t'Vermaeck der jeught

[p. 80]

Een ander.

Op de wijse: Cupido triumphant.

AEn hoort O liefste soet
(Seer gratieus van sinnen)
Mijn lijden doch eens boet,
En laet my troost ghewinnen
O lief// O lief!
Oft ick verbrand van binnen
Voor-waer// voor-waer,
Och! troost my, u dienaer.

Mijn hert dat is door-wont

O lief! met Venus strale:
Maer u lachende mont
Can ghenesen mijn quale
O lief// O lief!
Ghy zijt de principale,
Die mijn// die mijn
Can ghenesen, dees pijn.

Mocht ick u eens oprecht

Vertellen alle zaken,
Hoe dat ick ben ghehecht
Al door dit vierich blaken
O lief// O lief!
Ghy zoudt wel conen staken
Den brandt// den brandt,
Die Venus in my plandt.

Mach ick O Eedel greyn

Van u gheen troost verwerven:
By Pyrami Fonteyn
Sal ick van rouwe sterven,
O lief// O lief!
Mijn hert al daer door-kerven
Met t’sweert// met t’sweert,
t’Welck mijn jonck leven deert.

Ten sal u baten niet

(Reyn mondeken sucadich)
Als ick (door dit verdriet)
Moet sterven onghenadich,
O lief// O lief,
Zijt nu doch wel beradich,
Comt voort// comt voort
Gheeft my een troostlick woort.

Lief u reyn ooghen claer

Die blincken, als Christale,
V lipkens zijn voorwaer
Soo root, als een Corale,
O lief// O lief,
Zeer vriendelijck ter tale,
In deucht// in deucht
Zijt ghy, die’t hert verheucht.

[p. 81]

 

Ghy zijt van lit, tot lit

 

Suyver ghelijck Diane:

 

V halseken seer wit

 

Dat is ghelijck een swane,

 

O lief// O lief

 

Ick en can niet vermane,

 

t’Sieraet// t’sieraet

 

Dat u oock seer wel staet.

 

 

 

Wout ghy (O Eedel vrou)

 

Mijn liefde eens ghedencken,

 

En dat ick u mijn Trou

 

Wt liefden eens mocht schencken,

 

O lief// O lief

 

Al door Vrou Venus wencken

 

Ghereet// ghereet

 

Zou blussen mijn brant heet.

 

 

 

Want door vrou Venus cracht

 

Wort mijn hayr af gheschooren:

 

Ick verlies al mijn macht,

 

Den moet gheef ick verlooren,

 

O lief// O lief,

 

Mach ick gheen vreucht orbooren,

 

Seer saen// seer saen

 

Sal al mijn jeucht vergaen.

 

 

 

Ick hope noch den dach

 

Dat ick sal troost ontvanghen,

 

Dan sal sonder verdrach

 

Ick blussen mijn verlanghen,

 

O lief// O lief

 

Neemt tot my eens u gangen,

 

En wilt// en wilt

 

My haest vertroosten milt.

 

 

 

Prince.

 

Adieu Princesse soet,

 

Wilt my reyn liefde toghen

 

Dan sal ick metter spoet,

 

V lief altijt verhoghen,

 

O lief// O lief,

 

En my tot uwaerts poghen,

 

Ionck-vrou// jonck-vrou

 

Blieft my in liefd ghetrou.

Ick hoop, en volherdt.

Ter eeren van u,
Om wien t’hert treuren// moet,
Om dat ghy (als nu)
My gheen Faweur en// doet.