Cyrurgie

[p. 77]

Cap. 6.
¶ Van puste(n) i(n) doge(n) e(nde) wit dat ungula heet in latine¹⁾.

Dicwile gevalt dat die sweringen van optalmen niet en geliggen²⁾. dat comt bi dat in die ogen siin puusten entie siin daer in gewassen. Eer ghi enech van desen remediën in doet. dats eer dat si tot u ⁺quamen³⁾. eist also. so doet dit maken ene colirie van wieroke aldus. ¶ Nemt wit wierooc wel suver .10. penninc wegens. antiuraom. sarcocolle elx tgewichte van .5. penningen. dit minct met musillaginen van venigrieke ende maecter af pillen entie droget ende besteedse in droger steden. Ende als giere met werken wilt. so nemt .1. pille ende tempertse met mussillaginen van venigrieke. ende maect .1. lanc wiexkijn van catoene ende maket daer met dore⁴⁾ nat. ende dat bindet optie oge. ende dat vermaect .3. werf onder dach ende nacht ende dat doet so lange dat die plaestren werden be-ettert. entie sweringe si welna te nieute. ende daerna so legter in dese colirie die maect men dus. ¶ Nemt gebernt lood te pulvere. antimonie. ⁺tuchie gedwegen. gebernt coper. gomme van arabiën. dragant. elcs .8. penninc wegens. apii. enen hellinc wegens. van alle desen make wel cleine pulver ende maecter af pillen met regen watere. of met lood watere dat suver es. of met rose watre dese besteedt droge⁵⁾. Ende als giere met werken wilt so tempert ene van desen pillen metten vorseiden watere⁶⁾. ende daerin so net .1. plaster van catoene ende legget optie oge. Want dese colirie heilt ende doet [hert G] tfleesch wassen. Ende wert dat achter tgenesen bleve enech witte. so legter in dit. dat in latine heet⁺ macula.

Mer sulke seggen smette allene.⁺ dat siin witte poentkine⁷⁾ in die zie. entie comen meest van ouden optalmen ten welken es goet witte colirie. ja die vorseide. Ende so es oec dese colirie renes dewelke gi⁺ maect aldus. ¶ Nemt epatic. aloës. soffraen elx tgewichte van .8. penningen. gebernt coper. gedwegen. gomme van arabiën. opii⁸⁾. elx tgewicht van .16. penningen. mirre van .12. penningen. wierooc van .8. penningen. dit stampt al wel te gadere ende maecter af cleine pulver ende minget met zoeten wine. ende maecter af ene colirie. dese siin goet beide te gadere geminct omme nuwen smetten mede af te doene.

1) G: Van puystkine die wassen en doghen van opta(l)men. Ontbreekt in C en L.

2) G: gheliket

+ G 54c.

3) G: eer dat ghire toe quaemt

4) G: doghe

+ G 54d.

5) G: dese droegt ende danne besteetse

6) G: den vorseiden pillen metten watere

+ †

+ B. 125a.

7) G: puystkine

+ G 55a.

8) G: apie