|
| |
| |
| |
Ornelio Martina
Poësía
Hunta realidad y fantasia
Pe por stop di hacimi dué
Numa alivia mi curazon...
| |
| |
| |
Serenade
Si flornan bao'i mi alpargata
Y na mi boca un tiki biña
Pasobra mi alma ya no conoce
Placer, ni simpel alegria mas
Y mi mente ya tar tur trocé
Si dolornan fuerte por matami
Ma no ta hacié pa tormentami
| |
| |
| |
Flor bunita
Flor preciosa, flor bunita
Bo ta un caricia pa tur bista
Cu ta warda mi lombrishi,
Bo n'ta crece na abundancia
Paranan ta bebe bo dulzura
Cu frieldad di anochi a laga.
No a ser poné na un santo
| |
| |
| |
Mi kier scribi un poesia pa bo
Mi kier scirbi un poesía pa bo
Un poesía cu lo existi un eternidad
Un poesía cu lo tin e buniteza di e flornan
Cu tin ora e tera secu di mi aqui sa pari
Cu lo tin e forza gigantesco dje barancanan
Contra cual e ola brutunan sa bati
Cu lo tin e ternura di un niño den su cuna
Y e paz cu mi sa haña anochi den e luz di luna
Cu lo tin e boz cu melodia di cancion
Cu cual paranan den laria sa alaba bo.
Y tambe e tristeza di un curazon
Mi kier scirbi un poesía pa bo
Un poesía cu o existi un eternidad.
| |
| |
| |
Queda quetu curazon
Di mi parti si mi n'acercele.
Sa ponebo bula di alegria
den e cauchi di mi pecho.
E n'sa cu den anochi streanan
tin e buniteza di su wowonan.
E n'sa cu nos sa yora di amargura
Pa motibu di nos mes locura.
Di un flor e tin e ternura.
Y tambe su bunita nomber.
| |
| |
| |
Condena
Pa sconde heridanan di un gran dolor.
Pakiko den tantu cu a cruza mi caminda
Di tantu cariño cu mi por a hanja
Net é mi ta'tin di anhelá.
Net é cu nunca lo por bin stima mi
Cu e fervor di un oracion
Cu nuca lo lagami descansá
Na e fogon di su curazon.
Cu na lugar di nami e sunchi
Pa haci un milager di mi bida
Ta batimi cu su indiferencia
Kibrami toer na pida pida
Scirbiendo poesía di amor
Pa sconde heridanen di un gran dolor.
| |
| |
| |
Oracion di mucha
Bo angelnan io bin wardami.
curi dal den un palu kibra
E doño mester di un bon castigu
M'a tende mi mamachi pidi
Pa Chichi haña un yoncuman
Ma mira Boy ta sunchi Chichi
Y Papa Dios un cos secreto
Mi ta pidiele quetu quetu
E vaas den sala a cai kibra
Min n' por juda Papa Dios
Cu guma 'i flie m'a plake atrobe
| |
| |
| |
Jioe perdi
Biba den placer y den locura
Mi ta'tin un pleitu cu mi mama
Ainda e boz temblando a keda zona
‘Mi jioe...’ sobrá min rende mas
Yen'i flor, amor, felicidad
El a 'nami gozo di paranda
Pa despues ora yen'i berguenza
Mi busca loco un compañero
Mi unico amigu, su nomber ta tristeza
El a ofrece mi mil piacer
Y djey hartami sin piedad
Cu su bullpez di enfermedad
Pero awor m'a bolbe, mama
Pa nabo bek bo jioe perdí
Sconde mi cara den bo scochi
| |
| |
Sinti bo mannan cariciami
Y na lugar di bo zundra mi
Tende bo palabra di consuelo
Y pidibo: ‘Mama, mama, pordonami’
Pero... tempu ami bon golos
a hocha den placer di mundu
E muhé santu, yen'i bondad
Cu m'a haci mama'i un vagabundo
Y awor, unda, unda lo mi haña mi pordon
Unda un tierno y comprensivo curazon
Ay mama lagami alcansabo cu mi boz
‘Mama pordonami, pordonami mama!!’
| |
| |
| |
Corsow, mi pober tera
Nan ta yamabo un baranca chiquito
Scondi den inmensidad di un laman
Nan a lubida cu grandeza di alma
No por ser midi cu plant'i man
Nan di bo paisahe ta mahoso
Y masha pober bo naturaleza
Nan no t'aqui ora awacero
Yena bo cunucu cu belleza
Nan n'por mira e buniteza
Cu nos barancanan di costa
Ta bringa stret bai cu laman
Na un atardi quetu y suave
Na un corason, corá di amor,
Nan ta yama nos pueblo floho
Hende cu'n ta gusta traha
Ta traha, mata e pober curpa
Cu ta bai foi cas prome cu solo
Pa e por maske ta come bon
| |
| |
Pa nan nos no por tin cultura
Ni musica, arte, ni grandesa
Ma ta nan mes t'asina heblèndu
Asina siega pa nos riqueza
Cu nan n'por mira e aprecio
profundo y yen di sentimento
Pa cos cu realmente ta di nos
Te hasta tin ora nan ta bisa
Cu nos no tin ni religion
Ta bon cu Dios si den su sjelu
Sa scucha nos den oracion.
Corsow, Corsow mi pober tera
Bo jioenan si lo no por sera
Nan curason pa bo grandeza
Nos si lo sa di apreciabo
Y nos lo tei pa defendebo
Te ora nos bin drumi den bo scochi
Maske ta palunan di Indju lo conta
Di e jioenan, cu tantu a stimabo.
| |
| |
| |
Jioe di Corsow
N'e baranca cu ta bringa cu laman
Y tin ora den locura e ta zundra tur esnan
Cu riqueza di su isla a atrae
Ta manera e sa cu si algun dia
Toer esnan cu a probecha tambe laga cai
Y su lugar ta henteramente bandoná
Manera un fiesta cu a caba mardugá
Cansá l'e pone su cabez abao
Bisando: mi si n'por bandonabo mi Corsow
| |
| |
| |
Corsow no bai
Na lugar di mi camisa'i fantasia,
Un tuxedo, preto y blanco, morto.
Na lugar di un bon tambu exótico,
Na lugar di cana dal mi bitter
Arami den un club yen'i hende stranjo
Y e cosnan aki, no di mi tera,
Na mi coerason ta hasi daño.
Mi Corsow bo ta cambiando
Bo edificionan a cai pa cas
Moderno y nomber di bo cayanan
Mi Dios ta cua ta nos picánan
Cu ni awacero mas ta yobe,
Cu nos por tin un símidán
Un fiesta di nos mes atrobe
Lugar yen di cos cu no mira luz
Yen'i baila, rom y zundramentu
| |
| |
Bo ta cambiando mi Corsow
Bo gozo, bo placer, bo alegria
Bo hendenan, bo bida y existencia
Bo morto, bo tristeza y ochodia
Te hasta e lenga dushi Papiamentu
Cu cua nos mama a caricia nos for di mucha
Den cua nos tur a siña namora
Pa doené un lugar mester di lucha
Mi sabi, mi'n por pone solo para
Ora e ta bai baha den e laman pabao
Pero lo mi reza te awa baster foi mi wowo
Corsow no bai, no bai Corsow!!
|
|
Auteursrechtelijk beschermd