Het Antwerps Liedboek. 87 Melodieën uit 'Een schoon liedekens-boeck' van 1544. Deel 1. Liederen
(1975)–Anoniem Antwerps liedboek–
Auteursrechtelijk beschermd
[pagina 190]
| |
Vanden Landtman1.
Ga naar margenoot+ Laet ons den landtman loven
Met sanghe ende vruecht,
Want hi gaet al te boven
Om sijn loyale duecht.
Landouwen, sloten, steden,
Daghelijcx spijst ende voet
Met sijn sweetighe leden
Den edelen landtman goet,
Daert al by leven moet.
| |
[pagina 191]
| |
2.
Hertoghen, Princen, Graven,
Sullen si zijn ghespijst,
den landtman moet beslaven:
Thes recht datmen hem prijst.
Als heeren triumpheren
En schaffen huypschen moet,
Men siet hem laboreren
den edelen landtman goet,
Daert al etc.
3.
Ga naar margenoot+ Elck doet den landtman toren,
Waer hi sayt ende plant:
die mollen, blint gheboren,
wroeten naert hem meest meshant;
die coeyen, schapen, en swijnen
die comen metter spoet
En doen zijn vrucht verdwijnen,
den edelen landtman goet,
Daert etc.
4.
Vrou Venus' lacke dieren
Die doen hem groot gequel:
Sijn vruchten niet en vieren
Als si ligghen in haer spel.
Si stommelen ende si steken,
Al waren si verhoet,
Sijn coorne deerlijc breken,
den edelen landtman goet,
Daert etc.
5.
Elck besicht daer zijn clauwen,
Hoenders en voghels vry.
Men gaeter ter oeste houwen,
Hi en isser niet altijs by.
Men soude qualick gheloven,
Hoe menich ontschamel bloet
Trecken en teesen uut zijn schoven,
den edelen landtman goet,
Daert etc.
6.
Dan is hi van die papen
Om zijn thiende ghequelt;
die costers staen en gapen
Om eyeren, schooven, oft gelt;
Susters ende baghijnen
Om hebben elc hen groet.
dus laet hi vanden sijnen,
den edelen landtman goet,
Daert etc.
7.
Mulstooters met haer rijven
Om kiekens, koorne en vlas
Connen wonder bedrijven;
Die vier oordenen op dat pas
Willen hem Gods rijcke verleenen
Met huer bedinghe soet,
Mer tes hebben dat si meenen
vanden edelen landtman goet,
Daert etc.
8.
Die jaghers en serganten
die zijn oock geerne verblijt,Ga naar margenoot+
Want si hem voor terwanten
En boeven hebben bevrijt.
Den molenaer vanden mele,
Als hi ter molen doet,
Schept diepe, God weet hoe veele,
Vanden edelen landtman goet,
Daert etc.
9.
Vossen, fissauwen, fluwijnen
doen zijn hoenders en ganssen stoot;
die wolven, wreet om schouwen,
bijten coeyen en schapen doot.
Wesels suypen, so si pleghen,
Sijn eyeren onghebroet.
dus commet hem alle tseghen,
den edelen landtman goet,
Daert etc.
10.
Christus, die tonser vrame,
Ter eeren den landtman fijn,
Sijn bloet ende lichame
Schanc onder broot ende wijn
En als hi was verresen
Quam als een landtman vroet,
Moet in zijn hulpe wesen,
Den edelen lantman goet,
Daert al bi leven moet.
|
