Cap. 8.
¶ Van rutingen i(n) die oren1).
+Het comt dicken rutinge in die oren. van den welken goet ware dat hem thooft ware wel gepurgiert met pillen cochijs ende met pigra [ende die pillen salmen hem gheven des snachts alsi hi eenen slaep gheslapen heft. alse die mage ydele es ende dan weder der op slapen. Ende dit suldi hem gheven C] op dat hijt2) niet en heeft gehadt van dat hi was geboren. want heeft hijt so lange gehadt. so verliest die meester sine pine entie zieke sinen cost [ende die stonde C]. ¶ Die rutinge heeft ende qualike hoort. dit ware hem goet. Nemt+ olie van bittren amandelen. ende daer in so tempert ene van desen pillen gemaect aldus. Nemt die sculpen van coloquintiden .1. Ʒ. bevers cul. aristologia rotunda. tsap van alsenen. van elken .½. Ʒ. euforbie .1. ℈ of 15 tarwen cornen swaer wegens ende elc siin gewichte hebbende. dat men pulveren mach. dat salmen wel cleine pulveren. ende daerna so maecter af pillekine metten vorseiden zape. dit droopt in die ore. Mer te voren so hebt gesoden maiorana. alsene. ende sticados arabic in watere gesoden. ende stovet den zieken wel die ore. of beide es hi in beiden oren ziec3). ¶ Dits oec goet. Nemt wel wit wierooc .1. Ʒ. hier af so maect dunne zalve wel cleine+ gepulvert ende getempert met suveren zeme gescuumt. dit so droopt in die oren. het esser goed in gedaen al laeu.