Beschryvinghe vande custen van Pomeren, met alle de gheleghentheden van dien.
INden eersten van Vernoerde tot Rijghshooft ist vijf mylen, ende van Rijghshooft tot Serucknesse ist dry mylen, ende inde strant is een afwaterken, hem in een groot binnewater verdeylende. Van daer tot Liba ist vijf mylen, ende gaet een diepten in ghenaemt de Osse. Daer by Oosten ligghen sommighe stobbekens op t'landt, ghenaemt de Wolsacken. Van daer tot Reeffcol (t'welcke eenen hooghen berch is, daermen het landt by kent) ist vier mylen. Van Reeffcol totter Stolp oft Gershooft ist vier mylen, ende daer gaet oock een Riuierken in voor cleyne Schepen. Van Gershooft tot Ruwolde ist dry mylen, ende gaet een diepken in, ghenaemt de Wipper, diep vier ellen. Van Ruwolden tot Colsberghen ist seuen mylen, ende streckt mede een diepken in, ghenaemt de Rading. Van Colsberghen tot Jasmont ist twaelf mylen, ende ligghen verscheyden Oost ende West. Zuydtoost ende Noordtwest van Colsbergen leyt Bordolm, daer rontsomme goet ancker gront is. Die Ertholmen ligghen van Bordolm Noordt noordtoost twee groote mylen.
Op dese voorsz. Custen van Pomeren leyt Stattijn de vermaerste Coopstadt, van waer dat veel Terwe, Rogghe, Gherst, Mout ende Mezons Bier comt. Maer daer leyt oock een Eylandt ghenaemt Ruyghen, 't welcke tot sommighe tyden veel Rogge wt leuert, dan meestendeel door den inwoonderen inghehouden wert.
Auteursrechtelijk beschermd
