Tvoyage van Mher Joos van Ghistele

(III, 32)

[C]ommen zijnde inde stede van Damiaten, zo logierden zij ten huuse van een vanden cooplieden daer mede zij commen waren, hemlieden doende groote chiere ende goet gheselscip, ende en mochten niet betalen. Binnen der tijt dat zij daer sejournerden, worden zij gheleedt in twee schoone kerstene kercken, deene ghehouden vanden jacobiten, ghewijt inde eere van Sent Jooris, ende dander ghehouden vanden Griecken, ghewijt inde eere vanden prophete Jeremias, daermen seit dat Jeremias ghesteent (207v) wart ende begraven, maer tes bet te gheloovene dat Sente Jeronimus seit in Prologo super Jeremiam.¹⁶⁰ Te wetene dat de zelve prophete eerst ghesteent was ende begraven in een stede, ghenaemt Tannis, niet zeer verre van Damiaten. Item dese voorseyde stede heeft in tijden voorleden zeer steerc ende machtich gheweest, zoo dat zoe plocht thebbene drierande vesten ende mueren in manieren van fousen brayen,¹⁶¹ van welken duuterste de neerste waren, zo dat deen dander bescudde. Ende hadde acht ende twintich principale torren zeer dicke ende steerc, elc hooghe drie oft vier vouten, deen boven dandere. Men seit ooc, dat inde voornoemde stede plaghen te woonene bijden hondert duust mannen persoonen, maer nu ter tijt en heeft zij noch mueren noch poorten

160 Een onjuiste verwijzing. Hieronymus zegt noch in zijn proloog op Jeremias' profetieën (P.L. 28, 847-850), noch in zijn proloog bij zijn commentaar op Jeremias (P.L. 24, 679-682) ook maar iets over de dood en de begraafplaats van de profeet. Maar wellicht is het zo dat Zeebout hier de mededeling van Jacob van Vitry over de steniging van Jeremias in Tanis heeft overgeschreven (Hist. Orient., p. 1144) en diens verwijzingen naar Hierem. (d.i. Jeremias) heeft gelezen als Hieron. (d.i. Hieronymus).

161 ‘Gracht-wallen’ (ofr. fouse: gracht; ofr. braie: wal, dijk). De mededelingen in deze en in de volgende zin zijn ontleend aan Jacob van Vitry, p. 1142.

[p. 212]

ende leyt open ghelijc meest alle de plaetsen doen in dien landen, staende als nu toot eender ander plecken dan zoe plach te stane, want in ouden tijden zoe up de zee stont thenden vander voorseyder rivieren. Ter welker plecken als noch staet eenen torre over de zelve zijde daer Damiaten nu leyt, inden welken men ooc eeuwelic wake houdt dach ende nacht, ende zo wanneer dat de wakers eeneghe scepen vernemen, dan gheven zij teecken hoe vele scepen datter commen, om dat elc up zijn hoede wesen zoude; de souldaen heeft den landslieden gheconsenteert, die onttrent de zee woonen in cleene doorpkins, dat zij vlien ende rumen moghen, zo wanneer zij meer dan veertien scepen vernemen, maer alsser eeneghe scepen commen (208r) onder den xiiii, dan en moghense niet vlien noch rumen up groote verbuerten, m[ae]r moeten hemlieden ter weere stellen. Ende alle die woonen in vermaerde plaetsen en moghen ooc niet vlien, maer moeten weere bieden metten anderen; waert ooc zo, datter yewers eeneghe scepen an quamen ende de wakers bij haerlieder verswijmthede gheen teecken en daden, zouden de zelve wakers livelic ghepugniert worden, waer bij eeuwelic up de houveren vander zee goede hoede ende wake es.