|
| |
Een prijs van Sente Baven gheexponeert in exemplen van castigacien.
Alle creatueren die nu leven
Souden met rechte prijs gheven
Desen helighen sand vercoren,
4270[regelnummer]
Die in onghelooven was gheboren
Hedel prince ende machtich zeere,
Ende mids Amande, den helighen heere,
Hem selven algader so vertiede
Dat hi kerstin gheloove liede,
| |
| |
Dit was Bave, die helighe man,
Dien alle doogheden wiesen an,
Dies ic met rechte mach segghen
Van hem dies ic hoore legghen
Der Ewangelien ons te vooren
4280[regelnummer]
Dat Christus sine jongheren liet hooren
Eene parabole, daer hy dus seide:
‘Een man was die groote rijchede
Hadde, ende vele lands in sijn hoede,
Dus bedurft hem meysniede goede,
Die hi huerde sonder ghetal,
Ende hiet se te werke commen al,
Ende neerenstelike doen sijn bederven;
Daer naer quam hy up sijn erve,
Ende vant bevaen metter ledichede
4290[regelnummer]
De somighe, daer hi dus toeseide:
‘Gaet werken!’ende si daden't schiere.
Daer na quam die heere goedertiere
Te priemen, te tiertsen ende te middaghe
Ansien sijn werclieden sonder saghe,
Maer emmer ghemeste hy aldare
Dat si niet alle commen ne waren.
Te noenen, te vesperen quam hy mede
Up sijn land, ende by siere duechdelicheden,
Waer hi eenighe werclieden vant,
4300[regelnummer]
Dede hyse gaen al te hand
Werken, dit dede hy al de weke duere,
Ten hende so gaf hy haer huere,
Ende gaf also wel elcken man,
Die te vespertide ghinc an,
Als die ghestaen hadde den dach alduere
In sinen neersteghen labuere.’
| |
| |
Nu laet ons hier exemple nemen,
Wat Christus hier up wilde ghetemen
Ons te bewisene, daer hy dit sprac
4310[regelnummer]
Tote sinen jonghers, hijt vertrac
Dat die vader van hier boven
Es die heere, die men mach loven,
Ende die so vele lands heeft
Dat hy groote huere gheeft
Den ghenen, die hem dienen willen,
Ende in duechden niet ligghen stille,
Ende ooc so wilt hy sonder waen
Den ghenen also wel ontfaen,
Die te vespertijt gaet te werke
4320[regelnummer]
Up dat hy neerenstelic ende sterke
Bliven wille in sinen labuere,
Als die ghestaen heeft den dach al duere
Sachtelike werken met traghen leden.
Dat Christus dese exposicie sede
Bediet die mensche, die in dit leven
Hem neerenstelic ter duecht gheven
Al comt hy te werke spade,
Bi der ontfaermicheit ghenade
Sal hi nochtanne loon ontfaen
4330[regelnummer]
Metten ghonen die es ghestaen
Werkende te voren langhen tijt,
Hier up moghen wy sijn verblijt.
Nu laet ons merken an den heere
Sente Bave oft hy niet seere
Wrochte, al es hy spade comen,
Ja hy seker, dies hy vrome
Heeft ontfaen so mildelike
Dat hy daer boven in hemelryke
| |
| |
Verheven es in blyscepen groot
4340[regelnummer]
Ende eens deels es sonder ghenoot,
Dies ons exemple hier es ghegheven
Up dat wi merken willen ons leven,
Ende die miraculen, die hy dede
Up eerderyke, mids Gods moghentheden,
Maer naer sine doot sonder waen
Heefter Christus vele meer ghedaen
Hem te heeren ende te loven,
Ende om te kennene sijn hoocheit van boven,
Want wie te sinen grave quam
4350[regelnummer]
Met siecheden, hi ghesonde nam
Up dat hy riepe met gheloove goed
Hane hem, ende ghi ooc weten moet
Gaende, ende die blende voorwaer
Woorden siende bi sijnder duecht,
Vrouwen met kinden woorden verhuecht
Bi hem, up dat si an hem baden,
Ja, die menighe vant ghenade
Die den duvel hadden inne,
4360[regelnummer]
Oft faeute hadden van haren sinnen,
Ende woorden verblijt ende ghesont;
Ooc gheviel te somigher stont
Dat men verdronkene creatueren
Voor hem brochte, in corter hueren
Levende upstonden ende ghinghen.
Dus was hi van allen dinghen
Voor Gode een groot advocaet,
Ende een verbiddere in elken staet,
Dies wy sculdich sijn te biddene seere
4370[regelnummer]
An hem ende te doene weerdicheit ende heere,
| |
| |
Want Christus noch soude door sine minne
Onse bede hooren, elc dit versinne.
Ooc heeft men vonden te menigher stat
Dat wie hem met goeder herten bat
Omme neeringhe, dat Sente Bave
Met salicheden meersde sine have.
Nu biddic voren ende volghet mi alle
Dat sine gracie so up ons valle
Hute ziere verdiensten moete dat wy
4380[regelnummer]
Behouden bliven in 't hende daer by,
Ende dat ons neeringhe met salicheden
Toe moeten commen, daer wy mede
Gode dienen t'allen stonden,
Ende ons bewachten van sonden,
Dies geve ons cracht ende vulleest
Die Vader, die Sone, die helighe Gheest.
|
|
Auteursrechtvrij