t'Vermaeck der jeught

Sangh.

Op de voys: Si cest pour mon pucellage of, Op mijn fluyt, wel op wy wille.

WAt mach toch de jeugt al rasen,
Van der minnen Godt verblint,
t’Is toch maer een dertel kint,
Wert gheacht een Godt der dwasen:
Vliet van my ghy blinde Godt
Ick heb toch met u de spot.

Schiet ghy lecker onghebonden

Vry met u schichten van loot,
Ick gheef u mijn herte bloot,
Ghy en sullet niet door-wonden:
Vliet van my ghy blinde Godt
Ick heb toch met u de spot.

Oft u schichten altemale

Waren van goet stael en stof

[p. 123]

 

Ghy bent veel te plomp en grof,

 

Ghy sult in u schieten valen:

 

Vliet van my ghy blinde Godt

 

Ick heb toch met u de spot.

 

 

 

Ick die nu in vryheyt leve,

 

En van herten ben gherust,

 

Zoud’ ick door een dertel lust

 

My tot slaverny begheve?

 

O neen: vliet ghy blinde Godt

 

Ick heb toch met u de spot.

 

 

 

Al durft ghy u selven noemen

 

Machtich boven Iovis sterck,

 

k’Acht u doen maer kinder werck:

 

Al u macht bestaet in roemen.

 

Vliet van my ghy blinde Godt

 

Ick heb toch met u de spot.

 

 

 

Hoe wel de min-ziecke sotten,

 

V als Godt veel eere bien:

 

Ick sal u in stee van dien,

 

Staegh beschimpen en bespotten.

 

Vliet van my ghy blinde Godt

 

Ick heb toch met u de spot.

 

 

 

Gaet nu als de kinders plegen,

 

Claeght u moeder vry dit leet,

 

Anders toch gheen raet ghy weet,

 

Ghy bent met u schicht verleghen.

 

Vliet van my ghy blinde Godt

 

Ick heb toch met u de spot.

Verkiest het Beste.

Morael.

Veel minnaers hier van Coridons gheslacht,
Wanneer sy sien dat haer ghedane clacht
In d’ooren wel: maer niet int hert comt binnen,
Waer door sy sien gheen troost voor haer te winnen:
En dat ontsegh ghedaen, wert haer begeert:
Haer liefd’ terstont in last’rich blaem verkeert.