|
| |
Hoe Amand verhiesch die pardoene, ende hoe hi herte hadde te Roome
te gane, in 't jaer van gracien....
Onse Heere Jhesus Christus sprac metten monde,
Tote Sente Pieteren t'heere stonden:
Tu es Petrus, et super hanc petram
Edificabo ecclesiam meam, etc.
‘Du best Pieter ende upperste vader,
Ic fundere up di algader,
1460[regelnummer]
Dat werc van der heligher kerken,
Ende ic gheloove di mede sterke,
Die slotelen van hemelryke.
Wat du binds up eerderyke,
Dat wart in den hemel ghebonden,
Ende wien ghi verlaet sine sonden,
| |
| |
Ende ontbint hier in dit leven,
Daer boven werdet hem vergheven.’
Hute deser heligher woorden cracht,
So hadde Sente Pieter de macht,
1470[regelnummer]
Ende was erdsch God ghecoren,
Ende alle die paeuse, nu wilt hooren,
Es van hem die selve macht bleven.
Nu hebben si som gracie ghegheven,
Ende haer hooghen der ontfaermicheden
Ontdaen up dat kerstinhede,
So dat si aflate ende paerdoene mede
Hebben ghelaten te menigher stede.
Maer een aflaet boven algader
Gaf een paeus, een helich vader,
1480[regelnummer]
Ligghende ten hoghen Roome binnen,
Daer hi teekene van grooter minnen
Toghede der kerstinen volke ghemeene,
Want die paerdoene ne sijn niet cleene,
Wie dattere ten salighen tide mach comen,
Als die jaerscare es ghenomen;
Drie zielen machiere quite halen,
Ende daer toe alle sonden betalen,
Die meinsche ter weerelt doen mochte,
Up dat hi quame met goeden ghedochte,
1490[regelnummer]
Ende met berouwenessen in die kerken,
Ende hi met ootmoedeghen serken
Gaen mochte, ende visenteren
Den helighen maertelaers ter heeren,
Sente Pieters ende Sente Pouwels stede,
Sente Michiels ende Sente Lauwereyns mede,
Sente Sebastiaens ende t'Onser Vrouwen,
Ende te velen anderen, daer men mach scouwen
| |
| |
Paerdoene, die sijn alle ghenoemt,
Ende hi Sente Jans te Latranen comt,
1500[regelnummer]
So en es mensche, die al vulseide
Van den gracien die waerhede,
Of die somme van den aflaten,
Die ons de helighe paeus heeft ghelaten,
Ende gheordineert te ondert jaren;
Maer daer naer, hoort mi verclaren,
Hevet die helighe kerke voorsien
Den menschen sulke crancheit ghescien,
Dat lettel yement so langhe leeft,
Die sine macht behouden heeft,
1510[regelnummer]
Die dese pardoene soude moghen behalen,
Ende daeromme, in warer talen,
Hebben sijt te .L. jaren gheset.
Waer bi ic ditte hebbe ghescreven,
Als Sente Amand moncs leven
Leedde, ende in die wostine
Ghedoghede penitencie ende pine,
Ende hier in hadde ghesijn .vij. jaer,
Ende .xxxj. jaer out was voorwaer,
1520[regelnummer]
So quam dat jaer van gracien in,
Ende lach ten ondert jaren meer no min.
|
|
Auteursrechtvrij