Tvoyage van Mher Joos van Ghistele

(IV, 4)

[D]us scheedende van Souwees daer nu af gheseit es, zo laetmen ter rechter hand zuutwaert tgroote ghebeerchte daer ooc vooren af ghesproken es, inde welke dat staen de (230v) cloosters van Sente Anthuenis ende Sente Pauwels deerste heremiten,²¹ omtrent vijf dachvaerden vanden voorseyden dorpe, up eene dachvaert naer der Rooder Zee ende omtrent drie dachvaerden van Nilus, ende zo rijdende comt men weder toot up de Roode Zee, daer men vindt alte groote menichte van roosen van Gerico, zo datse de kemels ende andere dieren afweeden ende heten, de welke men nieuwers meer ter weerelt en vint wassende dan ter zelver plecken ende up den wech van Jherusalem naer Alkayeren, aldaer Maria de ghebenedijde moeder Ons Heeren quam rijdende, ghevlucht uuten jootschen lande naer Egipten met haren Zone uuter vreesen van Herodes.²² Dus langhe ghereden hebbende, latende de Roode Zee ter rechter handt, zo comt men teender plecken daermen vindt, ooc over de rechte zijde des weechs, diverssche water putten wat verscheeden staende, de welke bobbelen rechts oft eenen pot ware die zode, maer es nochtans cout ende goet drinckelic watere, anders dant wat steenachtich smaect naer den gront, ende bij speciale esser eenen put niet zeer diepe zijnde, zo vlac datter de dieren wel uut drincken zonder in te gane, den welken uut neemt van bobbelen zo dat hij suverlic overloopt.²³ Twater neemt zijnen cours ter Rooder Zee waert, maer alst zo gheloopen heeft vier oft vijf boochschoten, zo verlieset ende verswelghet hem zelven in deerde, gheen bescheet en can mer meer af ghesien anders dan dat de eerde wat natachtich schijnt. Eeneghe zegghen (231r) dat dat water comt uuter Dooder Zee, zoe duer deerde gheloopen toot inde voorseyde wateren, ende dat hem daer eerst toocht ende zoe weder verliest inde Roode Zee; dit voorseyde haut ooc Petrus de Aliaco voor eene opinie.²⁴ Item dese voornoemde putten plaghen te heetene de Wateren van Marach, die zo quaet ende bitter waren datse de kinderen van Ysrael niet ghedrincken en consten, bijden welken Moeyses een haut daer in leyde daer mede de voorseyde wateren goet ende zoete worden om drincken, zo van al desen breeder ghescreven staet int bouc van Exodo int vijftiende capittel. Item eene goede recke van desen voorseyden wateren up de zee, zo siet men een doorpkin, ghenaemt Mabelouc, dat ooc een havene es; dats de zelve plecke daer de kinderen van

21 Zie aant. III, 140.

22 De zg. jericho-roos (Anastatica hierochuntia) groeit in groten getale in Arabië, Egypte en ten zuiden van de Dode Zee, maar juist niet bij Jericho (Warburg, II, 83-84). Naar de middeleeuwse opvatting bloeide hij ook langs de vluchtweg der H. Familie naar Egypte. Zie bv. Ludolf van Suchem, cap. 36.

23 Dit zijn de zgn. Bronnen van Mozes ('Uyun Mûsa), 15 km ten zuisoosten van Suez.

24 Pierre d'Ailly, Ymago mundi, I, 53.

[p. 241]

Ysrael eerst quamen als zij duer de Roode Zee ghecommen waren, ghevloden zijnde uuten lande van Egipten, zo van al desen ooc breedere bescheet staet int zelve bouc van Exodo in vele diverssche capittelen.