta putrí di placa, sabí, di bon famia, cu experiensha y tog sin jui foi di su promé casá. Na unda Elena por contra cu un partido mihó?

pancho

Tur ta berde, pero señorita Elena sigur ta hanja e cos poco Jan purá, y como sòpi purá sa sali salu, le ta deseá sjertu ten pe custumbrá cu e idea.

don pepe

Bo'n ke bini bei, cu ta un chens cu nos mester gara cu dos man - nos un por laga bai - Maginabo cu e ta dispuesto di aceptá Elena sin porshi!

pancho

Sin porshi?

don pepe

Si.

pancho

Ahh - palaba a caba - mi'n sa kiko bisa mas.

don pepe

Mi ra cuantu mi ta scapa di paga ei, cuantu mi por spaar!!

pancho

Un ta ni coi papia. Awó - Elena lo por pensa cu casamentu ta un empresa masha serio y cu e mester weta riba, weta bao, promé cu e tuma un stap pa sera un contrat cu e mester tene pa hinteer su bida.

don pepe

Sin porshi!

pancho

Don Pepe tin perfecto razón - ta un motibo poderoso. Awó - tin hende cu lo por bisa Don Pepe cu ta mihó trata un jui muhé cu delicadesa - pasombra un casamento por kore peliger di fracasá ora tin tantu hopi diferensha di edad y di karakter.

don pepe

Sin porshi!

pancho

Aah, ei ma paas - Don Pepe a gana. Awó - sa tin tata cu nan solo pensamentu ta, con nan por complacé nan jui muhé, es tatanan ei ta preferá di weta nan jui contentu, cu di busca interés of gananshi di placa.

don pepe

Sin porshi!

pancho

Mi ta give op - un tin riba e palaba ei: Sin porshi!

Ta con hende por resistí un motibu asina fuerte?

don pepe

(Aparte, ta waak den jardín)
Hei, ta figurami cu mi ta

tende un cachó ta grita, basta un ta ladron a bin hiza mi placanan.

(Cu Pancho)
No bai ainda, para warda mi aki, un djies mi ta back.
(Exit)

elena

Pancho, e manera cu bo ta papia ei, ta bofón bo ta bofón di djé.

pancho

Dios Libra! Bo'n ta comprendé cu tin shertu hende cu nunca bo no mester contradecí nan, sino nan ta cohe rabia cu bo - mester laga nan kere cu bo ta bai di acuerdo cu nan, anto - hila cu nan pía-pía, dal un buelta paki, dal un buelta pa'ya te ora bo gana nan den cocobi.

elena

Bunita - ma e casamentu awó?

pancho

Net esei! Ta dali ki dali buelta te ora nos kibré.

elena

Bo'n ta realizá cu t'awe nochi mes e ke casámi?

pancho

Laga over na mi, nos ta inbentá kwalke keenshi - por ehempel un maleza di gain-gain.

elena

Y si nan yama dokter y e discubrí?

pancho

Bo ta nami gane hari. No solo e dokter lo no descubrí sino cu e lo splicabo na cen chikitu kiko bo falta, y pa ñapa hinca bo cu un tow di remedi bebe.

don pepe

(Ta drenta, ma ta keda patrás) Alarma falsu - Danki Dios, pero...

pancho

(Sin mira Don Pepe)
Enfin tin delaste recurso di por huyi - e ora ei tur cos ta safe, esta si bo ta kere, Elenita, cu bo amor lo ta basta...
(wetandu Don Pepe)
Ya - un jui mester

obedecé su tata, e no tin mag di ripará cu un pretendiente ta poco bieeuw of poco chacueco - sobre todo si e bisa sin porshi, mester tumé wowo será!

don pepe

Ata palaba!

pancho

Don Pepe, mi ta pidi dispénsa, si ma bai un tiki leeuw i tuma libertad di a papia abiertamente cu señorita Elena.

don pepe

Con? Mi ta encantá! Mi ta na bo permîso pa bai con aleeuw cu bo ke!

(Cu Elena)
Sigur no, bo ta clá pa huyi - bon pa bo sa cu mi ta duna Pancho pleno poder riba bo, percurá bo obedecé.

pancho

(Cu Elena)
Tje parti, awo purba di resistimi.
(Cu Don Pepe)
Cu Don Pepe su permiso mi ta bai su tras pa mi sigui mi les.

don pepe

Ta un fabor bo ta hacimi.

pancho

Mester trens e un poco.

don pepe

Justamente.

pancho

No preocupa Don Pepe, mi ta mansé mansé, lagué mansu... mansu.

don pepe

Mi ta lagué den bo man. Mientras tantu mi ta bai daal un buelta bandi Punda.

pancho

Bo mester realizá cu placa ta cos di mas precioso cu tin riba mundu. Pa régla bo mester gradicí Dios tur dia cu El a dunabo un papa honrado asina. Bo papa conocé mundu djadén pafó y e sa cu ora un pretendiente ta dis-

puesto di casa sin porshi, no mester puntra mas aleeuw - e palaba sin porshi ta balanciá contra: buen mozo, jubentud, amor, encanto, bon famía, tur loke bo ke!

don pepe

Tende Pancho ei - un ‘flu de bouche’ manera si ta den Staten e ta papia pa trata di convencé

(intercalá un asuntu actual).

Caramba mi tin suerte di a topa cuné!


Vorige Volgende

Over het gehele werk

landen


Over dit hoofdstuk/artikel

auteurs