Tvoyage van Mher Joos van Ghistele

(II, 23)

[D]ese strate leden zijnde ende omme slaende ter slincker handt in een ander straetkin, lijdende duer eene poorte, zo comt men, recht upgaende naer de keercke vanden Heleghen Grave, an thuus van Veronica, ligghende ter luchter handt, de welke Onsen Heere een (93r) cleet warp omme zijn ghebenedijde aenschijn mede te droeghene vanden sweete, vulichede ende bloede doen Hij ghijnc ten beerghe van Calvarien waert, ende Hem daer an drooghende prentte tbeelde van zijnen aenschijne daer in, ghelijcmen datte noch hedens daechs te Roome toocht. Item van deser plecken voort waren zij gheleet in dupperste ghenouch vanden beerghe van Calvarien, buuten der keercken ommegaende, daer hemlieden gheseit was, dat Abraham ten bevele van Gode gheoffert ende ghedoot zoude hebben Ysac zijnen zone, also dat staet ghescreven in Genesis int xxii^e capittele, maer de heydenen machometanen zegghen dat datte ghebuerde inde stede van Lamecha, dwelc niet waer en es also datte wel blijct ten voornoemden boucke van Genesis int zelve capittele. Ooc ter zelver plecken leyt eenen langhen, vierhoucten steen wat verheven, ende recht daer bij, wat nederwaert commende up den zelven beerch, es de plecke zomen daer zeidt, daer Melsicedech Abraham offerde wijn ende broot als

[p. 94]

hij quam uuter bataillen, zijn vianden verwonnen hebbende, alzo daer of staet in Genesis int xiiii^e capittele, maer andere zegghen²³⁵ dat datte ghebuerde ten voete vanden beerghe van Tabor. Item al beneden commende, zo vindtmen eene viercandtte plecke rechts voor de keercke des Helichs Graefs, daer ghenouch in midden vander voorseyder plaetsen es eenen steen daer een cruuskin in ghegrouft staet, de welke men seit de plecke zijnde daer Onze Lieve Heere inder eerden neder sanc van grooter moetheden, gheladen metten hautte des Cruussen. Ende over elke (93v) zijde van deser plaetsen plaghen te stane twee schoone cappellen die nu meest al vervallen ende te nieuten zijn, zonder rechts dat de mueren wat over hende staen. Item ter rechter handt, wat ter keercken waert des Helichs Graefs bijden beerch van Calvarien, es eene cappelle, ghenaemt de Cappelle Nubiana, daermen up plocht te gane met eenen steeghere van buuten der keercken zoe zij nu ghemaect es, maer den upganc es verdonckert, ende recht daer onttrent was Onse Lieve Vrauwe Maria de Moeder Ons Heeren, doen zoe hoorde Jhesus haeren ghebenedijden Zone naghelen an thout des Cruussen, daer zij van grooten drucke ende medelidene neder viel in onmachte.²³⁶ Item oec onttrent diere voorseyder plecken stont Maria de Moeder Ons Heeren als haer ghebenedijde Zone Jhesus, an thout des Cruussen hanghende, toot haer sprac zegghende: ‘Mulier, ecce filius tuus’, met welken woorde haer herte duersneden wart metten zweerde van bitterheden, zo dat langhe te vooren gheprofeteert was. Item alle dese plecken ghevisenteert hebbende zonder inde keercke vanden Heleghen Grave als doen te commene, keerden zij weder naer tclooster vanden broeders in Monte Syon. Maer onder weghen zo quamen zij in eene poorte, zeere neder ende doncker, daer zij ter luchter handt een cleen duerkin saghen daer zij in gheleedt waren, ende es de zelve plecke daer Sente Jan evangeliste gheboren was,²³⁷ twelke in voorledenen tijden eene schoone keercke gheweest heeft zomen dat noch wel meercken mach ande oude edeficien. (94r) Toot allen den plecken vooren ghenoopt es te verdienene zeven jaer pardoens ende zeven carrijnen; dit ghevisenteert hebbende quamen weder in Witten Donderdaghe tsnavonts ten cloostere van Monte Syon.

235 Nl. Burchardus, VI, 9.

236 Misschien ontleend aan Poloner, 230.

237 De evangelist Johannes was geboortig van Galilea, cf. Mattheus 4:21, 10:3, 20:20 en Marcus 15:40! Aan de weg van de H. Grafkerk naar de berg Zion staat echter wel een kerk, gewijd aan Johannes de Doper.