Tvoyage van Mher Joos van Ghistele

(VI, 14)

[V]ertreckende vander voorseyder plaetsen, zo rijdtmen noch altijts beerch ende dal zo lancx zo zwaerdere, al meest onvruchtbarich, lettel doorpen onder weghe vindende, ende langhe zoo ghereden hebbende, comtmen teenen schoonen dorpe, ghenaemt Agerout,⁷¹ gheleghen in eene schoone valleye daer vele goets wijngaerts omtrent wast, meest al bewoont van kerstenen maroniten. In midden van desen dorpe plocht in tijden voorleden te stane eene schoone kerstene keercke met velen schoonen colummen van witten marber steenen, maer de zelve es nu bijden heydenen al te nieuten ghedaen, ende hebben de colommen ghenomen ende daer mede doen maken een schoon chaen, dat eene herberghe es ghelijc den anderen vooren gheseit. Noch voort rijdende, latende tvoorseyde duerp, zo wordtmen weder van nieus clemmende in noch zwaerder ghebeerchte dan vooren gheseyt es, int welke het den meesten tijt vanden jare wonderlicke cout es boven maten, (299v) zo datter eeuwelic, winter ende zomer, de sneede leyt, ende vriester met allen zeere inden winter, principalicken des nachts. Dit ghebeerchte omtrent der voorseyder plecken es meest al bewoont van kerstenen maroniten, die den voorseyden wonderlicken groote chiere daden, hemlieden gheleedende eenen langhen verden wech duer tgheberchte, dwelc daer diverssche namen heeft, als tghebeerchte van Lybano, van Caym, Sardenay, Carra, Tripolij, Surien, Maloule, van Balebec, ende meer andere namen naer de plaetsen ende steden daer rontomme an ligghende, te lanc hier om scriven. Item omtrent desen voorseyden ghebeerchte, niet verre van Balebec, plocht te stane eene groote stede, ghenaemt Bosree, nu gheheeten Bosseres,⁷² in zeere drooghe maertse gheleghen, lettel waters oft gheen daer omtrent wesende, dan datmen vergaderde vanden reghen ende snee water, uuten beerghen vallende in zekere putten ende cisteernen daer toe gheordonneert, dwelke ghebuerde in zulker overvloeyenthede, als dat alle de inwoonders daer bij haren nootdorst creghen, maer es nu al te nieuten zo datmer anders niet en siet dan groote hoopen van steenen. Dus dit voornoemde ghebeerchte omtrent vier dachvaerden ghereden hebbende, comt men toot eender grooter planure daer een schoon chaen staet, maer es al vervallen, an welc chaen vergadert den wech van Carra ende van Balebec daer vooren af gheseit es, die de voorseyde niet rijden en dorsten, zo dat de drie weghen

71 Jerûd.

72 Bcharre.

[p. 306]

van Damasco naer Alepo daer in een versamen. (300r) Voort rijdende duer de zelve planure eenen verden ende langhen wech, lettel dorpen oft negheene onder weghe vindende, anders dan sommeghe huttekins van baudewijnen ende Turckemannen hier ende daer woonende, dat een zeer quaet gheselscip es, zo comt men teender schoonder stede, ghenaemt Hooms,⁷³ ligghende ten platten velde, zo datmer van allen zijden spoorslaeghs toot ande vesten zouden moghen rijden. Dese stede es vele langher dan breet, vander groodtten dat Ypre es in Vlaendren, ende heeft in voorleden tijden zeer wel bevest ende bemuert gheweest, maer nu ter tijt zijn de vesten al ghevult ende de mueren te velen plecken vervallen, zo datmer ten hondert steden uute ende in gaen mach. Ende over de zijde zomen van Damasco daerwaert comt, staet een steerc casteel boven up eenen beerch, dwelc mach omtrent een half boochschoote lanc zijn ende een half boochschoote wijt, rontomme bemuert stedewijs, met vele steercken torren inde mueren staende, binnen met schoonen woonsteden, ende leyt dit zelve ghenouch met eender halver mane an ende inde stede, maer beghint nu ter tijt zeere te vervallene ghelijc de stede doet. Tvoorseyde casteel staet up eenen beerch wel eene booghschoote hooghe, ronts omme bewatert met diepen graven, ghemetst van beneden toot boven met grooten steenen, altijts noesschende dacwijs, zo steil datter nauwe een catte up gheclaueren en zoude. Ende up de luchter zijde der zelver stede, ooc zomen van Damasco comt, leyt eene strepe van lande omtrent een half mijle lanc van schoonen lochtinghen ende bogaerden, (300v) maer gheene boomen noch fruyt en es daer omtrent; daer en es ooc gheen overschot van watere, nochtans dadt anders rontomme eene schoone maertsse es. De zelve stede es zeere qualic bewoont, uut causen dat daer lettel coopmanschepen regneert, de lieden meest levende up hare beesten, hemlieden ghenouch houdende naer de maniere vanden Arabianen. Daer woonen ooc wat kerstenen, maer niet vele, hebbende eene schoone keercke ghesticht inden name der veertich maertelaers vanden beerghe van Synay van welcken vooren gheroert es.⁷⁴ Ende in alle die maertsen in wat plaetsen dat zij, zo en zijn de kerstenen vander obediencien der Keercken van Roome nieuwers zo zeere ghehaedt als daer.

73 Homs, 140 km ten noorden van Damascus.

74 Zie Tvoyage IV, 10.