Beschryuinghe van t'landt van Pruyssen, daer inne Danzwijck de vernaemste coopstadt is.
INden eersten om van Heel na Danzwijck te zeylen, gaetmen na t'slodt Termonde zuyden ende z. ten w., ende het oude gat comt van by oosten in, ende men zeylt tusschen twee tonnen door tot binnen de kisten, al waer noch een nieu gat neffens de voorsz. kiste instreckt, t'welcke nu seer goet voor boyers is. Item van Heel tot Conincxbergher-diep seyltmen recht oost, ende daer gaen ghemeynlick twee gaten in, te weten een by t'hooghelant van Hannekeheers z.z.o. ende het andere o. ende o.z.o. maer men mach daer gheen rekeninghe op maecken, alsoo het alle Jaers verandert, ende nu z.o., dan z.z.o. innegaet. Daer is een groot binnewater, ghenaemt het Haff, dat deylt hem aen twee weghen, het een naer Meluing ende het ander naer Conincxberghen. T'gat naer Meluing streckt z.z.w. ende zuyden ten westen, ende naer Conincxberghen oost ten noorden ontrent ses mylen.
Item om van Rijghshooft naer Dermemel te zeylen, is de rechte cours n.o. ten o. twintich mylen, ende dat diep is stijf twee vadem, ende alsmen binnen is, soo wijcktmen westwaerts op, ende settet om den hoeck vande strant op vijf vadem. Ende zuydtwaerts op leyt een groot Haff, daer streckt de riuiere vande Memel op in t'lant van Lettauwen, daer veel Vlas van daen comt. Daer streckt oock een Riuierken door naer Conincxberghen, alsoo dat daer veel binnewateren sijn.
In dit voorsz. Vorstendom van Pruyssen sijn gheleghen vijf vermaerde Coopsteden, als Danzwijck, Weluing, Bruynsberghen, Conincxberghen, ende der Memel, onder welcke de vernaemste Coopstadt is Danzwijck, al waer daghelicx ouer de duysent last Weyte ende Rogghe verhanteert wort, oock mede Hout, Peck, Teer, Vlas, Hennip, Jopenbier, ende andere costlicke waren die ontallick zijn. Welcke voorsz. waren Weluing ende Bruynsberghen mede met menichte wt leueren, Conincxberghen (al waer de voornaemste stapel van Delen, Claphout ende Waghenschot is) leuert beneffens dien oock veel Tarwe, Rogghe, Vlas, Was, Hennip, Peck, Teer, Assche, ende dierghelijcken, in sulcker menichte datse mede wel een vande vermaerste ghenaemt mach worden: Insghelijcken Dermemel, daer voornamelick het Vlas van daen comt, ende leuert oock (als Conincxberghen) alderley waren wt. Maer om elcx ende int byzonder te beschryuen is niet wel mogelijcken, dan alleenlicken datmen bekennen ende besluyten moet, dat het een vol ende ghebenedijt Landt is, welcke Godt de Heere bouen haren nabueren ende andere Landen gheseghent heeft.
Auteursrechtelijk beschermd
