Leven van Sinte Amand, patroon der Nederlanden. Dichtstuk der XIVe eeuw

Hoe dat twee leuwen quamen tote Amande, ende hoene d'inghel van hemelryke hiet gaen te Thoorout predeken.

Doch gheviel up eene stond

Dat dese helighe mans name cont,
Te Winendale in wilde sadt;
Daer quamen twee leeuwen, verstaed dat,
Hem goedertierlike sitten bie,
Die hem hilden compangie,
Ende tooghden hem jonste ende samblandt.
Doe sprac aldus die helighe Amand:
‘Vrienden, ghi tooghet mi groote ootmoet,
Waer dit volc in dit land so goed,
Ende het kennesse, ghelic dat ghi,
Droughe van den Heere, die sende mi,
Het soude te vriendeliker ontfaen
Die boodscip, die ic hebbe ghedaen.’
Met datti dese woorde seide,
Weende hi, ende viel in sijn ghebede,

[p. 83]

 

So berrendelike, met heeten sinne,

 

Huten bedwanghe van grooter minnen,

2520

Dat hi hem selven al vergad,

 

Radeloos, drouve ende mat,

 

Entie viant, die t'alre stonde

 

Den mensche bedroghe up dat hy conde,

 

Sprac hem an, met valschen keere:

 

‘Vrient, du hebs hu ghemoyt seere,

 

Ende dine pine es al verloren,

 

Keere weder danen du best gheboren,

 

Ende verblide moeder ende vader,

 

Want hier eyst om niet algader

2530

Dattu voorpeinst hadts ende gheghist,

 

Van al 't al, hebstu ghemist.’

 

Dit seide hi om dat hi woude

 

Dat die goede man laten soude

 

't Folc in ongheloove bederven,

 

Ende als 't dan soude sterven,

 

So soude die duvel entie sine

 

Die sielen voeren ter helscher pine;

 

Dit was sine meeninghe ende sinen wille.

 

Nu hoort alle ende zwighet stille,

2540

Ende verstaet wat hier ghevel,

 

God sende neder sinen inghel,

 

Die den viand dede vlien,

 

Ende Amand, die dit heeft versien,

 

Dankedes Gode van hemelryke.

 

Daer beval d'inghel hoghelike

 

Hem dat hi up soude staen,

 

Ende rechte voort te Thorout gaen.

 

Daer soude hi vinden menighen man,

 

Ende prediken een sermoen dan;

2550

God soude hem verleenen gracie.

 

Doe sciet die inghel, sonder spacie,

[p. 84]

 

Ende voer weder, danen hi was comen;

 

Hoort voort wat ic hebbe vernomen.