Tvoyage van Mher Joos van Ghistele

(III, 30)

[N]ederwaert dus varende lancx der rivieren, houdende den aerm ende loop ter rechter hand, zo sietmen over beede zijden groote menichte van doorpen ende vele goets lands, mersschen, ghersinghen, saeyende land, lochtinghen ende bogaerden, zo dat een den ghenouchelicsten wech es diemen varen mach. Ooc zo vindtmen inden zelven wech groote menichte van heylandekins inde riviere ligghende, al meest bewoont, daermen up de ouveren siet vele van dien beesten die-

[p. 210]

men naemt coccodrullen daer vooren af gheseit es. Aldus altoos neder varende omtrent twee dachvaerden van Alkayeren, zo comt men an eenen anderen aerm ende loop, ooc uut brekende ter rechter handt, maer en es zo diepe niet te velen plecken men rijtter wel duere, welken aerm oft loop over de zijde te Alkayeren waert daer ghenaemt es Tanis, Carbee oft Carabuch.¹⁵⁰ Up desen voornoemden aerm oft loopt over de zijde te Alkayeren waert leyt (205v) eene goede plecke, wel bewoont, die te heeten plach Lamossore,¹⁵¹ daer ghebuert zijn alte vele strijden inden tijden dat de kerstene princen, naercommers van Godefroit van Bullion, besaten dlant van beloften. Ter zelver plecken zo ghebuerde de doloreuse bataille daer de coninc Lodewijc van Vranckerijcke de vierde,¹⁵² gheboren vanden gheslachte van Hughe Cappet, vanden heydenen ghevanghen wart, ende den meesten deel vanden baroenen van Vranckerijcke ende andere groote menichte van edelen mannen, ooc groote menichte van volke versleghen ende verdroncken, zomen dat int langhe bevindt inde Historie van Godefroit van Bullion,¹⁵³ bij welker dachvaert den meesten deel van alden lande van beloften ende van over zee weder in corten tijden quam inden handen vanden heydenen, uutghedaen de stede van Sur oft Tirus, die hilt haer noch langhe daer naer; dit ghebuerde int jaer duust drie hondert ende twee en vijftich. Ende ter stont als de heydenen Damiaten weder hadden, zo wierpen zij alle die schoone mueren ende torren ter neder inde riviere, omme dat de kerstenen, al waert dat zij daer weder quamen met machte, gheene steercte vinden en zouden. Item desen voorseyden aerm ende loop, die gaet te Tannis, datmen daer naemt Tijnees, ende te Faraminen¹⁵⁴ toe, maer de souldaen en wilt niet ghedooghen datmer in vaert met vremden schepen, omme datmen de maertse van dien lande aldaer niet en zoude leeren kennen. (206r) Item theylandekin dat leyt tusschen desen voornoemden aerm ende loop, ende tusschen den aerm ende loop daer Damiaten up staet, es ghenaemt theyland van Maloc.¹⁵⁵ Item den derden principalen arem ende loop, die loopt naest den aerm die te Rossetten ende te Alexandrien waert gaet, es ghenaemt den loop oft aerem Desturion, om datter een stede up leyt, ghenaemt Exturion,¹⁵⁶ ende in desen zelven arem zo en wilt de souldaen ooc niet ghedooghen datmen met schepen vaert, omme der redenen vooren verhaelt; dus blijcket dat de riviere van Nilus wel zes oft zeven aermen ende loopen heeft, alle heylandekins makende, maer werden al in een heyland gherekent zo vooren gheseit es.

150 Zie de slotpassage van Tvoyage III, 2 en aant. III, 8.

151 El Mansoerah.

152 D.i. Lodewijk IX, echter de vierde Lodewijk van het huis Capet.

153 Willem van Tyrus, Hist. Transm.

154 Zie aant. III, 7.

155 Bedoeld is het langwerpig eiland dat het Manzala-haf afsluit.

156 Wrsch. El Teirîya.