Tvoyage van Mher Joos van Ghistele

(VI, 13) [Via Hama naar Antiochië]

[G]hevisiteert hebbende de voorseyde devote plaetse, schieden van danen, voort rijdende altoos beerch ende dal eenen langhen wech toot eenen doorpe van wonderlicker situacien, meest al bewoont van kerstenen, ghenaemt Maloule,⁷⁰ ligghende in eenen spriet oft scaert van eender steenrootsen, zo hooghe datmer ten tween reysen met eenen boghe niet up schieten en zoude, ende over de slincke zijde es tprincipael vanden voorseyden dorpe van onder anden voet toot boven up dupperste vander steenrootsen; de straten zijn trapwijs ghemaect, deen boven den anderen, zo dadt onmoghelic schijnt van beneden te siene datmen van eenen ten anderen gheraken mach, ende over de rechte zijde hebben ooc in tijden voorleden ghelijcke edificien ghestaen, nu alle te nieuten, mids dat daer de steenrootse van boven neder ghevallen es, (298v) maer noch ter tijt zo sietmer de oude ruinen van eender keercken, ghesticht inde eere van Sancta Tecla, die daer ooc begraven wart zomen seit. Ende wat diepachtich inde zelve rootse staet alnoch een maniere van eenen ronden backe daer in al twater vergadert dat uuter steenrootsen drupt, dwelc daer ghehouden werdt voor zeer medicinael jeghens de cortsen ende alle coude ziecten, zo datmen daer seit, dat alle de ghone die zulcke siecten hebben, tzij heydenen oft kerstenen, ende daer inde steenrootse eenen nacht slapen, nuchteren drijnckende van dien watere, ter stont ghenesen worden. Recht int houcxkin ende int sprietkin vander voorseyder steenrootsen es eenen wech zeer smal, beneden lancx den bodem ende gronde dweers duer den voornoemden beerch wel eene

70 Ma'lûla, gelegen aan de meest oostelijke bergkam van de Anti-Libanon.

[p. 305]

mijle lanc loopende, ende es open van beneden toot boven up dupperste, zo steil oft al met beetels ghehauden ware, maer ten diversschen plecken staen zommeghe plaetsen, wijt drie oft vier vademen, om de passanten ende gheladene beesten deen den anderen te moghen lijdene, daer men inde rootsen over beede zijden siet vele diepe viercantte gaten ende holen, twelcke men seit alle sepultueren zijnde, daer in als noch zomen daer affirmeerde eeneghe doode lichamen ligghen al gheheel zonder ghecorrumpeert te zijne, dwelc wel te bemoedene es dat lichamen zijn van devoten persoonen, in ouden tijden daer gheconverseert ende ghewoont hebbende, ende zo daer begraven, (299r) ende ghenouch in midden vanden voorseyden weghe loopt lancx henen eene schoone fonteyne die al tvoorseyde doorp, alle de bogaerden ende lochtinghen daer omtrent gheleghen ghenouch watert.