|
| |
Hoe Amand hier ontband die ewangelie den volcke, daer Sente Jan
spreect van der penitencien.
‘In illo tempore venit Johannes Baptista
Proedicans in deserto Judee, et cetera.
Pays van daer boven si met ons allen,
Broeders ghemeene, laet ons vallen
Up die ewangelie van den daghe van heden,
2590[regelnummer]
Alsoo 't predicte in waerheden
Die goede Sente Jan-Baptiste,
Die voorloopere was van Jhesus Christe.
Ic salt hu allen doen verstaen,
Wie dat penitencie wille ontfaen,
Ende hem doen doopen in Jhesus bloet,
Mach vinden altoos rechte ootmoet
An Jhesum Christum, onsen behoedere,
Want Maria, sine lieve moedere,
Ne rust altoos te negheere stond
2600[regelnummer]
Van biddene huut suverer grond,
Vloyende huut gherechter minnen;
Laet ons dit algader kinnen,
Ende voughen ter duecht ons selven,
So mach gracie up ons welven,
Ende wilt penitencie ontfaen
Van den sonden, die ghi hebt ghedaen,
In 't onghelooveghe der afgode.
Ic sal hu versekeren, als bode
| |
| |
Van minen meester Jesum Christe,
2610[regelnummer]
Dat hu gheene sake sal gheberste,
Also verre als het hu salich sy.
Wilt ooc exemple nemen in mi,
Dat ic mi liever liete dooden,
Dan ic eenighe van uwen afgoden
Anbeden soude ofte heeren,
Want sine moghen niement deeren,
No ooc helpen te gheere stond,
Want meerct dit selve in uwen grond
Dat niet salighere es dan kerstijn diet,
2620[regelnummer]
Want hem God hemelryke belyet,
Ende niet es pijnliker, sonder saghe,
Dan onseker leven alle daghe;
Niement es crancker dan dien 't so staed,
Dat hi hem sijn vleesch verwinnen laed.
Dese drie poeinte ontsienen hu allen,
Dies biddic hu dat ghi hu wilt laten vallen
Hu quade gheloove, daer ghi in sijt,
Ende wert met mi algader verblijt.’
Dusghedane exemple ende predicacien vele
2630[regelnummer]
Gaf hi hem te kennene in bispele,
So dat saed up dat velt, up den steen,
Begonsten te wortelen al in een,
Daer af dat de euwangelie seghet,
Die van Matheeuse bescreven leghet,
Dat dat saed up den steen vernomen
Qualike mach te pointe comen.
Dit saed, Gods wort ende gracie bediet,
Ende dit volc merct ende besiet
Dat het vul ende hert was ghelijc den steen,
2640[regelnummer]
Ontfinc dit saed groot ende cleene,
Ende brochten vruchten wel twee vout,
Also ghi hier na wel bekennen sout,
| |
| |
Wildi hooren die waerhede,
Want daer Amand dit sermoen dede,
Bekeerder .vii.c, bi ghetale,
Die versochten alle te male
Te ghecrighene kerstinhede.
Nu hoort wat Sente Amand dede,
Hi bad helcken dat si souden
2650[regelnummer]
Hem in goeden state houden,
Want hi soude senden sciere
Omme den bisschop goedertiere
Van Wassemens, den helighen man,
Ende doen hem ghereeden dan
Eene vonte, ende die wyen,
Ende dwater daer in ghebenedien,
Ende bringhen karisme, daer men mede
Hu bringhen sal ten kerstinhede.
|
|
Auteursrechtvrij