Tvoyage van Mher Joos van Ghistele

(II, 18)

[D]us commende voor tclooster voorseyt, zo vondense daer al ghereet staende den eerweerdeghen vader den gardiaen vanden zelven cloostere ende vele van zijnen broeders, die hemlieden zeer blijdelic ende minlic ontfinghen, ende vraechden onder andere saken oft zij oorlof hadden vanden Heleghen Vader den paus van Roome over tzee te commene, ghemerct dat de zelve quamen buuten den tijden vanden galleyen, (85v) daer de pilgerims mede pleghen te commene. De voorseyde daer up andwoordden dat ja, ende toochden daer af hare brieven; die ghevisiteert zijnde, men dede open doen de keercke,²¹⁶ hemlieden daer inne leedende, vermanende ende informerende dat zij Gode wel dancken zouden vander gracien hem ghebuert in haer reysen, dat zij scadeloes, ghesont, ende principalic inden heleghen tijt, als inde goede weke, commen waren ter plecken daer zij zouden moghen versoucken de voetstappen ende de memorien vander passien ende verrisenesse Ons Liefs Heeren, dwelke zij daden naer haer beste ende cleenen vermoghene. In dese voorseyde kercke wesende ende die wel besiende, zo docht hemlieden dat zoe zeer suverlic ende vriendelic was an te siene, alwaer men in

216 Bedoeld is de cenakelzaal.

[p. 87]

comt van buuten met trappen upgaende, met eender wonderlicker steercker duere, up avontuere ofmer fortse up dade of doen wilde. Item int incommem zo staen inden midden twee pilaren van steenen, daer an ghemaect es een maniere van - eenen choore van berderen daermen rontomme gaen mach, ende ter plecken daer den hooghen aultaer staet zo gheschiedet, dat Ons Lieve Heere zijn paeslam hadt met zijnen beminden apostelen up den heleghen Witten Donderdach, ende daer ordonneerde Hij ooc de twee alder weerdichste sacramenten van zevenen, te wetene tsacrament vanden priesterdomme ende tsacrament vanden aultare. Te deser zelver plecken deden de voyagiers voorseyt haren capellaen messe doen, daer te halene es aflaet van sonden ende pijnen. Item ter rechter handt vanden hooghen aultare inden zelven choor zo staet noch eenen (86r) aultaer, ter zelver plecken daer Onse Lieve Heere dwouch de voeten van zijnen beminden jonghers ende van zijnen apostelen; wart te diere plecken ooc messe ghedaen bijden voorseyden capellaen, ende up den heleghen Witten Donderdach zo worden hemlieden daer hare voeten ghedweghen vanden weerdeghen vader den gardiaen voorseit. Hier naer neder dalende uuten choore, commende inden pant, zo worden zij gheleedt inden uutersten houc vanden zelven pande teender cappelle daer Ons Lieve Heere up den dach van zijnder verrisenesse snavonts quam ghelokender dueren in midden van zijnen apostelen, toot hemlieden zegghende: ‘Pax vobis’, also daer af staet inde evangelie van Sent Jan int leste capittele; ter zelver plecken zo quam Onse Heere den achsten dach naer zijnder verrisenesse, Hem oec openbarende zijnen discipulen, doen Hij Sent Thomaes dede tasten zijne ghebenedijde wonde, zegghende: ‘Thoma, nolij esse incredulus’. Hier ende ter plecken daer Onse Heere zijnen apostelen de voeten dwouch, es te halene zeven jaer ende zeven carrijnen pardoens. Item alle dese voorseyde heleghe plaetsen int generale staen up den beerch van Syon, insghelijcx tclooster metten bogaerde ende lochtinghe ende plach te zijne in tijden voorleden de woonste vanden coninc Davit, ter welker plecken hij dede maken een schoon casteel naer dat hij eenen tijt coninc van Jherusalem ghesijn hadde, ende es eene lusteghe plaetse; men siet vanden zelven beerghe van Syon meest alle de lusteghe plaetsen die binnen ende ooc buuten Jherusalem gheleghen zijn, ende menich lustich beerch en dal, die in voorledenen tijden plochten verchiert te zijne met schoonen huusen (86v) van ghenouchten, casteelkins, dorpen ende met meneghen schoonen bomgaerden, hoven ende lochtinghen, de welke nu meest alle te nieuten zijn, zomen dat als noch wel meercken zoude dies nauwe gade sloughe, maer daer wassen onttrent wonderlicke vele olijfboomen, amandel boomen ende oec veel goets, zonderlinghs wijngaerts van goeder smaken ende grooter cracht.