Leven van Sinte Amand, patroon der Nederlanden. Dichtstuk der XIVe eeuw

[p. 173]

Hier na comt een exemple in castigacien den mensche bi der natuere van der bie.

Ic bidde hem allen die dit lesen

Dat elc bedocht wille wesen
Te volghene der natueren van den byen,
Daer men exemple an mach sien
Dat so souct up alle crude goet
Hare leeftoocht, maer den moet
Ne stellen si up gheene dinghen,
Dan die nuttelic sijn sonderlinghe,
Ende dat nutten si so by maten
Dat al comt ten goeden staten,
Ende te profyte sonder verlies.
Nu nemen wy exemple van dies
Dat dit cruut bediet woorden soete
Daer wy onsen nootdurft by moeten
Souken, die ons huter scriftueren comt,
Want het der sielen seere vroomt
Dat so haer voeden mach metten sade,
Daer so bi comt ter Gods ghenaden;
't Saed bi der ewangelien acoorde
Beteekent der heligher scriftueren woorden,
Ende die woorden beteekenen mede
Onse voetsel in de salichede,
Dies laet ons dit hebben voor hooghen,
Ende na der natueren van der bie poghen,
Dats dat wy nutten woorden soete,
Daer onse ziele by ghecrijcht boete
Van mesdaden ende laet bliven
Vele woorden, die men mach scriven,
Daer negheen nutscip af ne comt,
Noch ten hutersten der sielen vroomt,

[p. 174]

 

Ende als wi se ghenut hebben mede

 

Moeten wi ons stellen ter salicheden

 

Dat onse ziele hevet profijt

 

Daer boven daer altoos es delijt.

 

Bi desen exemple biddic hu algader

 

Door Gode, onsen helighen vader,

5320

Dat vindi yet in desen boucke,

 

Dat rude es, dats hu niet roucke,

 

Maer latet over liden saen,

 

Ende wilt van den soeten ontfaen

 

't Voetsel ende set datte in 't ghedochte,

 

Ende peinst dat ic niet wel ne mochte

 

Vulbringhen alle nuttelike saken,

 

Want ics onmueghende bem van spraken,

 

Ende gheve hu te kennene daer toe,

 

Dat ic 'tom negheen ghewin en doe,

5330

Maer omme minen tijt te cortene mede,

 

Ende om te scuwene ledichede,

 

Dus willic onbegrepen sijn,

 

Al en es die redene niet so fijn,

 

Als oft se een meester hadde ghedijcht,

 

Die met consten ware verlicht,

 

Dies ic niet ane mi en wille tyen,

 

Want ic der waerheit wille lyen.