Leven van Sinte Amand, patroon der Nederlanden. Dichtstuk der XIVe eeuw

[p. 54]

Hoe de .VIIJ. moncke Amand ende sine ghesellen scieden, ende elc ghinc prediken achter lande.

Ay, die dit wel hebben ghehoort

Spraken algader dese woort:
Onse Heere seghet: ‘“Die 't wel weet
Sijns Heeren wille, ende hem doet leet,
Hi sal seere te blouwen wesen;
Maer die knecht, die niet van desen
Weet, al verbelchti sinen heere,
Dien ne sal men niet blouwen seere.”’
Hier bi moghen wi verstaen
Dat dese woorden ons anegaen;
Want wi kennen Ons Heeren wille,
Dies laet ons doen lude ende stille
Sine begheerte in 't anscouwen,
Dat wy niet en werden te blouwen,
Met dusdanen woorden.’ Gode lof
Segghende sciet elc, ende nam orlof,
Ende elc ghinc daer ne d'avontuere brochte,
Ende daer hi salichede wrochte
Met predickene, ende met duechden groot,
Ende met martelien ontfinghen die dood
Some, ende eenighe waren mede
Die worden besittende bisscops stede,
Ende worden helighe confessoren;
Nu wilt van Sente Amande hooren.