Cyrurgie

Om te weder slane dat venin dat men heet Cantarides.

Dit siin de medicinen omme te verslane alle die ghene die venin ghedroncken hebben ofte cantarides Item men sel hem gheven drincken in drancke oleum amygdelarum ende teekin is datti bloet oec hem es sine blase zwart ende daer nae gheneset die zweeringe der blasen. ¶ Item men sel hem gheven drincken succum apii ende men sel hem gheven medicine de asa fetida ende tyriaca magna galieni. Ende die ghene die melc drinckt ende hem daer nae comt morwenisse ofte walghinge die sel nemen aisiin ende daer in nemen een luttel asa ofte succum calamento gheminget met sirupo acetose .℥. j. Dit doet tweewarf deen naer dander.

¶ Een ander. Nemt spillium dat selmen drincken in drancke dat doet al tselve. Ende ghevielt alsoe dat die mensche ate Coriandrie onghepreparert dats veninosa ende dat selmen wel rucken bi den ademen van den pacient. Men sel den pacient gheven drincken gium psillium gelijc dat vorleert es dat sel hem seer helpen. Ende somtijts ghevallet ende comt toe den lieden van

⁺ghebraden dinghen dat si dat eten te heet ofte alsmen hute eenighen hoven ofte viere trect eenich dine ende ment niet laet verslaen ende men etet dats urtigo filis epilie. ¶ Nemt in drancke rob stpticorum(?) mundatorum ende dan ghaet slapen der op ende gaet der nae in een badt. Ende comt oec somtijts van vissche eenen dach ofte twee ende eist dat sake dat hem valt datti heeft gheten dusdanich spijse hi sel nemen in drancke ende in suveren wiin pulvis piperis ende men sal nutten kernen van avellanen ende somtijts slaen der toe quade toevallen ende dien pacient salmen gheven nutten robcitomorum Ende men sel hem gheven onder tusschen elcm̄ (l. electuarium) diateron piperion ende men sel die pacient gheven drincken suveren wiin ende men sel die maghe van buten besmeeren cum olio nardino savens alsmen slapen gaet ende daer op sel men legghen een warme cleet.

+ C 59b.