Tvoyage van Mher Joos van Ghistele

(II, 22)

[S]cheedende uut deser voorseyder helegher steden, zo comt men up eene plaetse daermen ter rechter handt siet staen een portaelkin duer dwelke es eene pissine, daer thaut des Cruussen menich jaer inne verborghen was, daer dinghel Gods quam alle daghe eens roerende tvoorseyde watere, ende wie daer naer int zelve eerst quam, ghenas van (91v) alderande siecten.²³² Te diere plecken ghebuerdet dat Onse Lieve Heere Jhesus eenen aermen hiechteghen ende siecken man ghenas die daer, troest verbeidende, gheleghen hadde acht ende dertich jaer, ghelijc daer af staet in devangelie van Sente Jan int v^e capittele. Item scheedende van desen plaetsen ende voort gaende de rechte strate, zo lijdt men noch voor eene poorte des tempels van Salemon, ende wat leden zijnde ter slincker zijden, zo comtmen onder eene andere poorte, daer onder dat staet thuus daer Maria de Moeder Ons Heeren plocht ter scolen te gane. Niet verre van daer, ter rechter handt vander straten, es de plecke daer Onse Lieve Heere Jhesus Maria Magdalena haer sonden vergaf ten huuse van Symon Leprosus, also daer of staet ter evangelie van Sente Luuc int vii^e capittele. Maer eeneghe zegghen²³³ dat daer niet en ghebuerde, maer zoude gheschiet zijn teender ander plecken bijden huuse vanden rijcken vrecken, het welc niet waer en schijnt, want in zulker manieren zoude dat gheschiet hebben buuten der stede van Jherusalem. Item noch voort gaende de strate bet up, zo comt men ten huuse van Pilatus, ooc ligghende ter rechter hand, daer Onse Lieve Heere Jhesus ghegheeselt was ende ghecroont metter doorne croone ende onrechtveerdelic verwezen ter doot; te deser plecken en werden oec de pilgherems nu ghemeenlic niet ghebracht omme den grooten cost die de patroens daer of hebben zouden zo vooren gheseit es, maer doen den pilgherems te verstane dadt de heydenen niet ghedooghen en willen; te deser plecken es te verdienene aflaet van (92r) sonden ende van pijnen, ende in allen andren voorseyden plecken zo es te vercrighene zeven jaer pardoens ende zeven carrijnen. Item voort buuten der principaler straten ter rechter handt in een cleen straetkin, omme slaende nevens den huuse van Pilatus ende thenden den zelven straetkin, staet een schoon huus met vele trappen upgaende int welke de coninc Herodes plocht te woonene, daer Onse Lieve Heere Jhesus van Pilatus ghesonden wart, waer af Herodes zeere verblijdde, meenende menich mirakel van Jhesum ghesien thebbene, maer Onse Lieve Heere te diere tijt en andwoordde niet up al tghoont wies Herodes hem vraechde. Maer emmer He-

232 De Bethesda-vijver. Dat het kruishout daarin gelegen zou hebben vermeldt Comestor, Hist. Scholastica, Lib. III Regum (P.L., 198, kol. 1370).

233 Nl. Jan van Mandeville, kol. 82.

[p. 93]

rodes ende Pilatus worden te diere tijt ghevrienden, die langhe vianden gheweest hadden, alzo daer af staet in devangelie van Sente Luuc int xxiii^e capittele. Item voort ter straten upwaert gaende, zo comtmen duer eene zeere hooghe poorte die de weerdeghe Helena dede maken, daer up zij dede stellen twee groote, viercantte, wittegrau steenen omme datse elc van verren zoude moghen ansien; up den eenen stont Onse Lieve Heere Jhesus, als men Hem zonder verdiente ende onnooselic verwijsde ter doot, ende up den anderen stont Pilatus als hij de valssche, onrechtveerdeghe sentencie gaf, datmen Jhesus cruussen zoude. Niet verre van daer, over de slincker zijde vander straten, es de plecke daer Maria de Moeder Ons Heeren beswalt van grooten drucke als zoe sach haren ghebenedijden Zone zo mesmaect commen, zo bloedich ende zo swaer gheladen met zijnen Cruusse; te diere (92v) plecken heeft ooc hier voortijts eene schoone keercke ghestaen, ghesticht ter eeren van Onzer Vrauwen, maer nu ter tijt es zoe al vervallen ende te nieuten.²³⁴ Daer leden zijnde, zo comt men ter stont up de drieweechscheede daer Simeon, een duerpman ter stede waert van Jherusalem commende, ghedwonghen wart Jesum Christum zijn Cruusse te helpen draghene ten beerghe van Calvarien waert, also daer af staet in devangelie van Sente Luuc int xxiii^e capittele. Ende recht daer omme slaende lancx der straten henen ter slincker handt, zo staet eene poorte, daer ten tijden vander passien Ons Heeren vele vrauwen stonden en weenden, als Onse Heere aldaer leet, tooten welken Hij seide: ‘Filie Jherusalem, nolite flere’, alzo daer of oec staet int voorseyde capittele. Item inde voorseyde strate, ooc ter luchter handt, zo laetmen ligghen thuus vanden rijcken vrecken vanden welken de historie staet in devangelie van Sente Luuc int xvi^e capittele ende daer bij zoudt thuus staen zo eeneghe zegghen van Symon Leprosus, daer Maria Magdalena haer sonden vergheven waeren.

234 Dezelfde mededeling, gelijkluidend, bij Poloner, 230.