Antilliaanse Cahiers. Jaargang 5

[p. 23]

Mari Di Malpais
un drama di milager adaptá for di e drama medieval Marieke van Nimwegen
pa Raúl Römer

[p. 24]

Personahenan

(segun nan ta parse riba ensenario)

tio (Pader Anselmo)

mari kende despues ta bira eme

tantan

diabel kende despues ta bira manuel

tipo i

tipo ii

maskeron

dios

la birgi

un homber

papa di roma

[p. 25]

Historia berdadera i milagrosa Di
Mari Di Malpais
ku a biba ku diabel mos di shete aña

Hopi hopi aña pasá tabata biba na kunuku, banda di Malpais, un pader bon hende ku tabata yama Anselmo. Serka dje tabata biba un bunita mucha muhé, su subrina, yu di un ruman di dje ku a muri. E subrina su nomber tabata Mari. T'e tabata soru pa tur kos den kas di e tio.

I. Pader Anselmo ta manda su subrina punda.

Un dia a sosedé ku Pader Anselmo ker a manda su subrina Punda p'e bai kumpra kos ku nan tabata tin mester di dje den kas: anto el a bis'é:

tio

Mari!

mari

Ablif, ta kiko tio ke?

tio

Skucha bon kiko mi ta bisa bo, mi yu. Bo tin ku bai Punda pa mi, bai kumpra kos ku a kaba den kas.

Nos mester di bela, zeta pa buta den lampi, binager, salu, siboyo,... ahan, suafel tambe. Ma esei bo mes sa. Ata aki mi ta duna bo mei fuerte, bai Punda bo bai kumpra tur kos ku nos tin mester.

mari

Sigur no, tio. Mi ta bai unbe.

tio

Manera mi ta mira aki lo bo no por bini kas na tempu mas awe nochi. E tempu di aña aki ta bira skur masha tempran. Ya ta me'i diesor pasá ei kaba i ta un bon halá

[p. 26]

dj'aki pa Punda. Pesei tende aki, si bo mira ku ta bira muchu lat pa bo yega kas promé ku nochi sera, keda drumi na Punda numa serka Tantan mi ruman. Asina mi mes tambe lo keda mas sosegá ku si mi tin ku pensa ku ata bo na kaminda ta krusa mondi den sukú, bo solitu. Anochi semper tin hende malbado ta kana rond ta buska malu pa hasi; si nan mira bo, un mucha bunita, bo so asina, nan ta kapas di molestiá bo.

mari

Manera tio manda mi, mi ta hasi.

tio

Kumindá Tantan pa mi, tende. Dios bai ku bo. Korda bon, no lubidá nada, i wak ora nan ta pisa e kosnan pa bo.

mari

Si tio, te despué.

tio

Te despué, mi yu. Dios kompañá bo...

(Ma mi Dios ta di kon mi ta sinti mi na laria asina? Ta pasobra Mari a bai Punda e so? Esaki si ta straño. E mucha n' kaba di sali ku ata mi tur ariba abou. Manera mi tin miedu ku lo pasé un kos. Mihó mi a ten'é na kas. Ta ko'i sin tinu laga un mucha muhé bai Punda e so riba kaminda. Pasobra hesú tin hopi hende malu riba mundu.)

II. tantan ta risibi Mari Masha Malu.

Asina anto Mari a sali for di kas di Tio bai Panda. Aya el a kumpra tur kos ku nan tabatin mester di dje. Ma a sosede ku mes un dia ei, Tantan a haña pleitu ku bisiñanan, i ora el a kaba di hasi gera ku nan, zundra nan bon zundrá, e tabata masha di malu, ku ni diabel no tabata por kun'e. Mari a ripará ku ya tabata lat ora el a kaba di hasi tur su rospondinan. Den su mes e di:

mari

(Ata awor mi a kumpra tur kos ku Tio a pidi mi. M'a laga nan pisa nan pa mi, m'a paga nan, ma den tur esei a bira

[p. 27]

asina lat ku ya nochi ta kuminsá sera kaba. Ata un oloshi grandi kologá ei, laga mi mira kuant'or ta. Hesusei, sinkor ta bai bati kaba. Manera mi ta mira aki, mi tin ku keda Punda awe nochi, pasobra ta mas ku tres ora 'i kana di aki pa kas, i seisor ya ta skur kaba. Hn hn, mihó mi keda. Tantan ta biba aki serka. Laga mi bai pidi'é pa mi keda drumi serka dje awe nochi. Anto mañan maínta mi ta lanta bon tempran bai kas bai hasi mi trabou. Ma ata Tantan pará den porta di kas ei. Laga mi kumind'é)

Bon tardi Tantan, Bendishon di Dios.

tantan

Ma ta kua e diabel aki? Kon kos ta banda'i fiernu aya, hèn señorita? Ta kiko b'a bin buska aki?

mari

Ta Tio a manda mi Punda awe bin kumpra hela ku binager ku mas kos ku nos tabata tin mester di dje na kas. I te ora mi ker a kana pasa tur e tiendanan pa mi haña tur kos kumpra, a bira laat, asina ta ku mi no por bai kas mas. Ta p'esei mi ker a pidi Tantan pa mi keda drumi awe nochi aki serka Tantan. Mi tabata ker a bai kas awe mes, ma mihó mi no kana bai kunuku mi so den sukú. Sa tin hende ta wak na kant'i kaminda. Por pasa mi kualke kos.

tantan

Wel esta hunga señorita, no. Karizo, mucha, no gaña santu. Bo sa masha bon di unda bo mama a sali ku bo. No bin bisa mi ta rospondi b'a kana hasi henter dia te awor aki.

mari

Si Tantan.

tantan

Sigur no! Ay si! Ta bo pleizir b'a bin buska skondí skondí. Tende un kos aki, yu, bo n' ta kens! Na kunuku band'i bosonan aya tin hopi jonkuman ku n' sa perde pa gana. Awèl bo mester sa kiko mi ke men.

[p. 28]

mari

Ta kiko Tantan ke men anto.

tantan

Ay si, hunga santu numa. Tin kos ku hende n' por konta, ma bo sa mes bon ku mi ku tin kasamentu sin pader. Awendía mucha muhé ta hasi manera nan tin gana, i pa mundu ta dams nan ta.

mari

Tantan, stop. Ta gaña Tantan ta gaña ku m'a hasi malu.

tantan

Manera hendenan a konta mi, mi n' ta konfia e kuenta ku bo ta biba den kas huntu ku bo tio ei. Bunita kos! Bo ta berguensa pa nos famía, mal a fruta! Mi mira bo so, mi stoma ta wal, ché!

mari

Ma Hesús, ta kiko esaki awor. Tur mi kurpa ta tembla. Ta kiko e palabranan sushi ei ku Tantan ta papia ku mi. Un te'i kos malu Tantan ta konta di mi, anto sin mi hasi nada. Mi no ke sa nada mas ku pa Tantan bisa mi si mi por keda drumi aki awe nochi. Ta pa un anochi so.

tantan

Ta hoga lo mi hoga mi mes den laman promé ku mi laga bo buta un pia den kas aki. Kita foi mi bista un be, sino bo ta mira kiko mi ta hasi ku bo. Kushi mi ta para kushi aki di rabia.

mari

Tantan no mester papia asina ku mi.

tantan

Mira un mala bestia asina ta bin kondená hende su pasenshi. Ta gana pa mi ranka bo na bo kabei bo tin? Bo tin mi Dios-sa-kon aki kaba. Manera bo ta weta mi aki, ni diabel n' por ku mi, di rabia ku mi tin.

Ni sa mi n' sa mas kiko mi ta bisa. Ken ku mi topa awe mi ta papia malu ku nan.

[p. 29]

mari

Mi Dios ta kiko mi ta haña mi aden? Mi no sa si mi kuhe pariba o kuhe pabao... Kiko mi tin kun'es, mi ta sali bai drum! bou di palu numa, na kant'i kaminda. Mi no tin miedu di peliger. Mi ta bai kai sinta kontr'i trankera enkomendá mi mes na Dios... o na tur diabel ku tin den fiernu.

III. Mari ta bai larga tantan, sali kuhe kaminda di kunuku.

Asina anto Mari a sali bai larga Tantan i bou di yoramentu el a kuhe kaminda kana un bon pida te ora a kuminsá bira skur. E ora ei el a kai sinta konter di un trankera altu, ta yora enkomendá su mes na diabel kada bes, bisando den su mes:

mari

(Ta un kos so ta keda mi awor, maldishoná mi mes. Sin ku nunka mi a hasi nada, Tantan ta kulpa mi. Ma ta pakiko? Sara hende! El a pone mi tur di malu. Mi ta sinti kon mi rabia ta lanta ku mi. Te mi no por wanta mas. Si mi sigi asina mi ta maldishoná mi mes pa semper... Mama dushi, ta ki tentashon ta drenta mi? Ta mata mi ke mata mi mes? Mi no por dominá mi mes mas o ta perde m'a perde kabes?... Ma ora nan kulpa bo asina, sin ningun motibo, bo tin ku rabia, sino n' ta hende bo ta. Ta kos di pone bo desesperá. I si Dios no ke yuda mi, diabel tambe ta bon.)

Diabel, ku semper ta wak chens pa e haña kondená alma di hende, ora el a tende e palabranan aki el a bisa den su mes:

diabel

(Asina mi ke tende! Ban bringa pa e alma aki. Dios a permití mi troka mi mes kaba den figura di hende. Anto un tipo tur afó, si no ta pa esun wowo so ku mi tin, manera ta kai e otro wowo a kita kai for di den mi kara. Un diabel manera ami no tin poder di hasi mi mes perfekto den tur kos, maske kon mi purba. Semper nos ta keda ku un falta, si no ta na kabes, ta na man o na pia. Awor laga mi hasi mi

[p. 30]

stem fini asina, papia nèchi, pone tinu bon, pa mi no ofendé mi dushi. Hende muhé bo tin ku kuminsá pa kumpra nan ku palabra...)

Shon bunita, ta di kon bo ta tristu asina? Ta ken ku bo? Bisa mi pa mi bai tuma bengansa pa bo, manera un bon jonkuman. Mi ke ku bo mester di yudansa. Awèl, laga mi konsolá bo un tiki.

mari

(Tata den shelu, yuda mi. Hesú m'a spanta. Ta kiko a pasa mi? A drenta mi un rel awor ku mi a mira e homber aki. Mi kurason a stop di bati den mi pechu.)

diabel

Ay shon bunita, no tene miedu, no! Mi no ta hasi bo nada. Mi ta primintí bo: si bo hasi manera mi bisa bo, i ban ku mi, anto lo bo mira, t'abo lo ta e muhé di mas respetá na mundu.

mari

Mi shon, mi ta tur trastorná aki pasobra awor ei mi tanta a zundra mi pa tur kos di mas malu ku tin, sin mi hasi nada. Manera mi ta sinti mi awor aki, Dios o diabel, tantu bal. Mi no sa mas kiko mi ta hasi.

diabel

(Satanas! Aki mi ta bon pará. E mucha aki ta mal bruhá mes. Tur desesperá e ta. Awe si mi tin speransa di sali ganá.)

Shon bunita, bo n' ke ban ku mi, na mi un tiki amistad?

mari

Ta ken shon ta?

diabel

Ami ta un hende ku sa masha hopi kos. Tur kos ku mi hasi ta sali bon.

mart

I ami no tin kun'es ku ken mi bai. E promé un ku yega ta mi homber.

[p. 31]

diabel

Si bo na mi bo kariño mi ta siña bo kos ku ningun otro hende no por siña bo. Ta bo lo mi hasi e muhé di mas sabí di mundu.

mari

Anto bo mester ta un homber masha sabí anto, Ta ken bo ta?

diabel

Pasikiko bo ke sa? No puntra mi ta ken mi ta. Sa numa ku mi ke bo hopi bon.

mari

Ki yama bo, mi amigu?

diabel

Manuel Tortín. I si bo ke sa, tin masha hopi tersio ku konosé mi bon.

mari

Ta diabel di fiernu bo ta.

diabel

N' ta nada ken mi ta. M'a bisa bo mi ke bo bon.

mari

No kere ku mi tin miedu di bo tampoco, no. Satanas mes sali for di fiernu bini serca mi, mi no tin miedu di dje, asina hostiná mi ta awor aki. Pa mi tur miedu a pasa.

diabel

Anto mi dushi tur kos ta kla. Si bo ke ban ku mi, hasi net manera mi bisa bo, mi ta siña bo tur kos ku bo ke. Ya ta di dos be ku mi ta primintí bo. I mi ta bisa bo tambe, loke ta prenda ku plaka, bo ta haña kuantu ku bo ke.

mari

Masha bunita, ma prome ku mi bai ku bo, bo mester siña mi un dje kosnan ku bo di bo ta siña mi. Pasobra hesú mi tin gana di sa hopi kos. Bo ta siña mi tur kos, hèn, n' ta bèrdè?

diabel

Palabra di homber. Mi ta siña bo tur kos ku ta pas pa bo sa.

[p. 32]

mari

Spiritismo ta un bon kos. Mi tio sa hopi spiritismo, bo sa? Tin be e sa hasi kos masha straño. E tin un buki ku ta siñ'é saka spiritu malu. N' tin un spiritu pa por kun'é. Si e ke e ta larga diabel pasa den wowo di angúa sin puntr'é ku e ta haña bon. Esei mi tambe ke siña.

diabel

Mi leli blanku, tur mi saber ta pa bo, no spanta no. Ma spiritismo nunka mi no a siña, pasobra ta masha trabou pa siñ'é. Si bo kuminsá hasi spiritismo i bo lubidá un palabra o un lèter, y bo no por dominá e spiritu ku bo a yama, bisé e palabra ku mesté, e ta kibra bo garganta pa bo. Bo mes n' ta mira ku ta masha peliger, mi flor bunita?

mari

Si ta asina, anto mi no ke sa mas. Mi no ke siña nada ku por ta mi desgrasia.

diabel

(Esta bon, m'a saka e kos for di su kabes. Siñ'é spiritismo, sigur no, ta pa e buta henter fiernu ariba abou hasi manera e kier ku nos. Lo e bin dominá mi mara mi na un logá ku ni muf mi no por muf. Ami siñ'é kon ta saka spiritu malu? Loko lo mi ta. Mi ta sòru pa nunka mas e no bini mi ku e idea ei...) Skucha kiko mi ta bai siña bo, mi dushi amor, i lubidá e kuenta di spiritismo ei.

mari

Kiko bo ta bai siña mi anto?

diabel

Laga mi splika bo. Mi ta siña bo tur lenga di mundu. Asina tur hende lo tin respet di bo. Pasobra, bo sa kiko yama, no, papia tur lenga di mundu? Anto aínda lo mi siña bo hopi otro kos mas. N' tin hende pa para ni den bo sombra.

mari

Bo palabranan a konsolá mi. Basta bo hasi manera b'a primintí mi, mi ta na bo disposishon.

[p. 33]

diabel

Un kos so mas mi tin ku pidi bo, mi imáhen; ta pa bo mes bon.

mari

Ta kiko bo ke pidi mi anto?

diabel

E nomber ku bo tin ei, no, lubidé bo buska un otro nomber. Mari ta un palabra ku no ta kai mi bon. Ta un hende ku yama María a pone ku ami ku mi amigunan ta sufri tantu asina. Nos no ke tende e nomber ei mas. Pa kiko bo no ta yama bo mes Nena, o Margo, o Bel. Mi ta duna bo mi palabra, promé ku pasa un aña, lo bo mira ki probecho e trokamentu di nomber ei lo tin pa bo, bo n' tin idea.

mari

Ma mi shon, ta pa ki motibu bo no gusta mi nomber? T'e nomber di mas bunita i di mas santu ku tin. Ta un nomber ku tur hende gusta. Mari ta bini di María, mi no ta komprendé ta di kon bo no por wanta e nomber ei. Ami lo no ke trok'é pa nada di mundu. Segun mi no tin un nomber mas dushi.

diabel

(A karamba! Tur mi trabou ta perdí si mi no logra pon'é troka su nomber...)

Skucha mi, mi amor, si bo ke pa nos ta huntu, anto bo mester troka bo nomber, maske kon duel bo. Sino n' tin kuenta di keda serka otro. Un kos mas tambe bo mester primintí mi. Pensa bo bon, pasobra primintí ta debe.

mari

Kiko mi tin ku primintí anto?

diabel

Ku nunka mas lo bo no hasi krus. Maske kiko pasa bo, maske ki peliger bo haña bo adén, bo no mester hasi krus nunka mas.

[p. 34]

mari

Ta bon, no; kiko mi tin kun'es ku hasimentu di nomber di Tata, Ma mi noniber si mi no ke perde. Pasobra ta María ta mi uniko konsuelo, tur mi speransa. Kiko ku molestiá mi, ta María mi ta pidi pa yuda mi. I tur dia tambe mi ta resa un orashon p'e, ku mi a siña for di dia mi tabata mucha chikí. For di dia m'a kuminsa haña un tiki sintí mi stima María. I no ta kos ku nunka lo mi falta. Maske kon malu mi komportá mi, Dios libra mi lubidá di alabá María.

diabel

Bon, Pasobra bo ta asina loko ku e nomber ku bo tin ei, mi ta pidi bo mas presis anto: mi ta haña bon ku bo keda ku e prome lèter di bo nomber, mi prenda.

Ta lèter M. P'esei for di awe bo yama Emè. Tin hopi hende muhe yama Emè.

mari

Wel si mi no por keda ku mi mes nomber, pa nos no tin mester di bringa ku otro, laga mi keda ku esun lèter so numa anto. For di awe unda ku mi pasa ta Emè mi ta bisa nan mi yama. Ma korda bon, ta kontra mi gustu.

diabel

No tene miedu; si promé ku pasa un aña tur kos no ta bai manera bo ke, tira falta riba mi numa. Laga nos kuhe un barku bai Puerto Cabey, anto djei nos ta buska moda di yega Caracas. Aya sí nos lo por biba bon. Promé ku nos yega aya, lo bo a siña papia tur lenga ku bo tin gana di papia, manera m'a bisa bo; anto aínda hopi otro kos mas ku bo tin gana di sa. Lo bo kome bon, bebe bon.

Basta bo sòru stima mi pa mi tambe stima bo. Lo bo mira kon t'abo ta bin manda den mundu aki...

(Ma e alma di bo ei, dia bo muri, ta pa mi e ta.)

Desputs di e palabranan aki Emè ku Manuel a buska un barku ku a hiba nan Puerto Cabey. Aya nan a keda dos tres dia pasa masha bon, paga gastu pa tur hende ku a bin kome i bebe ku nan.

[p. 35]

IV. awor nos lo lubida eme ku Manuel un ratu pa nos bai mira kiko a para di Pader Anselmo, eme su tio.

Despues ku a pasa dos tres dia sin ku Mari, ku awor yama Emè, a bolbe, Pader Anselmo ku tabata anshá ta unda su subrina por a keda, a bisa den su mes:

tio

Mi ta tur na laria. Ta kon Mari mi subrina a keda Punda tantu asina, djis p'e bai kumpra dos tres pida kos. Anto m'a bis'é ku si nochi ser'é promé ku e bolbe, o si e tin miedu, e bai drumi serka mi ruman, kaminda mi mes tambe semper sa keda ora mi bai Punda.

Mi no por haña sosiego tanten mi no sa ta kiko a para di dje. Si ta un desgrasia mester a pas'é, Hesú, lo ta mi morto, pasobra mi no por biba sin dje. For di chikitu m'a kri'é. Mi no ke pa nada pas'é. Ma ta masha lihé pa gaña un pober mucha muhé trastorná su kabes p'é. P'esei laga mi sali bai Punda un be aki pa mi haña sa di dje. Maske hopi be ta asina hende sa tende kos ku nan no tin gana di tende.

Asina Pader Anselmo a sali bai Punda, bai kas di su ruman muhé puntr'é pa Mari su subrina. E muhé, ku ta gusta dal su beter, a respondé Pader Anselmo masha malu, bis'ele ku e no sa dje mucha. E ora ei Pader Anselmo a bira masha tristu, i el a bisa su ruman:

tio

Ai Dios mi ruman, mi ke ku bo ta gaña mi. Kon bo ke bisa mi awor ku bo no sa di Mari?

tantan

Mira aki, homber kèns, mi no ta gaña bo nada.

tio

Mi ruman, mi ke ku bo ta gaña mi.

tantan

Bai busk'e bo ta hañ'é den kualke kas skondí ei. E tin ku biba tambe, no.

[p. 36]

tio

Mi ruman, mi ke ku bo ta gaña mi. No bisa mi ku bo no sa nada di dje. Mi ke ku bo ta hole bibida. I kaba bo ta manera sará pasobra m'a bin puntra bo desentemente ku b'a mirele.

tantan

Desentemente, ay si. Anto bo ta hasi net manera ta serka mi e ta. Ta basta dia kaba ku e mucha a yega aki bisa mi: Tantan por laga mi drumi aki awe nochi, pasobra mi tin miedu di bai kas awor lat aki mi so.

Por tin ladron o mal hende riba kaminda.

E ora ei m'a bis'é e bai numa kaminda el a sinta pasa pleizir henter dia kaba.

tio

Kon? Pasa pleizir henter dia? N' por ta!

tantan

Ora mi bisa bo un kos, kere mi. Bo ke ku ta bebe m'a bebe, no. Ma bo mester a weta e subrina di bo ei ora el a yega aki serka mi. Che! Anto ora m'a hala su atenshon riba esei, el a rabia ku kasi e por a kome mi bibu.

El a kuhe su kaminda bai, blo ta zundra numa. I for di e dia ei mi no a mira nos dams mas.

tio

Esta malora, no. Dios Tata na shelu, ta unda e mucha por a hinka su kurpa.

tantan

No hunga kens; bo mes por komprendé ta unda lo e ta. Tin hopi hende homber ta kana buska kos di hasi awendia.

tio

Ma mi rumán, kon bo ke papia asina! Bo ta nami pena.

tantan

Bo mester a ser'éle den un doshi, anto awor lo bo no tabatin e pena aki. Ma mi tata, ta kiko bo ke, homber! N' ta nada no. Laga e mucha hasi manera e tin gana un tiki.

[p. 37]

Miseria lo e no pasa, kontrario!

tio

Ni skucha mi no por skucha mas. Ta manera mi kurason ta parti for di otro na pida pida. Awa ta yena mi wowo...

(E ta resa)

La Birgi, Mama di Señor, ku mi ta stima, ku tur Diasabra mi ta resa na bo pía, yuda mi awor ku mi ta haña mi den miseria.

San Antoni, ku e Niño den bo brasa, pa ken m'a sende tantu bela den mi bida, pa fabor, no bandoná mi awor... Mi ta bai buska tur kaminda, puntra tur hende ku nan no sa nada di dje.

Hesú ta duru perde un hende ku bo stima.

Asina Pader Anselmo a sali bai laga su rumán. Tristu tristu, pasobra e no por a haña notisia di su subrina.

V. mari su tantan ta mata su mes.

Den tur esei dia pa dia Tantan tabata hañ'é den mas apuro. Pa e paga un debe ku e tabatin, el a kobra plaka na Banko bou di nomber falsu. Ma un debe ta trese otro, i asina kada bes e mester a usa nomber falsu p'e kobra was plaka paga debe kun'é.
Anto awor a sali na kla ku su marchantenan ku e tabata hasi bruha pa nan, a kuminsá keha ku su bruha no ta sirbi, i ku ta ranka e ta ranka plaka for di nan. El a tende na kaya ku nan a sera kabes pa bin bati'é anochi.

tantan

Malditu sea!! Awor si no tin speransa mas. E mala diabelnan ei bin baha riba mi awe nochi, ta tur mi kurpa nan lo skerf pa mi.

Mi no tin kaminda di skonde.

Ningun hende no ke mi. Anto si mi bai warda di polis bai pidi ausilio, nan tin ku puntra mi mi nomber, haña sa ku ta ladron mi ta. Kon mi ta hasi awo, Satanas.

Ta kiko mi ta mira ta dobla skina di kaya ta bini mi tras

[p. 38]

ei? Ta dos polis! T'ami nan ta buska.

diabel

Esta bon, awe si mi ta korta maíshi. E alma aki ta pa mi, n'tin awa pa lab'é.

tantan

Mi no por mas. Satanás, yuda mi!!

diabel

Mi t'ei, mi t'ei. Ma yudansa no tin mas pa bo. Tur kos ta perdí, tur kos ta perdí.

tantan

Tur kos ta perdí? N'tin moda mas? Awel, mi ta bai kas bai mata mi kurpa ku kuchú; toh mi ta kondená kaba.

diabel

Ban hiba e alma aki pa Satanás, ya e por kima pa semper den kandela di fiernu. Ta asina nos ta pone hende hinka nan mes den malora, pa despues nan desesperá kondená nan mes. Esta bon trabou m'a traha. Laga mi kore bai piki'é.

VI. eme ku Manuel ta bai caracas, okashona hopi desordu ku maldad.

Despues ku Emè ku Manuel a pasa poko dia na Puerto Cabey, nan a sigi biaha bai Caracas. Aki Manuel di ku Emè:

manuel

Ata nos na Caracas. Awor nos ta ban gosa, biba bon poko. Bo ke nos drenta aki bebe ki' ku ta, pa nos lubidá kansansio di biaha?

eme

Drenta unda? Den e botikin ei?

manuel

Si, dushi, O nò, mihó nos no drenta. Laga nos sinta na un dje mesanan afó riba asera aki mes. Ta aki bo ta topa tur sorto di hende ku gusta pasa pleizir.

[p. 39]

Shootu, parandero, hungadó di plaka, muhé di bida, ladrón ku ta buska kos di hende pa piki bai kun'é.

eme

Si, laga nos keda aki. Mi tin masha gana di mira e kosnan ei. Ata un mesa bashí aki. Bini.

manuel

Sinta bo, mi amor.

Ban mira, tersio! Hasi lihé trese un bon kos di bebe pa nos aki. Ta piká p'e para zir den boko.

sirbido

Kiko shon ta tuma?

manuel

Pa mi, un bon rom. I pa e dams aki, un glas di biña pa kenta curpa, dun'é kurashi. Ki bo di?

sirbido

Mi ta tres'é un be.

Un rom dòbel! Un glas di biña!

manuel

Yena e glasnan bon!

tipo i

Tata! Un palu di galiña a kaba di drenta ei!

tipo ii

Si...! Anto mira e tipo ku a drenta kun'é.

tipo i

Bo ke nos ban sinta na nan mesa? Anto si ta su dushi, nos ta kit'é for di dje.

tipo ii

Si e tersio hera kik, awe nochi mes nos ta pas'é su kuchú. Hesú e demoño tin mala fashi, karamba!

Ma e muhé si ta bon! Loke t'e a nek, te bula! Bo t'ei?

tipo i

Ma ta lei, no...

Bon dí'e Dios, amigu!

manuel

Bosonan ke un beter?

[p. 40]

tipo ii

Masha danki, nos mes tin kaba. Ma bo ke nos bin sinta na bo mesa un ratu?

manuel

Kuantu ratu ku bo ke. Ami nunka sa nenga bon kompania.

tipo i

Si no ta muchu trimintí di mi parti, no, ta di banda di unda bosonan ta?

manuel

Di banda di Puerto Cabey.

eme

Manuel, mi amor, bo no ta korda bo a siña mi ta kon ta kalkulá kuantu gota di rom tin den un labizjan?

manuel

Sigur no, mi dushi. Ta ayera m'a siña bo. Bo sa aínda ta kon?

eme

Kon por laga. Bo ke pusta?

tipo i

Kompai, kiko bo mucha muhé di ei?

Ku e por kalkulá na bista asina kuantu gota di rom tin den un labizjan? Ta kos ku nunka mi no a tende.

manuel

Esei ta nada. E sa hopi kos mas aínda. Nunka di bo bida bo no a topa un muhé manera e. E sa musik, e sa traha poesía, e sa kura hende.

E ta para kualke doktor ku a studta na Merka o na Europa.

tipo ii

Ma kompai, laga e mustra nos anto kiko e sa.

tipo i

Laga mi manda un beter promé si. I pena la bida es un ku hera stroba bo! Lo e mira kon ta par'é!

manuel

Emè, mira karta pa nan, bo ke? Bosonan sa, e por konta

[p. 41]

bosonan tur kos ku a pasa den bosonan bida, for di dia boso a nase, te dia di awe.

eme

Ay no, Manuel!

manuel

Pa kiko no, Emè? Bo hasi asina nan ta kapas di kere ta sa bo no sa ta kon ta mira karta.

eme

Ma mi no sa drechi. Miramentu di karta ta un kos ku bo no por siña, ta nase bo mester nase kun'é.

Tur otro kos, basta bo pon'é bo pa siña nan, bo por siña. Ma mira karta si no. Mi tin miedu pa mi no bruha.

tipo ii

Ma mi prenda, ta roga hende tin ku roga bo?

tipo i

Purba numa, n'ta nada. Ata un baraha di karta spañó aki.

eme

Hn, hn! Mi mes baraha!

Ma mi mester di silensio si. Sino mi ta bruha.

tipo i cu ii

Silensio! Silensio! Miramentu di karta!

Silensio!

Tur e hendenan ku tabata sinta bebe dilanti di e botikin ta keda ketu lanta bai para rond di e mesa kaminda Emè ta bai mira karta.

eme

Abo, ki yama bo?

tipo i

Pedro Marino.

eme

Bon. Skucha kiko mi ta bisa bo.

B'a nase dia 22 di Maart, na Coro. Bo mama yama María Petronilla. Bo tata... bon, laga nos salta esei.

[p. 42]

tipo i

Nò, pa kiko?

eme

Sera bo boka pa bo no stroba mi. N' ta tur kos tur hende mester sa. Si mi hasi un fout, bo bisa mi.

tipo i

Te awor tur kos ku bo a bisa ta presis manera ta.

eme

Awel, laga mi sigi anto. Dia bo tabatin seis aña bo mama a manda bo skol di pornada na Coro. Ma ta dos aña so bo a bai skol si.

tipo ii

Oh, anto semper b'a gaña mi ku ta skol di plaka b'a bai, te kaba tur klas.

tipo i

Gaña bo, no.

tipo ii

Si, gaña mi.

tipo i

Bisa un be mas ku mi ta gaña pa bo mira kiko mi ta hasi ku bo.

eme

Ma karamba, bosonan ta stroba mi. Asina mi no ta mira nada mas pa bosonan.

Mira di ora kaba Manuel tabata buska manera di harma un bringamentu. El a trapa un di e tiponan ku tabata pleita duru riba su pia, traha un kara masha inosente.
E dos tiponan a kuminsá bringa ku otro, ku masha desordu, ku sakamentu di kuchú.

VII. manuel ta sigi okashona bringamentu ku matamentu na Caracas.

Asina Emè ku Manuel a keda biba na Caracas. Tur dia, pa instigashon di Manuel, tabatin bringamentu den e botikin, ku

[p. 43]

kasi semper tabata kaba ku hinkamentu ku kuchú. I hopi kos kriminal mas ku ni konta hende no por konta.
Manuel tabata sinti su mes gosá i e di den su mes:

manuel

Aki si m'a traha un bon trabou. Mi ta spera ku lo kai maske ta algu afó pa mi kompainan den fiernu. Si mi keda manda poko tempu mas den e logá ki, ta hopi alma mes Satanás lo haña p'e pasa su dianan kun'é.

Lo tabata basta kens di mi parti si mi bai for di aki awor. Pasobra tur hende ku ta hiba bida di shouru, tur hungadó di plaka, bringadó, kaweta, muherero, muhé di mal bida, t'aki bo ta topa nan.

I ta di e hendenan ei mi tin ku saka mi probechi. P'esei t'aki mes mi tin ku keda. Mi ta bai puntra e doño di e botikin kuantu e ta kobra mi pa mi ku Emè keda biba aki, esta, si e tin un kamber huur ku nos pa nos biba aden. Una bes ta aki ta mi kas, mi por drenta sali manera mi ke. Anto mi por wak mi chens pa kada be mi harma desordu, trese bochincha ku bringamentu den hendenan.

Promé ku aña kaba mi ta sòru pa tin mas cu shen matamentu. Ganashi ta pa Satanás. Lo mi hasi manera ta dokter mi ta, si, dokter hasidó di bruha.

Mi ta siña Emè tambe. Karamba nan lo tin respet di nos. Lo mi siña nan tambe ta kon ta deskubri plaka derá. Anto Emè ta mira karta pa nan. No kos ku pasa so, ma kos ku tin ku bin pasa aínda tambe. Promé ku un luna tur kaminda nan lo menta nos nomber. Sin konta mes kuantu plaka nos lo gana. Anto Emè mi dushi, dia pa dia lo e bin stima mi mas. E kens, promé ku aña kaba lo el a yuda mi kondená mas di mil alma. I su mes alma tambe!...

Basta den shelu ariba aya nan no stroba mi si; sino m'a nek.

[p. 44]

VIII. eme ta kuminsa sinti ku su bida ta un bida di piká.

Despues ku nan a pasa poko tempu na Caracas, Emè a kuminsá komprendé ku ta un bida masha malu e tabata hiba, pasobra pa su via Manuel tabata pone hendenan hasi hopi maldad tur dia. Anto Emè a bisa den su mes:

eme

Tin be mi kabes ta bati aden ora mi pensa ta ki bida di piká esaki ta.

Mi tin fis di mi mes. M'a hasi manera no tin shelu mas, ta sigi kaminda di fiernu. Tur dia kasi tin matamentu di hende aki, i mi sa ku ta pa mi tur e kosnan ei. I mi sa tambe ku ta e malditu Manuel ei su falta. T'e ta kausa di e maldadnan aki. Maske nunka e no a bisa mi e mes, mi ta sinti den mi kurason ku ta un diabel e ta, un diabel ku a sali for di fiernu...

Tantan, Tantan, ta bo ta kulpa ku mi ta bai perdí. Ta bo zundramentu a pone ku mi a bira manera mi ta aki, un hende di kaya sin honor.

Maske kuantu mi keha o yora awor, ta lat kaba, mi no por bolbe mas.

Dios a bandoná mi pa semper. Mi tabatin kustumber di resa tur dia na honor di La Birgi, ma awor ni esei mi no sa hasi mas. Anto Manuel no ke pa mi hasi krus tampoko. Esei no ta bon señal, pasobra ta diabel sa tin miedu di krus...

Ma pasi kiko mi ta kibra mi kabes, mi n' sa. Toh ta laat kaba. Hei, ata mi ta mira dos kompai ta bini ei ku mi a palabrá ku nan pa nos topa awe den bodkin. Lubidá ko'i loko, ban pasa un rato alegre.

IX. manuel ta sigi ku su mal akshonnan.

Un ratu despues ku Emè a bai sinta serka e dos amigunan den botikin, ata Manuel tambe a yega. El a bolbe sembra pleitu den

[p. 45]

nan, te ku un a hinka e otro mata. Despues Manuel a kohe es un ku a mata e otro bai pafó kun'é kaminda di kunuku, kaminda el a bolbe mata un otro homber, pasobra Manuel a gañ'é ku e homber aki tabatin hopi plaka den su saku.
Bon kontentu Manuel a bisa den su mes:

manuel

Satanás ku tur su diabelnan den kouch'i fiernu! Mira kon tur dia mi ta gaña pueblo aki. Nan tin mi pa masha gai. Mi ta bisa nan presis ki malu nan tin i tur ta haña miedu di mi, hasi manera mi manda nan.

Pa tur hende mi tin konseho.

Hende muhé mi ta siña nan ta kon nan tin ku hasi pa homber ta loko nan tras.

Nan ta trastorná e hombernan kabes asina tantu, ku e burikunan ta kore bai tuma nan morto sin sa.

Satanás lo ta lembe boka. Anto awor hasta mi ta yuda nan buska plaka skondí, e kensnan. Ta ayera un a haña su morto asina. M'a mustr'é kaminda tabatin plaka derá bou di tera, bou di un stal di kabai. El a kere mi ora m'a bis'é ku ta net bou di e pilá ku henter e stal ta wanta ariba. M'a splik'é ku e mester koba den tera pa e haña e plaka.

E goloso a kuminsá mes ora, ma segun e ta koba, e pilá ta perde tera p'e wanta ariba, te porfin, bradam, ata pilá ku stal ku tur a bini abou dera nos amigu...

Ma awor mi tin idea di hasi hasta milager pa nan, basta ariba aya den shelu nan no disidí di stroba mi. Ku milager si ta pa Dios mes nan ta weta mi.

I kon ku ta, despues nan ta bin kompañá nos den fiernu.

X. eme ta pidi Manuel pa e bai Corsou bai bishita su famianan.

Despues cu Emè ku Manuel a biba seis aña na Caracas, kaminda pa nan instigashon a pasa masha hopi kos malu, Emè a kuminsá haña gana di bai weta su hendenan na Corsou. El a pidi Manuel bai kun'é bai bishitá nan. Manuel a kontestá:

[p. 46]

manuel

Emè, mi no gusta ncnga bo un fabor. Bo di bo ke bai bishitá bo famíanan?

eme

Si, laga nos ban, hen?

manuel

Mi dushi, mi no gusta nenga bo un fabor.

eme

Mi tanta na Punda, mi tio na Malpaís, mi tin seis shete aña sin mira nan.

manuel

Ta p'esei mes mi no ke nenga bo e fabor aki. Mi ta primintí bo, nos ta bai bishitá bo hendenan.

eme

Ni sa mi famíanan no sa ta unda m'a bai; kasi pa nan kere ta guli tera a guli mi. Anto Hesú mi tio ta stima mi. Mi tin sigur ku el a yora masha pasobra m'a bai lag'é.

manuel

(T'e tio demoño ei ku ta hunga santu ta nek mi ku su resamentu, kada be ku mi kere ku awor si mi tin Emè dominá.

Mira di tempu kaba lo mi a kibra e mucha su garganta p'e, si no ta pa e resa ku e tio ta resa kada be, pidi yudansa di e muhé ku nan ta yama Reina di Shelu. T'e ta pon'é skapa for di mi man. Mi no ta logra nada asina. Mara mi por a haña chens.)

eme

Ki bo di, Manuel?

eme

Ki bo di, Manuel?

manuel

Nada, Emè mi amor. Mi ta laga bo bai bishitá bo hendenan, manera bo a pidi mi, si ta asina gana bo tin. Bai serka e doño di e botikin bo pag'é loke nos deb'é pa e kamber. Anto mañan nos ta barka bai Corsou, pa nos bai bishitá bo tio ku bo otro famíanan. Kaminda bo hiba mi ta bon. Ami ta kla.

[p. 47]

eme

Mi ta bai puntra ta kuantu plaka di huur nos mester paga aínda.

manuel

Ta bon, mi dushi. Bo no tin mester di para liga delaster un sen kun'é, abri man numa...

Mi ta kere lo ta bon pa mi si nos bai bishitá e pader ei ku e ta yama su tio. Si mi hera hañ'é mal pará, lo mi kibra e malditu su garganta p'é. Ora mi kaba di kita e karizo ei for di kaminda, anto si Emè ta di mi. Mi por domin'é manera mi haña bon. Ma pió ta ku maske kiko mi hasi, no ta sirbi mi di nada, tanten e Shon Grandi ariba aya no permití mi hasi manera mi ke. Sin dje, ni muf mi no por muf.

XI. eme ku Manuel ta biaha bai Corsou.

A sosedé anto ku Emè ku Manuel a biaha bai Corsou, i nan a yega Punda net dia di proseshon di La Birgi.

manuel

Bon, Emè, ata nos a yega Punda. Bo ta kontentu awor? Anto awe ta net dia di fiesta. Bo di bo tanta ta biba aki, bo no ke bai bishit'é?

eme

Si, mi ta bai bishit'é. Ma no ta ko'i kere si ku lo e laga mi drumi na su kas, o ku lo e na mi pida ko'i kome.

Pa banda di dje, ta palabra malu lo mi haña, ku zundramentu di mas onbeskop ku tin, manera el a yega di hasi un be kaba. Ta su palabranan bestial sin motibu a pone mi ta biba e bida di desordu aki.

manuel

Kere mi, mi prenda, mi konsuelo.

Bo no tin mester di bai serka djé mas. Bo tanta tin me'i tres aña morto kaba.

eme

Kon? Morto?

manuel

Si, mi kurason.

[p. 48]

eme

Ta kon bo por sa, Manuel?

manuel

Mi sa sigur.

eme

Hesú ta duel mi.

manuel

Toh, ta asina mes.

eme

Ma para, ta kiko mi ta weta ei? Laga nos ban wak, promé ku nos kita aki fo. Mira kuantu hende rondoná ei. Ta kiko tin? Puntra ken ku ta.

manuel

Ay, mi amor; ta un komedia nan ta bai hunga.

eme

Ahan, berde, tur aña nan ta hunga e komedia ei dia di La Birgi. Komedia di Maskerón. Ta un komedia masha masha bunita, bo sa? Mi tio semper tabata sa bini Punda bin mir'é. Ay Manuel, laga nos ban mira, no!

manuel

Ta ko'i mucha chikí. Kon bo gusta ko'i kens asina, hen? Ban unda ku ta kaminda nos por kome un bon pida karni asá, bebe un kos di kenta kurpa.

eme

Ma Manuel, e komedia ta masha bunita. Mi tio a yega di bisa un be ku e komedia aki ta mihó ku hopi predikashi. Nan sa konta historia masha bunita den e komedianan ei. Awel no rabia, dushi, mi tin masha gana di mir'é.

manuel

Bo sa, mi no tin gana di laga bo bai mira.

(Rabu di Satanás, mi ta yen di miedu aki pa e no tende un kos den e komedia ei ku por pon'é haña duele, drecha su bida. Pasobra anto si tur mi plan ku m'a traha a frakasá.)

eme

Ay Manuel, laga mi bai mira.

[p. 49]

manuel

Ta bon anto; ma bini trobe asina mi yama bo, sino mi ta rabia.

XII. eme ta bai mira komedia di maskeron.

Asina anto Emè a yora Manuel te ora el a lag'é bai mira e komedia. Ma manera bosonan a tende, ta di mala gana Manuel a lag'é bai. E komedia a kuminsá asina aki:

maskeron

Brrrrrrbrrrrr! T'ami, Maskerón, abogado di Satanás. Mi ta bai pleita mi kaso dilanti di Hues den Shelu. Ta pakiko e tin tanto miserikordia ku kompashon pa rasa humana asina, anto nos, pober diabelnan, ni aktu e no ta aktu nos. Maske ta un hende so hasi tur maldad ku tin den mundu, basta e tin un bon kontrishon, i propósito firme di drecha su bida, e ta haña grasia i pordon di Dios. Anto nos, pober Espíritunan, ku uniku malu ku nos a yega di hasi ta djis un pensamentu sobèrbè so, nos ta haña nos bentá den abismo di fiernu, sin nun sorto di speransa, den un eterno dolor kruel. Ami, Maskerón, abogado di Satanás, mi ta bolbe puntra bo, Dios di Miserikordia, pa kiko bo ta nenga nos bo pordon, na ora ku bo no ta nenga hendenan, ku tur dia ta hasi piká di mas grandi ku tin?

dios

Mi tin pordon pa tur hende ku haña kontrishon promé ku nan bida kaba. Pa tur hende ku rekonosé na tempu ku ami ta un Dios di miserikordia y hustisia.

Ma esnan ku tin un kurason manera pieda, ku ta sigi ku nan bida bergonsoso, ku no ke kombertí nunka, nan mester senk huntu ku Satanás den abismo di desesperashon.

maskeron

Bo hustisia hopi be ta sali robes, maske kuantu nan di ku

[p. 50]

ta un Dios Hustu bo ta. Den tempo di Testament bieu, ku Abraham, ku David, ku Moisés, den e tempu ei si hende por a yama bo hustu.

Bo tabata bergonsá hendenan, bo tabata kastigá nan pa kualke kos malu ku nan pensa so nu ma. Ma awendía, yu no ta respetá nan mama mas, nan ta lanta kontra nan tata, ruman ta zundra otro, y toh, basta nan tin un bon kontrishon, nan por probechá di bo miserikordia.

dios

Ta pa kiko m'a laga nan klaba mi na krus anto, ku tantu doló, ku tantu berguensa? Ta pa tur hende por haña pordon serka mi Tata den Shelu, grandi ku chiki ku tur.

maskeron

Ta p'esei mes awor bo mester bai mas duru ku nan. Bo mester rabia mas ku nan, mas ku promé nan aya.

Pasobra nan a rank a bo pañanan for di bo, mata bo di un moda bestial, i b'a aseptá morto pa nan mes bon.

I ata awor mas ku nunka nan ta landa den piká, nan ta hasi kos horibel ku ni konta bo no por konta. Ken ku pensa bon, nan kurpa ta kuhe rel ora nan mira ku awendía hende ta hasi kos ku promé aya ni pensa nan no tabata tribi pensa.

dios

Ei bo tin rason, Maskerón. Hende a bira ta stima piká asina tantu, ku si nan no drecha nan bida, ta mi spada di hustisia mi tin ku laga baha den nan pa kastigá nan, ta mi plaganan teribel mi tin ku manda pa nan.

la birgi

Mi yu, ta nami pena ku bo ke manda plaga pa nos hendenan; hasi mi un fabor, laga nan biba na pas poko tempu mas. Manda nan kualké señal promé, manera bo sa tin kustumber di hasi, laga tera tembla, laga solo sali dòbel, laga nan mira stres ku rabu.

Anto e milagernan aki lo mustra nan ku bo ta masha

[p. 51]

rabiá ku nan; e ora ei kisás nan lo laga piká para un banda, pa miedu pa bo no kastigá nan mas aínda.

dios

Nò, mi Mama, ta trabou perdí. Masha hopi be kaba m'a manda nan señal pa spanta nan. Malu, gera, flakesa, kos ku mester pone nan stop di hasi piká ofendé mi. Ma mas bo primi nan, mas kruel nan ta bira, i nan no ta pensa ku un dia nan lo muri, bai kima den eternidad. Nan ta bisa: Miedu? Pasikiko? Basta na mi ora di morto mi sklama na shehi, Dios miserikordioso ta duna mi pordon.

XIII. eme ta kuminsa haña kontrishon.

Sigún Emè tabata skucha e komedia aki, el a kuminsá pensa riba su mal bida, i su kurason a bira tristu. El a bisa den su mes:

eme

Mi Dios, esta un desosiegu den mi pechu, awor ku mi a mira e komedia aki. M'a tende asina tantu berdad, ku mi konsenshi a kuminsá molestiá mi.

manuel

Boa, ta aki bo tin idea di keda para? Ban mira. Ta kon bo gusta tende hende papia ko'i loko asina? Laga nos ban, mi amor.

eme

Nò, no yama mi; no hala mi na mi paña. Ken ku ke por bai, ma loke t'ami, mi no ta kita aki fo, tanten e komedia no kaba.

manuel

(Ma Satanás, yuda mi! Esta tròbel no, ata awó e ke keda para aki. Mi tin miedu pa e no haña idea di troka su bida. E hendenan ei ta papia muchu ko'i loko tambe p'e tende. Mi ta warda un ratu mas, anto si aínda e no ke ban, ta bati lo mi bati'é kit'é aki fo.)

XIV. eme ta sigi mira e komedia.

Asina anto Manuel tabatin gana di stroba Emè di mira e kamedia. Ma Emè a keda tende, sin maha sa kabes ku Manuel ke

[p. 52]

o laga di ke. I e ko media a sigi:

maskeron

O Rey di Shelu, i di tur kos ku tin na mundu, Dios di Hustisia, ku ta sintá na altu, pakiko bo no ta duna Satanás ku tur su Diabelnan permit pa nos ban kastigá hendenan un tiki, pa nan pikánan i nan maldad. Sino nunka mas bo no por pone fin na nan mal akshonnan.

Bo man di hustisia mester drama kastigu pa hendenan rekonosé bo poder.

dios

Maskerón, mi ta kere berde ku a la fin lo mi tin ku duna boso permit pa molestiá hendenan un tiki. Pasobra nan no ta haña miedu tanten nan no sinti kuchu riba nan garganta.

la birgi

Mi yu, tene pasenshi, pasobra hendenan
lo kombertí un dia, lubidá piká;
no kore kastigá nan ku tantu purá.
Kord'e pechunan ku a duna bo lechi,
kord'e skoch'i mama ku b'a nase aden,
korda e doló ku bo mes a sufri,
korda tur e sanger ku bo mes a drama.
N' ta pa nan bon, pa nan salbashon?
Pa nan por a haña pordon serka bo Tata?
Ta bo mes a bisa, ta bo mes a splika:
Maske un hende so a hasi tur piká,
Tur kos di mas malu ku por tin den mundu,
Basta e kombertí, pidi bo pordon,
bo ta para man abrí pa risibi'ele.
Ta bo mes palabra, i tur hende sa.

dios

Asina mi di, mi mama. I mi no tin duele ku m'a bisa asina. Ainda mi ta bolbe bisa: Maske un hende hasi tur piká e so, hasi tur kos malu ku bo por imbentá, basta e tin kontrishon, lo e salba su mes. I si mi mester kere ku

[p. 53]

un alma so ta kore peliger di bai perdí, lo mi ke sufri dòbel doló ku mi a sufri kaba, pa yud'é...

Ay mi yunan, pensa bon kiko m'a bisa boso!

XV. eme ta hana kontrishon, pleita cu Manuel

Mas Emè tende e komedia, mas e tabata korda su pikánan. I el a bisa:

eme

Awor sí mi no por wanta mas. Awa ta basha for di mi wowo, kore na mi kara, pipita grandi. Mi konsenshi ta kome mi awor ku m'a tende e palabranan aki.

Ay, mi Dios, mi Señor. Si mi ke kombertí, ta posibel pa mi tambe haña pordon serka Bo? Te aínda nunka mi no tabatin duele di loke m'a hasi. Mi ke ku no por. M'a permití mi mes hasi muchu piká, m'a hasi manera mi ke muchu, meskos ku un bestia sin sintí. Tera, abri bo guli mi. Mi no ta bal ni pa mi kana riba bo.

manuel

(Satanás, kon mi hasi!! Mi wowo ta skupi kandela di rabia. At'e kriatura ta par'e so ta yora ei!! Kontrishon e tin! Hn!)

Tende aki, laga nos buska un bon lugá nos ban sinta gasta un pida kos.

eme

Demoño malu, no papia ku mi, bai laga mi. Ta kende a manda mi skohe bo, hen! Anto abo mes, mi Dios, m'a lubidá Bo. Mi kurason ta skruf sera den mi pechu, di duele ku mi tin. Mi n' por mas, mi ta bai, mi ta bai...

manuel

(Satanás ku bo pia di chubatunan, yuda mi. Maske kuantu mi grita, yora, skupi kandela, e mucha no ta aktu mas kiko mi bis'é. Asina mi trabou ta perde tur su balor.)

Ban! Ma demoño, ban, no! Sino manera bo ta pará ei mi ta kuhe bo benta bo den boka di fiernu.

[p. 54]

eme

Señor, tene miserikordia di mi!

manuel

(Ahan, ta asina kos tin, no? Awor mi sa sigur ku ta su konsenshi ta traba kun'é. Te ariba aya den nubianan mi ta his'é pa mi bent'é abou. Anto si aínda e no muri, ta masha sueltu mes e tin.)

Para, mi ta hisa bo bai den laria ku bo.

Ora el a kaba di bisa e palabra nan aki, Manuel a kuhe Emè his'é bai kun'é, mas altu ku tur kas, mas altu ku misa.
Tur e otro hendenan ku tabat'ei a keda para mira bon spantá, sin sa ta kiko esei ke men.

XVI. manuel ta kuhe Eme bent'e abou i Eme ta rekonose su tio

Ora Manuel a kuhe Emè his'é bai kun'é mas altu ku tur kas, el a lag'é dal abou den kaya, keriendo ku asina lo el a kibra su garganta. Hendenan tur a spant a masha pisá. Pader Anselmo, su tio, ku tambe tabat'ei ta skucha e mes komedia, a puntra su mes ta kiko esei ta awor, i ta ken a kai abou for di te den laria asina. El a bisa un homber ku tabata pará band'i dje:

tio

Si e no a kibra su garganta, anto ta un milager mes mester a sosedé. Mi no por mira hende sufri asina. Bo sa ta ken e muhé ta?

homber

Mi tin gan'i bai mira si mi konosé. Ma tin asina tantu hende ta pusha ta primi, ku bo no por yega serka. Sigi mi numa, pader, nos ta traha un buraku pa nos pasa. No kere ku mi no sa ta kon tin ku bringa pa pasa den hende, no. Ata, pader, mira. E pober ta for di su konosementu.

tio

Ta di komprendé. Tata, yudami!!

Mi sanger a kuaha den mi kurpa. Mi ta sinti mi ta bira steif. Amigu, yuda mi, pa fabor!

[p. 55]

homber

Ta kiko a pasa pader? Pader parse morto!

tio

Mara mi por muri berde awor ku m'a mira e desgrasia aki. Mi Dios, korta mi bida pa mi.

homber

Ma ta pasikiko tantu kos asina?

tio

Ta mi subrina. P'esei ma spanta tantu asina. Shete aña mi tin ta kana busk'é rond. Mira kon m'a top'é awor, su garganta kibrá. Mara tera por abri guli mi. Nunka mas lo mi no por biba sosegá.

homber

Pader tin sigur ku t'e mes?

tio

Mi por laga di konosé?

manuel

(Kandela di fiernu kima kachu di Satanás. Mi por trapa mi mes rabu, di sará ku mi ta. Awor sí mi no sa kiko hasi mas. Ata su tio serka djé, awor sí a ka ba.

Mira di tem mi mester a kibra e mucha su garganta p'é. Ma e resa ku e malditu pader aki ta resa ta pone ku mi no por hasi manera mi ke kun'é.

Mara mi por tabata por. Ta un be aki lo m'a kuh'é bai fiernu kun'é).

homber

Pader, mira, mi ke ku e ta muf.

tio

E ta muf? Ay Dios, mi doló a pasa.

Si, e ta muf, e ta muf berde.

eme

Mama, ta kiko a pasa mi? Ta unda mi ta? Mi ta na bida? Señor, ta asina bon bo ke mi ku bo ta nami okashon di pidi pordon? Si no rabata pa bo yudansa todopoderoso, ta mi alma lo tabata kima den doló eterno awor aki, sin speransa di mira shelu nunka mas.

[p. 56]

tio

Papia, Mari, papia ku bo tio, mi yu.

Hesú, m'a yora bo, Hesú m'a sufri pa bo.

Tur kaminda m'a puntra pa bo. Anto ata awor mi ta haña bo bentá den e hendenan aki, tur maltratá.

eme

Ta tio? Ta tio mes? Mara Dios por a duna ku mi tabata mes inosente ku dia m'a bai laga tio shete aña pasá.

Mi korda so ki bida di maldad m'a hiba, ta drenta mi un miedu ku ya mi ta perdí kaba pa semper.

tio

Mi yu, ta piká e kosnan ku bo ta papia ei. Ningun hende no ta bai perdí si no ta pasobra e mes ta kere ku e ta bai perdí. Unda a sali bo kere ku bo alma ta kondená? Ta duele.

Ma bisa mi, ta ki mishi bo aki? Mi tin gana di sa.

Ta djis ei bo tabata te den laria aya.

Bisa mi ta kon. Mi no por korda ku nunka m'a mira hende te den laria asina.

eme

Ta imposibel pa mi konta tio presis tur kos ku a pasa mi. Un dia m'a entregá diabel mi alma ku mi kurpa, i despues m'a keda biba shete aña kun'é.

Mi no por splika tio tur kos, p'esei mi ta konta tio ariba ariba asina kon mi a biba den e shete añanan ei i kiko nos a hasi. Ta kos ku bo por yena un buki kun'é. Mi pikánan ta mas grandi ku tur otro piká...

Ora m'a kaba di hasi kos malu shete aña largu, m'a bolbe Corsou pa mi bishitá tionan. I ora nos a bai pasa aki banda yega na Plan Mulina, m'a mira ku nan tabata hunga komedia di Maskerón; m'a keda para tende.

E palabranan ku nan a bisa den e komedia a pone mi haña asina duele di mi pikánan, ku e diabel ku tabata huntu ku mi a kuhe mi hisa mi den laria laga mi dal abou.

tio

Miserikordia, mi yu, diabel huntu ku bo?

[p. 57]

eme

Si, tio, diabel mes; i ta shete aña kaba ku m'a pone mi mes bou di su mando i ku mi tin ta biba kun'é.

tio

Tata! Mi tende so tur mi kurpa ta tembla. Nos tin ku separá e malbado ei for di bo, pa bo alma por gana shelu.

manuel

Hei, abo pader ei, ku ke ku bo ta masha santu, no purba separá mi for di dje. Si mi ke mi ta kuhé hib'é kaminda ta swafel ku breu kayente nos ta traha kun'é.

tio

Bo tin kurashi, demoño malu?

manuel

Si, desgrasiado, kondená! Ta di mi e ta, el a entregá su mes na mi. El a nenga di konosé su doño den shelu i el a keda serka mi. Ta p'esei lo e kima den fiernu. I tende bon, pader fregadó, si bo hera kit'é for di mi, mi ta kibra tur bo wesunan den bo kurpa pa bo.

tio

Mala diabel, mi sa kon para bo. Den mi buk'i misa mi tin aki un pida papel ku un orashon chikitu skirbí ariba. Ora bo tende mi res'é bo kara lo troka.

manuel

(Ay karamba, mi no por ku e kosnan ku e ta resa ei si. Mi kabei ta para bira spiña riba mi kabes di spantu ku mi tin. Kiko mi hasi awor? Satanás, mi perde e alma aki, anto ta bati nan lo bati mi ku zjwip di bala di chumbu. Karizo! Hasta mi oreanan por skupi kandela di rabia. Ta asina bo por mira ku ora Señor den Shelu ke nos malu, nos no por hasi nada, Si sigi asina, mi ta kere mi tin ku laga e alma aki bai.)

tio

Laga nos ban awo, Mari, mi ta hiba bo kas di pastor, pa nan kuida bo aya.

Dios sa kuantu kos bo no a kibra den bo kurpa. Pasobra

[p. 58]

ta for di den laria aya el a laga bo dal abou. Bo mester tin masha doló.

eme

Mi no ta keha, tio, ta mi kastigu meresí. Mi ke sufri mil be mas aínda pa Dios pordoná mi mi piká.

Mi no tin kun'es kiko pasa, basta mi por yega na haña konsuelo pa mi alma.

tio

Primintí Dios ku lo bo no peka mas.

Mi ta sigurá bo ku lo bo drenta reino di Dios, manera bo ta pidi.

Iglesia ta siña nos: Pa gana gloria puru di Dios, sòru pa bo tin un bon kontrisnon, maske ta na delaster momentu.

Pader Anselmo a kuhe su subrina hib'é serka e padernan di mas sabí ku tabatin na Corsou. Ma maske kon sabí i deboto non tabata, ora nan a tende e asuntu di Emè, nan no tabata tribi dun'é absolushon o penitensha pa su pikánan. I nan tur tabatin duele di Emé.

XVII. pader Anselmo ta biaha bai ku su subrina te Hulanda.

Komo e tempu ei no tabatin Obispu aínda na Corsou, Pader Anselmo a disidí di biaha bai te Hulanda ku su subrina pa purba haña pordon p'e serka Obispu.
Barku a krusa lamán, i despues di dos luna nan a yega Hulanda. Su manisé, bon tempran, Pader Anselmo a bisti paña manera ta misa e tabata bai hasi, el a kuhe Santísimo Sacramentu ten'é den su man, anto asina, na pia, e ku Emè su subrina a kuhe kaminda pa biaha bai serka Obispu.
Manuel, e demoño malu, a sigi nan di aleu, ma e tabatin miedu di yega serka, i e no a tribi mishi tampoko ku Emè, pasobra Santísimo Sacramentu tabata proteh'e.
Ma toh tin be e tabata ranka palu asina grandi ku raís ku tur for di den tera benta nan kun'é, pa purba mata nan. Ma Dios

[p. 59]

no a permití esei, pasobra tur dia nan tabata resa un orashon na honor di La Birgi p'e yuda nan.
Asina nan a kana biaha hopi dia, te nan a yega kaminda Obispu ta biba. Emè a bai konfesá serka djè. Ma Obispu no por a yud'é, pasobra su piká tabata asina grandi ku Obispu mes no tabatin poder di dun'é absolushon.

XVIII. eme ku su tio ta sali for di Hulanda biaha bai Roma, i aya Eme ta bai konfesa serka Papa.

Ora Pader Anselmo a tende ku Obispu no por duna Emè absolushon, el a despidí di dje, anto su manisé e ku Emè a sali Hulanda pa bai Roma bai konfesá serka Papa. Despues di un biaha largu, ku masha trabou, nan a yega Roma. Emè, ku awa na wowo, a bai serka Papa, bis'é:

eme

Santu Pader, ku ta para na lugá di Dios, manera Iglesia ta siña nos, no tin hende riba mundu ku ta mas kulpabel ku mi.

Mi tin miedu pa Dios no taha mi di drenta shelu pa semper.

papa

Pakiko anto, mi yu?

eme

Mi ta kambrada di diabel, mas ku shete aña kaba. M'a kompañ'é bai kun'é tur kaminda. Nos a biba ku otro! N' ta rason pa mi tin miedu?

papa

Kiko? Mi yu, ku diabel di den fiernu?

eme

Si, Santu Pader.

papa

I bo tabata sa, ora el a yega serka bo, ku ta diabel e ta?

eme

Sigur. Ta p'esei mes mi tin miedu asina.

[p. 60]

papa

Ta kon bo por a bai biba kun'é, na ora ku bo sa ku ta diabel e ta?

eme

Santu Pader mester sa ku el a laga mi biba manera un prinsèsè. Masha hopi plaka, masha hopi kos el a na mi. Anto el a siña mi hopi kos tambe ku ningun hende no sa. Ta p'esei mi a hasi tantu malu asina, maske awor mi mes tin fis. Ki ku m'a pensa, el a na mi, el a hasi pa mi. E kos ku ta na mi mas duele aínda, hasi mi mas flihido, ta ku masha hopi hende a haña nan morto pa nos falta, tur kaminda ku nos a pasa. Mas ku dos shen hende, Santu Pader, nan a mata pa mi via den e shete añanan ei.

papa

Santísima Trinidad! Bo mester ta biba masha spantá berde ku tantu piká asina.

eme

Santu Pader, konsehá mi kiko mi hasi, si ta posibel. Duna mi un bon penitensha, promé ku nos bolbe aki for. Mi no tin kun'es kon duru e penitensha ta.

papa

Apenas mi ta tribi pidi tantu miserikordia di nos Señor. Biba ku diabel!

Nunka nan no a bin konfesá un piká asina serka mi. Anto aínda kausa morto di hopi hende. Mi no sa ki penitensha basta duru mi skohe pa un akshon malu asina.

Biba ku diabel, ni kachó!

(Mi Dios, ku bo grasia no tin fin, konscehá mi kiko mi hasi den e asuntu aki.

Mi ta sintí mi kargá. Abo, ku ta e Hues di mas hustu ku tin, inspirá mi for di shelu... Warda!... Awor mi ta korda...)

Hesú ta duele si bo alma mester bal perdí... yama e pader ku a bini ku bo, anto lo bo tende bo penitensha.

[p. 61]

eme

Unda tio ta?

tio

Ata mi aki. Kon a bai?

papa

Skucha mi bon. Ta duru pa un hende bai perdí, tanten tin un posibilidad chikitu pa e skapa. N' ta kos ku Dios tampoko lo laga asina asina.

Ata aki tres renchi di heru. Esun di mas grandi bo tin ku ser'é rond di Emè su garganta. E dos sobránan sera nan na su pols, pertá pertá, ku nan no por slep afó.

E mester karga e renchinan ei te ora nan gasta, kita kai di nan mes. E ora ei tur su pikánan lo ta pordoná.

Tanten no yega asina leu, e no ta liber di piká.

tio

Ma Santu Pader, mi ke ku ta masha hopi aña mes tin ku pasa promé ku e renchi nan ei gasta te kita kai di nan mes. Nan ta masha diki, pisá. Ni te aki shen aña.

papa

Ta asina e tin ku haña pordon. E tin ku hasi penitensha. Te dia e renchinan kai for di su garganta ku su man. Ma korda bon sera nan pertá pertá.

tio

Ta bon, Santu Pader. Lo mi laga sera nan pertá, ku nunka mas nan no por los, si no ta pa obra di Dios mes.

Sea asina bon di laga nos bolbe bai nos tera awor.

papa

Dios den Shelu hasi bo sufrimentu dia pa dia menos duru pa bo, mi yu.

eme

Ayó, Santu Pader.

papa

Dios yuda bo. I korda hasi bo penitensha ku firmesa.

Pasobra pa shelu ta penitensha ta konta.

Penitensha ta kura hopi doló, hopi tristesa.

[p. 62]

Asina anto Emè a risibí su penitensha for di man di Papa. Su tio mes ora a laga sera e renchinan asina duru na su garganta ku su mannan, ku nunka mas nan no por a los, si no ta Dios mes ha si milager.

XIX. eme ta bolbe for di Roma. E ta bira soeur den un kombentu pa muhe komberti na Cuba

Ora nan a kaba di bisti Emè e renchinan, manera nos a konta kaba, el a sali ku sa tio for di Roma bolbe bai Hulanda, kaminda nan a kuhe barku pasa laman. Nan a baba na Cuba, kaminda Pader Anselmo a yuda Emè pa e bira soeur den un kombentu pa muhè komberti. Despues Pader Anselmo so a sigi pa Corsou, i aki el a biba 24 aña mas. Ma tur aña e tabata bai bisbitá sa subrina na Cuba.

XX. un angel di senor ta kita Eme su renchinan.

Emé bibá den e kombentu na Cuba, tabata komport'é asina santu, i tabata hasi asina tantu penitensha, ku Cristu nos Señor a pordon'é tur sa pikánan, i a manda su angel serka dje, ora e tabata drumi.
E angel a los e renchinan kita nan.
Emè a bira masha kontentu. Asina el a bisa ora el a lanta for di soño:

eme

Nochi largu nunka no ta dushi
pa un hende ku su kurason ta tristu.
Ni den soño e no por haña su sosiegu.
E ta soña kos horibel pa spant'é.
Ken tin ku por na mi un splikashon
di e soño ku mi ta'a tin ayera nochi?
Ta manera fo'i den fiernu nan a saka mi.
Nan a karga mi te na laria, te na shelu.
Paloma blankunan a bula bin kontra mi,

[p. 63]

ku nan ala nan a kit'e renchinan.
Ma ta kiko esaki, ay mi Dios stimá,
ta pordon mes bo ker a duna mi?
Ata e renchinan a kai, mira!
Ata nan aki band'e mi.
Dios, ku a skapa mi for di tur peliger,
nunka hende no por gradisi bo basta.
Mi rumannan yen di falta, yen'i piká,
tuma ehempel na e kosnan ku a pasa mi.
Alabá Dios todopoderoso
ku e poko forsa ku nos tin den nos.

Manera nos a konta, e kosnan aki a sosedé, maske hopi hende no ke kere. Si kualke dia boso bai Cuba, bishitá e kombentu di muhénan kombertí, i aya lo boso mira unda Emè ta derá.
Riba su graf tin e tres renchinan kologá.
Bou di e renchinan tin skirbí ku bunita léter:
ki bida di penitensha Emè tabatin den e kombentu, i tambe ta den ki tempu e kosnan aki a pasa. Pa mi ta was ku basta prueba ku ta berdad. Emè a sigi biba dos aña was despues ku su renchinan a kai, asina nan a konta mi.
Henter su bida el a sigi hasi penitensha, i el a purba semper di kuwpli ku Dios su Boluntad.
Laga nos korda kiko e historia aki ta siña nos, pa un dia nos tur gana gloria, Amen.