Leven van Sinte Amand, patroon der Nederlanden. Dichtstuk der XIVe eeuw
(1842-1843)–Gillis de Wevel–
Auteursrechtvrij
[pagina 153]
| |
Maer God, die alle dinc voorsiet,
Sendere ieghen dat Kerstine diet,
4650[regelnummer]
Die al anders verkeerden 't spel,
Ende castiede die Sarasine so wel
Dat si waren in grooter noot,
Want dien meesten hoop bleef daer doot,
Dus bleef Kerstinheit in die heere
Bi Amande, den helighen heere,
Hute siere heligher predicacien,
Ende datter God sine helighe gracie
Ute ontfaermicheden, mids Amands bede,
In die partien dalen dede,
4660[regelnummer]
Daer bi ghevelt was die overmoet,
Die langhe daer te voren stoet,
Ende seere t'onder hilt Vranckeryke.
Nu hebben si wel vriendelike
Als broeders de Sarasine verdreven,
Ende sijn voortan ghevriende bleven
Beter dan si waren te voren.
Nu sullen wi van Amande hooren
Den helighen vader, des sijt wijs,
Die wy met rechte gheven prijs.
4670[regelnummer]
Naer dat die Sarasijnsche scaren
Hute Vranckeryke verdreven waren,
Ende 't land stond in goeden vreden,
Amant tote den coninc seide
Dat hi gheerne te Pevele ware.
Die coninc hi versuchte zware,
Als hy verstond den helighen man
Dat hi sceeden wilde van dan,
Nochtan seide hi: ‘Helich vader,
Ic wille mi voughen al te gader
| |
[pagina 154]
| |
4680[regelnummer]
Te doene dat hu wille sy,
Als ghy niet langher by mi
Wilt bliven, so trect daer ghi begheert,
Ic bem die ghene, die 't hu consenteert,
Maer mine herte es verseert
Dat ghy sceeden wilt dus saen.’ -
‘Heere coninc, dat wilt wel verstaen,
Ic bem cranc ende hout van daghen,
Ic ne mach de pine niet ghedraghen,
Die ic dede hier te voren,
4690[regelnummer]
Hedel coninc, hoghe gheboren,
Waer ic in den clooster mijn,
Ic wane wel weten die waerheit fijn
Dat ic niet langhen tijt sal leven,
Dies wilt mi uwen orlof gheven
Ende blijft voort in goeden vreden,
Peinst om 't behout van kerstinhede,
Dies biddic hu, coninc coene,
Want het heves wel te doene.’
Met deser talen sijn si ghesceeden,
4700[regelnummer]
Amand die ghinc hem ghereeden
Ende quam te Pevele, als hy eerst mochte.
Al sinen sin ende sijn ghedochte
Was penitencie te doene ende weldaet.
Hi leedde so helich eenen staet
In den clooster dat alle ghemeene
Die moncke groot ende cleene
Exemple namen aen desen heere,
Ende pijnden hem algader seere
Te volghene desen helighen man.
4710[regelnummer]
Nu willic hu, als ic best can,
Bescriven eene miracle scoone,
Die onse Heere van den Troone
| |
[pagina 155]
| |
Openbaerde door Amands heere,
Die 't kerstine gheloove stercte seere
Te Pevele ende daer ontrent,
Als die miracle was bekent
Onder die lieden haren/thare.
Nu swighet stille ende hoorter nare,
Ic saelt hu hier in rime ondbinden,
4720[regelnummer]
Also men 't in 't lattijn mach vinden.
|
|