Beschryvinghe van t'Nieuwe diep na Stattijn ende Missonda opstreckende. Voort vande custe van Meeckelenborch, Lubeck, die Belt, Groenzondt ende Moen, met alle haer gheleghentheden, etc.
EErst om t'Nieuwe diep in te zeylen, soo gaet van Jasmout zuydt zuydtoost tot dat Paert oft den Bock (welck een Bosken boomen is) twee mylen, gaet alsdan een mijl zuyden, ende dat gat streckt in zuydt zuydtwest, ende is vlack water binnen ende buyten: Ende men slaet aen de rechter hant op naer Mezonde, ende aen de slincker hant na Stattijn, ende is al meest wijt vlack water. Ende Grypswolde leyt int innecomen recht voor v op een Riuierken.
Item by Doorenbos loopt de Jolle in, ende wie daer ouer wil die zeylt tusschen t'landt van Barts ende t'landt van Ruyghen in, ende tis daer seer ondiep tot dry oft vier ellen alleen tot cleyne Boyers dienende: maer men loopt daer oock na Missonde. Tot Barts gaet mede een cleyn diepken in alleenlicken tot Boyers ende ander cleyne schepen dienende.
Item van Witmont tot Rostwijck twaelf mylen z.w. ten w. ende is een laet-plaets voor Boyers. Van Roswijck totter Wismer seuen mylen zuydtwest, ende daer gaet een schoon diep in voor alderley schepen. Van Terwissmer tot Lubeck ist eerst west zuydtwest, ende na z.w. ten z. ende gaet oock een goet diep in voor groote schepen, ende is diep op de banck ses ellen waters. Daer is oock eenen grooten inwijck oft een goede hauen , al waermen voor alle winden, wtghenomen eenen noordtoosten of n.n. oosten wint seker ligghen mach. Van daer na Femeren ist zuydt zuydtwest ende noordt noordtoost acht mylen, daer gaet dan de Belt tusschen Langhelant ende Lalant in. Van Lalant schier een Riff af op een mijl aen Langhelant. Ende als den toren van Mascou noordtoost van v is, soo comt ghy teghens dat Riff, maer zeylt aen Langhelant op vijf vadem, soo moecht ghy Lalants haecke niet bezeylen: ende als den toren oost noordtoost van v is, soo sijt ghy dat Riff voor by, ende is dan v cours noorden lancx Langhelandt tot Sproy.
Item onder Muen is goede anckergront aen beyde syden, maer aen den noorder cant loopt een Riff af, daermen achter ligghen mach, maer aen de zuytsyde machmen op seuen oft acht vadem beschut ligghen voor eenen oosten noordtoosten ende een n.w. wint, ende dat vant n.o. tot dat n.w. toe. Het is daer al schoon dicht by den hoeck alsmen hier sien mach. Ende Geester-Riff leyt vanden hoeck van Muen z.z.w. ses mylen.
Dit voorsz. Landt van Meeckelenborch leuert wt veelderhande Bieren, als namelicken Mezons, Roswijcker ende Lubecx Bieren: Dan beneffens dien comter oock veel Rogghe, Tarwe, Talch, Hout ende Vellewerck van daer. T'lant te Rugen (hier mede onder gheleghen) leuert veel Rogghe wt. Femeren is wel die voornaemste plaetse, soo van Tarwe, als van Garste, Mout ende dierghelijcken. Daer teghens ouer leyt Lalandt, daer altemet doch weynich Garst ende Mout wtghevoert wort.
Auteursrechtelijk beschermd
