Omme die declinatie recht te ghebruycken.
TEn eersten salmen weten dat de Sonne tweemael des Jaers inden Equinoctiael is, als namelijck den xxiij. September ende twintichsten Maert, ende vanden twintichsten Maert tot den dryentwintichsten September gaet de Sonne by noorden den Equinoctiael. Vanden xxiij. September totten xx. Maert gaet de Sonne by Zuyden den Equinoctiael, ende als ghy de Sonne met uwen boghe oft instrument meten wilt, sult ghy de Declinatie van t'selfde Jaer nemen, ende besien hoe veel graden op den selfden dach gheteeckent staen: is de Sonne ouer de noortzyde den Equinoctiael, soo sult ghy soo veel graden ende minuten tot v ghemeten hoochte toedoen als v op dien dach gheteeckent staen, ende sult alsdan hebben de oprechte hoochde des pools oft leyden: Maer als de Sonne ouer de Zuytsyde des Quinoctiaels gaet, sult ghy soo veel graden van v ghemeten hoochte af trecken als v Declinatie op dien dach wijsen sal: Ende dit seluighe sult ghy met den Sonnenboghe oock doen. Ende dese Declinatie hebbe ick int Oosterboeck willen stellen, op dat de ghene die met de nieuwe Declinatie niet ghenoech ghedaen en sijn, moghen in alles voldaen sijn, nochtans niet tot verminderinghe ende verachtinghe vande nieuwe ende voorgaende, die ick voor goet ende d'alder perfecxte houde, maer om dat die Zeevarende haer oude vsantie ende heercomen niet gheerne en veranderen, al waert oock saecke dat sy wisten dat daer eenighe feylen oft ghebreken in ware: Daerom ick al hier by den ghene die hem de sake verstaen gheexcuseert wil wesen, ter versekeringhe van die Zeevaert, als ick door experientie nu hebbe ondervonden.
Auteursrechtelijk beschermd
