Cyrurgie

Van apostemen ende zwellinghe der cullen.

Apostemen ende zwellinge der cullen comt somtijts toe van hitten ende somtijts van quetsingen ende van bloede datter toeloept Ende alse die zweeringe comt van hitten Die teekinen siin roetheit der verwen. heet in den tast. starke zweeringe ende stecten. ende die cueren der of dat willen wij scriven. Int erste salmen bloet laten in die adere die men heet baselica ane die selve side. ende eist dat sake dat si siin beede geapostemeert soe selmen laten in die rechte side ende men sel der oplegghen vercoelende cruden alse herba violarum edrea terrestrea ende solatrum. Dese cruden selmen sieden in watere ende doen se huten watere ende latense versupen van den water Dan selmen die cruden al in twee stampen met een lettel tarwin gruus ende siendense (l. siedense) met een lettel wiins ende waters ende olie van rosen ende daer of maken plasteren ende dat selmen legghen laeu der

⁺op. Ende aldus salmen des dages vermaken tweewarf ende eermen de plaster der op legghen sel soe selmen altoes de cullen bayen metten vorseiden water daer die vorseide cruden in ghesoden waren. ¶ Item ende hi sel sitten in wateren die vercoelen. ¶ Een ander. men sal nemen scroeden ende die selmen netten in wiin aisiin ende in rose water te gader gheminget. ende dat salmen laeu der op legghen tweewarf sdages ende men sallet bestriken met coelende unguenten die ten heeten apostemen gaen alse ghi voren in de apostemen vinden sult. ¶ Een ander. Ende eist dat daer mede niet ne betert soe leghter op dit nae volgende plaster ende hier mede saelt sachten ende beteren. ¶ ℞ mussilaginis semen lini et psillii et fenugreci .ana .℥. iiij-or. gummi bdellii. armoniacum .ana. .℥. ½. furfuris .℥. v. Dit stoet ende siedt al over een ende daer of maect een plaster ende dat leght al warme der op. Ende men sal weten datmen altoes die cullen vor den vermaken sal bayen.

+ C 75b.