Tvoyage van Mher Joos van Ghistele

(VIII, 32) [De schat van de San Marco in Venetië; het wapenarsenaal van Venetië; terug naar Vlaanderen]

Binnen den tijde dat zij daer aldus stille laghen, soliciterende haer zaken, midts zeker kennesse van diverschen cooplieden die zij inde landen van over zee ghezien hadden, ende midts kennesse die zij te vooren hadden eer zij van Venegien vertrocken, was hemleden ghetoocht eensdeels vanden scatte ende cleenhede van Sente Maerck, ende seker secreten der stede anclevende.²⁵³ Ten eersten waeren hemleden ghetoocht twaelf parceelen van fijnen goude, ghenouch tfautsoen hebbende als borstplaten van ouden tijden, waer of de boorden rontomme verchiert waeren zeer costelic van diverschen ghesteenten, als saphieren, roobinen balaisen, ammirauden ende rijckelicke groote schoone peerlen zonder ghetal, compas- ende blomwijs ghestelt naer heesch van weercke, ende up elcke borstplate stont vaste ghemaect een groot exel, elc hebbende inden middel eenen grooten balois, zeer costelic bezait bladerwijs met grooten, (folio.CC.lxxiiii) schoonen, costelicken peerlen als eerweten. Zij saghen ooc tien croonen van fijnen goude met tacken, dewelcke alle verchiert waeren compas- ende rooswijs met costelicken ghesteenten

253 Met de laatste zinsnede is de inrichting van het Venetiaanse arsenaal bedoeld. Zij wordt in het volgende capittel beschreven.

[p. 416]

ende peerlen, als de borstplaten voorscreven of naer extimacien costelickere. Boven desen saghense noch een barette vanden welcken den boort zo costelic ende rijckelic verchiert was met ghesteenten ende grooten fijnen peerlen, dat niet mueghelic en waere de gheheel weerde te extimeren.²⁵⁴ Item voort saghen zij twee candeleers groot ende dicke, van fijnen goude zeer costelic ghemaect, elc hebbende boven menichte van cleenen inghelkins, waer of de viere van elcken candelare hilden in haer handen roedekins van goude als banierkins, ende up elc roedekin eenen robijn balais alzo groot als een ghemeen okernote. Inden midden vanden inghelkins voorscreven stont up elcken candelare eenen inghele wat meerdere dan dandere, ooc houdende in zijne handen een roede van goude als een baniere, ende up elcke roede eenen robijn balais alzo groot als een duven ey, ende an elcke twee groote peerlen zeer schoone, ghenouch tfautsoen hebbende als eeckelen, zo groot als een redelicke azelnote. Zij saghen ooc twee candelaers betrent drie voeten lanc, zeer zwaer, ende costelic ghewrocht van fijnen goude, maer daer en waeren peerlen noch ghesteenten an. Item insghelijcx saghen zij eenen grooten kilct, zeer zuverlic ghewrocht van fijnen goude, hooghe ontrent onder halven voet. Voort saghense twee goudin wierooc vaten, zeer constelic ghewrocht, met grooten ketenen van goude, zeer ghenoughelic an te ziene. Daer waeren ooc vier cruchen, lanc ontrent drie voeten int viercante, van fijnen goude zeer massijts ghemaect, van welcken de twee hadden inden middele elc eenen cammahieu alzo groot als eenen redelicken appele. Item hemleden wart ooc ghetoocht eenen eenhooren die zeer vreemde was te ansiene, lanc naer extimacie meer dan een vademe, ende veil meer ander juweelen, te lanc om scriven, waeren hem (274v) lieden ghetoocht.

254 Bedoeld is de hertogelijke beretta.