Tvoyage van Mher Joos van Ghistele

[p. 141]

(II, 57)

(147r) [C]ommende van Rama naer Gasera, zo eist altijts meest heffenen wech ghenouch, ende redelic vruchtbarich landt, zonderlinghe drie oft vier mijlen rondsomme van Gasera, verchiert met zeer velen bogaerden, overvloeyich van alder tiere vruchten, ende recht eer datmen comt ter zelver steden, zo vindt men eenen steenput up den wech, viercantich wesende, verdect met eenen serpentijn steene, met eenen grooten gate in midden omme water duer te puttene, twelke alte schoone ende costelicke een sake es. Dese voorseyde stede van Gasera en heeft als nu noch vesten noch muren, maer es wel ghevolct ende bewoont, vul van grooter coopmanschepen, ligghende up twee milen der zee, met eenen cleenen rivierkin daer duere loopende, ende es de leste stede zuutwaert vanden lande van beloften; plocht ooc te zijne de principaelste hooftstede vanden lande der Philistinen. Oec duer de zelve stede zo leyt tprincipael passaige tusschen Jherusalem ende Sente Kathelijnen, ende van Damasco te Alkayeren ende te Egipten waert, zo dat de zelve frontiere es tusschen den lande van beloften, tusschen Egipten ende tusschen Arabien. Te deser stede, zomen leest ten boucke vanden Rechters van Ysrael int xvi^e capittele, ghesciedet dat Sampson, ghewacht ende beleyt zijnde om vanghen, (147v) nam beede de bladeren vander poorten ende drouchse buuten der steden up eenen beerch die daer bij leyt, zomen gaet ghenouch den wech naer Ebron. Item ooc zo worden de voorseyde gheleet wat buuten der voorseyder steden teender plecken, daer in ouden tijden tpalaeis stont dwelc Sampson dede vallen, daer hij onder doot bleef, ende wel drie duust persoonen vanden volcke vanden Philistinen met hem, alsoomen daer af leest ten boucke vanden Rechters van Ysrael int zelve capittele. Item dus commen zijnde inde voorseyde stede van Gasera, zo ghijnc de gardiaen vanden cloostere van Monte Syon toot den heere van Jherusalem, den welken hij daer vant zo hem gheseit was, hem te kennen ghevende zijne saken waeromme hij daer commen was, ende hem biddende om zijne voorsienichede. De heere van Jherusalem, alle saken verstaende, ordonneerde twee van zijnen mammelucken die metten gardiaen zouden trecken naer Jherusalem ende hem doen restitueren tghuent dat hem ghenomen was, als waer bij dat de voorseyde ter stont weder keerden metten mammelucken ende namen den wech naer Sente Phelips omme dat hij wat curter es ende ooc omme tgheselscip vanden voorseyden mammelucken. Dus weder naer Jherusalem reysende, zo rijtmen ghenouch wat tijts den zelven wech diemen eerst comt, ende zoo langhe ghereden hebbende, zo slaetmen uppe ter rechter hand in wat ghebeerchs, daermen inne rijt eenen verren wech, zo datmen comt teender plaetsen, Soreth ghenaemt, daer Dalida, tboel van Sampson die hem zijn haer af schoer in twelke zijne steercte gheleghen was, plach te woonen,⁴⁴⁹ ende leverden zo inden handen van zijnen vianden, alsomen daer af leest ten boucke vooren ghenomt int xvi^e capittele. Niet verre van daer (148r) sietmen eene andere plecke, ghenaemt Ettam,⁴⁵⁰ daer Sampson wat tijts in eene speloncke woonde als toot hem quamen drie duust mannen van Juda omme hem te vanghen; hem bindende handen ende voeten, meenden zo te leverne den Philistinen, maer als zij hem gheleedt hadden ter plecken daer zijen leveren zouden, brac alle de banden ende nam vanden velde een caecbeen van eenen ezele, daer mede hij

449 Rechters 16:4 spreekt echter over het dal van de Sorec (Sareq).

450 Etam (Rechters 15:8 en 11).

[p. 142]

doot slouch dusentich mannen vanden Philistinen, also daer af ghescreven staet ten zelven boucke int xv^e capittele. Item noch voort rijdende eenen verden wech al meest beerch ende dal, zo comt men daer eene stede plach te stane, gheheeten Syselech,⁴⁵¹ nu ter tijt al te nieuten toot eenen doorpkin. Daer woonde David langhen tijt met zijnen huusghesinne ende ruters doen hij ghevloden was vanden coninc Saul, welke stede hem ghegheven was vanden coninc van Ghet, alsomen daer af leest ten eersten boucke vanden Coninghen int xxvii^e capittele. Oec zo leestmen ten zelven eersten boucke int xxx^e capitele, dat de zelve stede eens verberrent ende berooft was vanden volcke van Amelech, maer David met vier hondert mannen volchde hemlieden zo naer, dat hijse achterhaelde, verslaende meest al tvolc des voorseyden Amelechs, hemlieden nemende al haerlieder roof ende ghevanghenen, ende quam zo met victorien weder ter steden waert. Item onder weghe maecte David een recht ende wet, dat de ghone die bleven waren ter bewaernessen vander vitaillen ende plaetsen, zouden alzo wel anden roof deelen als de ghoone diet ghevochten ende den roof ghehaelt hadden; bij desen doorpkin staet ooc eene plaetse daer vele ouder sepultueren (148v) zijn, daer gheheeten Sancta Speloncka Odollam;⁴⁵² te deser plaetsen zo plach hem David ooc dicwilt te beerghene doen hem Saul, zijns wijfs vader, persequerde, zoomen daer af leest ten zelven eersten boucke vanden Coninghen int xxii^e capittele. Ende alle dese voorscreven plecken leden zijnde, zo quamen de voorseyde te Sente Phelips daer vooren af ghesproken es, ende also voort tooter stede van Jherusalem. Dus daer commen zijnde, zo wart de gardiaen van Montesyon gheholpen vanden vorseyden mammelucken die met hem commen waren, dat hij meest al dbeste weder creech van dies hij verloren hadde, bedanckende den zelven mammelucken zeere, ende hemlieden ghevende eene goede ghifte ende courtoisie naer de maniere vanden lande, want men doet daer gheenrande saken oft lettel om niet, zoot hier ende eldere en doet.

451 Siceleg(I Kon. 27:6).

452 Adullam, 25 km ten zuidwesten van Jerusalem (Vilnay, 200).