Het tresoor der Duytsscher talen

[p. 3]

De aenrichter dees boecx tot den goetvvillighen Leser.

WAt ick voor ghehadt hebbe, om tot den ghemeynen oorbor dit boeck aen te richtene, goethertighe Leser, can een yeghelijck, die hem om daer maer eens in te siene slechtelijck verleeght, by hem seluen haest bekennen. Niet wel en conste ick verdouwen, dat so mennighe mensche, so voor Rechte als anderssins (welck wij alle daghe onderuinden) so dickwijlen stonden als verbaest ende voor thooft gheslaghen, wanneer sy eenighe buytenlantsche woorden hoorden, het sy wt der Latijnscher spraken oft andere: de welcke ouer luttele iaren so verre waren te sueckene (ende sijn hem daerom onbekent) als sy nv op de tonghe rijden, ende worden ghemeyn. Om dan den desen te hulpen te commene, ende niet alleene den desen, maer oock den ghenen, die, al sijn sy anders oock gheleert, voor rechte niet vele en hebben gheweest, so hebbe ick alle gheschuymde woorden, die in ons tale niet thuys en behooren, veruolghens, na deerste letteren afgaende, hier gheset achter eene: al wat van eenen stam ende afcomsten is, coppelende by malcanderen: ende de selue in platten duytssche so wt gheleet, dat niemant, die hem met mijnen arbeyt

[p. 4]

wilt behelpen, noot meer en sal hebben, om eenich sins, in wat handel dat sy, doer sulcken middelen te worden vercort. Ick en meyne niet, dat ick eenige woorden achter ghelaten hebbe, die hier nootsakelijck waren geset: ten waren de ghene, die so verre int ghebruyck commen sijn, als testament, sacrament, instrument ende meer andere, datmense qualijck anders soude connen ghesegghen: oft al waert oock te doene, het ware buyten redene ende verstant. Dese wtghenomen, en wete ick niet datter yet is dat swaricheyt mocht maken, ghy en sullet hier vinden. Besight dan, goetwillighe leser, mijnen arbeyt so oorborlijck, als hy v mildelijck wordt ghegunt: ende helpt my ons moeders tale (die ghelijck tgout onder deerde leet verborghen) wederom so brenghen op de beenen, dat wy moghen bewijsen, so wy wel connen dat sy aen andere talen gheen onderstandt en behoeft te versueckene. Hier mede beuele ick v den Heere.