Cyrurgie

Van den navele ghescort in kinderen.

Die navele wert in kinderen groot ghescort ende hute bulende ende qualicke ghesloten ende dat mach men wel ghenesen sonder sniden Ende ghevalt somtijts dat daer gadert vele materie ende dat salmen purgieren aldus. ¶ Nemt dat heinde van den navele met .ij. vingeren ende metten anderen hant soe dructen inwart dat in den navele es tote in den lichame ende coendi dit ghedoen soe es den navele ghescort ende ne willet niet ingaen ende dat kint seer trect ende screit soe eist materie soene suldi niet der toe doen. Ende is de varwe van der navele gelijc de varwe van den huut. ende dat in gaet alsment

tast gelijc alst vorleert es dan⁺ suldi maken eenen bant met eenen cussenkin in de middel genayet ende daer mede subtijlic binden ende onder den bant op den navele salmen legghen gheberrende lupinen ende lijnen doucke gheberrende .ana. partes equales ende dit salmen temperen met wiin aisiin ende maect der of een plaster op stoppen ende der op geleit ende der boven op binden een cussinkin alle dage. ¶ Een ander der toe orborlic. ¶ Nemt zwart pec .℥. iiij-or pulver masticis. pulver van wieroec pulver van bolum armenicum .ana. elcxs .℥. ½. dat pec salmen smelten op dat vier alleene ende alst ghesmolten is dan doet of ende minget der in de pulveren vorseit ende maect eene plaster van eenen canepen doucke ende dat leght der op .3. daghe ofte meer ende doet alsoe tote datti ghenesen is. Ende macht niet der mede ghenesen soe salmen wercken aldus ¶ Int erste men sal met eener spletten die navele begripen ende inwart steken tote datti in es ende alst al in es dan salmen vaste duwen ane den buuc ende die splette in houwen die darmen ende die pacient die

sal sinen navele soe hi mest⁺ mach inwaert trecken Ende dan salmen nemen eenen naelde met eenen starken drade alsoe ghemaect in desen vorme (zie fig. XLIV) Ende dor steken den navele al vaste ane de splette ende dan salmen den draet een warf omme slaen ende cnoepen alsoe men eenen sac bint. ende dan den navele weder dore steken cruuswijs jeghen die erste steke. ende dan weder omme slaen ende cnoepent noch een warf ende dan

+ C 77c.

+ C 77d.

[p. 209]

salmen dat einde des drats (l. draets) of sniden ende dan doen die splette of. ende latent daer in den draet tote datti of valt ende vort. Dan selment heelen alse eene ander wonde met drogender salve ende die selmen wel heelen ende dat houwet emmer wel ghecussinelt ende oec goet regement houwen.