Tvoyage van Mher Joos van Ghistele

[p. 236]

[Boek IV Arabië]

(IV, 1) [Van Cairo, via Suez, naar het St. Katharinaklooster in de woestijn van Sinai; de Rode Zee]

(225r) [D]us weder wat tijts te Alkayeren commen zijnde, zo begonsten zij haerlieder ghereetscip te makene omme te reysen naer tconincrijc van Arabia Felicx ende Arabia Petrosa, de welke eensdeels toebehooren den souldaen van Egipten ende eeneghe deelen den coninc van Aden, meenende van daer voort ghereist te hebbene naer de landen van Nubien, Abassien ende Ethiopen, welc Abassien Hoogh India ghenaemt es, daer de pape Jan dominacie heeft ende daermen versouct den heleghen apostel Sente Thomaes.¹ Ende alle ghereetscepe ghemaect hebbende bijden advijse vanden cooplieden aldaer, zo namen zij eenen trousseman van dien lande, kersten jacobijt zijnde, wel Ytaliaens ende heydens sprekende, die van joncx metten cooplieden verkeert hadde, hem toelegghende de maent een zeker ghelt, hemlieden (225v) beradende met den zelven om hare reise ter executien te legghen, ende versaghen hem eerst van goeden, ghetrauwen gheleetslieden ende mockers,² van goeden dieren als kemels, mulen daer zij up rijden ende hare provande up voeren zouden, ende voort al tghuent dies hemlieden up den wech zoude moghen behouven. Item zij voorsaghen hemlieden ooc van goeden bisquijte, van mele, case, aizijne, van goeden houderen - dat zijn gheete vellen omme wijn, watere ende andere drancken in te doene - van goeder tiriakele jeghens tfenijn,³ diesmen daer inde deserten vele vindt, van drooghen fruyte, amandelen, zijtroenen, meloenen, limoenen, fighen, rosijnen ende van goeder olien van oliven, insghelijcx van goeder soropen, van veel sukers, van suker rosarum ende suker candijs om mede te verversschene, ende finalic van allen dies hemlieden onder weghe soude moghen behouven. Al ghereet zijnde, wel wetende datter eene carevane - dats een gheselscip van cooplieden met haerlieder goede - up haer vertrecken was, wel groot zijnde tusschen den xv ende xvi^c beesten al gheladen, als kemels, drommedarissen, mulen, ezels ende peerden, de welke wesen woude naer eene coopstat, ghenaemt Altoer,⁴ up de Roode Zee gheleghen, dat ghenouch den wech es die de voorseyde wesen wilden, ende wetende den tijt vanden vertrecke, purrenden twee milen buuten Alkayeren te vooren, daer verbeidende tgroote gheselscip omme met hemlieden duer te reysene toot daer haerlieder wech scheeden zoude, om te schuwen de (226r) dangieren die daer onder weghe gheleghen zijn met cleenen gheselscepe rijdende.

1 Zie de aant. I, 2; III, 75; II, 5.

2 Zie aant. I, 16.

3 Theriak werkte immers op homeopathische basis; cf. aant. III, 111.

4 Zie aant. I, 7.