|
| |
Hoe Bave omme Dommeline sende ende hoe hi staerf daer na.
Up eenen tijt so es comen
Die abdt tote Baven, hebbic vernomen,
Te visenteerne den helighen man,
Ende sprac hem met soeten woorden an
Ende daer hi dus sat eene corte spacie
So quam Baven in sinen moet
3680[regelnummer]
Dat hem ware ter sielen goet
Dat hi ontbode herde schiere
Den prochipape goedertiere,
Die Dommelijn bi namen hiet,
Ende dien Amant de prochie liet
Van Thoroudt door sine helichede,
Dies bad hy den abdt door sine bede
Dat hy woude eenen knecht saen
Senden te Thorout, ende doen verstaen
Dommeline dat hi quame daer,
3690[regelnummer]
Hi haddene te sprekene voorwaer
Eenighe sake eer hi verschiede.
Die abdt dede als die ghediede,
Die gheerne dade sijns vrients wille,
Ende beval eenen knecht dat hi niet stille
| |
| |
Ne ware no ruste te gheender stont
Voor hi quame, dat si hu cont,
Te Thorout, ende Dommeline hadde ghegheven
Eene lettre, die hi ghescreven
Hadde met haesten; doe ne lette niet
3700[regelnummer]
Die knecht, maer haestelike hi sciet
Van den abdt, ende liep met haesticheden
Hute Ghend, der goeder stede,
Ende soude loopen te Thorout,
Maer het was so onghetreden wout
Dat hi den wech niet vinden en conste
Ende hi zeere dolen begonste.
Doe wert hi te male buten keere
Ende claeghdet Gode onsen heere
Dat dien wech so woeste was,
3710[regelnummer]
Want hi duchte dat hi door das
Van den abdt gramscip soude ontfaen.
Nu hoort wat Christus heeft ghedaen,
Hi sende sinen inghel neder,
Die den knecht gheleedde weder
Den rechten wech al door dat wout
Tote hi quam tote Thoorout.
Daer sprac hi hem an in der ghebare
Recht oft hi een messagier ware,
Ende hiet hem dat hi soude gaen
3720[regelnummer]
Sine boodscip doen, hy soude daer staen
Ende ontbeyden hem tote dat hy soude
Commen weder, ende dan hi woude
Hem houden gheselscip al toot Ghend,
Dus liep die knecht met ghenent
Binder stede ende gaf schiere
Die lettere den pape goedertiere,
| |
| |
Die se vriendelike ontfinc,
Maer als hi verstont die dinc
Dat hem die abdt hadde ontboden
3730[regelnummer]
Door Baves wille wert hi in noode
Van droeven sinne, want hy dochte
Dat hi te langghe letten mochte,
Dies ghereedde hi hem wel saen,
Ende es metten knecht ghegaen
Haestelike tote dat hi quam
Daer hi den helighen bode vernam,
Den inghel Ons Heeren Raphael;
Als hine sach verkendine wel,
Want hem God selve te kennene dede,
3740[regelnummer]
Dies moghdi hooren wat hi seide:
‘Wille commen, lieve bode goed,
Die selve waers die messagier vroet,
Die Thobias den jonghen ghincs gheleeden,
Als hi van sinen vader was ghesceeden,
Daer hi den vader moeste halen
Daer hi mede van siere qualen
Soude comen huten bedwange,
Daer hi in hadde gheleghen langhe,
Want het was daer hy mede
3750[regelnummer]
Soude ghecrighen sine claerhede
Van sinen hoghen, die hi te voren
Mids den zwalewen mes hadde verlooren.’
Die inghel die andwoorde aldus:
‘Ghebenedijt sijs dies Christus,
Die hu dat heeft ghedaen bekent,
Ende weet dat hi mi hier ghesendt
Heeft, om dat ghi hu soud spoeden seere
Tote Baven, den helighen heere,
| |
| |
Die na hu langhet sonder waen,
3760[regelnummer]
Ende om dat so woeste es dat gaen
Tusschen hier ende der stede van Ghend,
So salic hu den wech doen bekent.’
Dus ghinghen si alle drie te samen
Tote si vaste an Ghend quamen.
Daer heeft die inghel orlof ghenomen,
Ende Dommelijn es ter stede ghecomen,
Daer Bave in sine scelle lach,
Die seere verblijdde als hine sach,
Ende dedene bi hem sitten saen;
3770[regelnummer]
Voort so dede hi hem verstaen
Sijn begheren ende sinen wille.
Daer naer sprac hi woorden niet stulle
Sine biechte met grooter voorsienichede,
Ende ontfinc Gods lichame mede,
Ja, ende sijn uterste sacrament
Van der Olye, si hu bekent,
Daer naer bat hy Domeline dat
Hi niet en sciede van der stat
Voor hi ter eerden ware ghedaen
3780[regelnummer]
Ende hi dies last wilde ontfaen
Sinen lichame te bestellene mede van al,
Dies hem bedaerf groot ende smal.
Dommelijn andwoorde schiere:
‘Dan salic laten in gheender maniere;
Want wistic yet dat hu ghenoughen
Mochte, ic souder mi toe voughen
Om te bringhene uwen wille.’
Hier mede make ic een ghestille
Van deser sprake ende segghe hu voort
3790[regelnummer]
Datter matterien toe behoort.
|
|
Auteursrechtvrij