t'Vermaeck der jeught

Liedt.

Op de wijse: Den tijt is hier.

IOnck-vrouwe soet
Ick min u om u deuchden,
Dus gheeft my moet,
Ick ben seer desolaet,
V doch eens spoet
Verquickt mijn hert met vreuchden:
Want vleys en bloet
Bycans gheheel vergaet,
Ick bid’ u lief gheeft tot mijn lyden raet:
Wilt my begheven// niet,
Die u gheheel mijn leven// biet,
t’Welck g’hier schreven// siet,
Mijn Trou met droef ghelaet.

[p. 120]

 

V ooghen clear

 

Die blincken als Christ’lijnen,

 

Doen my voorwaer

 

Schier doot zijn altemet.

 

V seer schoon haar:

 

V lipkens als robijnen.

 

t’Wesen eerbaer,

 

Daer ick meest heb oplet,

 

Door u manier, ben ick soo seer beset,

 

Dat ick geern sterven// sach,

 

Die hier heel int bederven// lach

 

Soo’k niet verwerven// mach

 

V lief, in Venus net.

 

 

 

Hierom wilt my

 

Int laeste converteeren,

 

Soo sal ick bly,

 

En in rouwe zijn niet.

 

Ghelooft het vry,

 

k’Sal niet als Theseus beeren,

 

Die door perty

 

Ariadnam verliet.

 

Cyrinas straf, en sal ick slachten niet,

 

Die met den sweerde// fel

 

Myrram heel verveerde// snel,

 

Ende begeerde// wel

 

Haer t’brenghen int verdriet.

 

 

 

Van dit gheslacht

 

Sal ick, O lief niet wesen:

 

Maer met verdracht,

 

Als Pyramus belaen:

 

Ofte met cracht,

 

Als Hercules ghepresen,

 

Die nae u tracht,

 

Sal ick te rug doen staen,

 

Ia oock gheen tijt, om lief by u te gaen

 

Sal onghelegen// zijn

 

Voor my, soo maer te deghen// mijn

 

Clacht mach beweghen// fijn,

 

V schoon maeghedelick graen.

 

 

 

Maer Och! ick mach

 

Dus wel te vergheefs claghen,

 

Want mijn ghewach

 

Wort van niemant ghehoort.

 

Nacht ende dach

 

Mach ick nae u wel vraghen:

 

Meer als ick plach,

 

Ick vrees ghy zijt verstoort,

 

En dat om een qualic verstanden woort.

 

Mocht nae begheren// och!

 

Ick my eens defenderen// noch,

 

By u vol eeren// doch

 

t’Sou my zijn groot confoort.

 

 

 

Waert dat ick mocht,

 

Als Dedalus ooc vlieghen,

[p. 121]

 

Recht door de locht:

 

Of als Leander snel,

 

Die zijn lief sach

 

Al over zee te cryeghen,

 

t’Welck hem ghebrocht

 

(Daer nae) heeft in ghequel.

 

Och! cond’ ick loopen, gelijck Acteon tel,

 

Ende verand’ren// my,

 

So soude ick oock wand’ren// bly,

 

Ghelijck de and’ren// vry

 

By u schoon liefken wel.

 

 

 

Prince.

 

Maer onghesont

 

O princeslijcke vrouwe,

 

Ende door-wont

 

Blief ick om u persoon.

 

Ick seght u ront,

 

Ick moet vergaen van rouwe,

 

Soo ghy niet jont

 

My uw ghenaed’ ydoon.

 

Geeft my uyt liefde’, des liefdens soete loon,

 

Soo sal mijn lyden// swaer,

 

My in’t eynde verblyden// maer

 

Set thoorn ter zyden// claer,

 

Soo staen mijn saken schoon.

Och, macht const blijcken.