Tvoyage van Mher Joos van Ghistele

(III, 31)

[D]esen eersten arem voorseit leden, zomen naer Tannis ende Faraminen varen zoude eenen verren wech, zo quamen zij te Damiaten die in voorleden tijden ghenaemt was Pelusium,¹⁵⁷ ligghende up de riviere ghestrect onttrent twee mijlen vander zee over de rechter zijde vanden tweesten arem ende loop van Nilus zomen den stroom neder comt, ghenouch in figueren van eender halver manen, zo Cuelen leyt up den Rijn, maer en es up vele naer zo groot niet, inde schoonste (206v) maertse diemen ter weerelt vinden mach, zo dat alle de vruchten, daer wassende, uutnemen van grootten, buuten anderen maertsen daer omtrent gheleghen.

157 Een onjuiste identificatie (het oude Pelusium lag niet, zoals Damietta, aan de westkant maar aan de oostkust van het Manzala-haf), maar ook bij Ptolemaeus, Geographia, IV, 5 heet het: ‘Pelusium civitas, Damiata hodie’.

[p. 211]

Ende up dhende vander stad ter zee waert, up elke zijde der rivieren, staet eenen viercantten torre met carteelen, ghenouch ghelijc de torren zijn te Venegen an tpoort, maer en zijn zo groot niet, tusschen den welken leyt altoos eene steercke, dicke kethene ghespannen dweers der rivieren, omme datter gheene scepen uuter zee onvoorsien int landt commen zouden, daer uppe altoos zijn van tsouldaens weghe vele lieden van oorloghen ende souldoyers. Ooc zo seit Vincencius in Speculo Historiali inden xxxi^en bouc int xii^e capitele,¹⁵⁸ dat die maertse daer omtrent plach te zijne dlant van Jessen, twelc vanden coninc van Egipten was ghegheven den patriarke Jacop ende zijnen kinderen, als voor talder vruchtbarichste vanden lande van Egipten; daer onttrent es ooc ghenouch ghetemperde lucht over een dant elders in Egipten es, want het reghent daer ghetijdeliker dant in anderen plaetsen doet. Es ooc daer omtrent habundancie van alderande zuvele, van zee- ende versch vissche, van alderande vleessche, vele ghevoghels tam ende wilt, ende wonderlicke vele cleene voghelkins; daer wast ooc vele goets wijngaerts; men vintter van allen ligoemenen, saladrien ende fruijtboomen diemen dincken mach, ende boven al vele van dien boomen die paradijs appelen draghen, diemen seit mousij;¹⁵⁹ (207r) ooc zijnder alle saken beter coop dan teeneghen plaetsen in al Egipten. De heydenen zijn daer ooc vele beter ende vriendelicker ten kerstenen waert dan in eeneghe andere maertsen. Omtrent deser voorseyder steden wast al te vele goets rijs, dwelc ghenouch groeyt ghelijc der havere in desen landen, ende wast ghemeenlic in nere, waterachteghe maertse. Wast ooc daer omtrent uutnemende vele sukers, dwelc ghenouch wast als groot ghelis, ende alsmen de bladeren aftrect, zo eist onder rechts oft pijpen van Spaensschen riede ware, maer de cnoopen en zijn zo verre deen vanden anderen niet, ende tusschen den cnopen inde pijpen zo leghet tsuucker.

158 Een onjuiste bronopgave welke zou moeten zijn: Spec. Hist., I, 123. Zie voorts Gen. 47:6.

159 Zie aant. III, 71.