Beschryuinghe van Oossel, het welck tusschen de Oostersche ende Rijchsche Zee leyt, ende met eenen enghen inganck naer Righ ende Parnout streckende is.
INden eersten van Doemesnes tot Runnen zeyltmen oost ten noorden ses mylen. Van Runnen tot Abbrijck ist ses mijlen, ende daer ontrent ligghen veel dwaelgronden inden vaerwech van dry oft vier vadem. Ende alsmen om Doemesnes zeylt, soo machment wel sien ligghen een groote mijl van Oossel: Ende daer by westen leyt Abberborch, t'welcke een laet-plaetse is van Garst, Mout, etlick Teer, Vette waer ende alderhande Velle-werck. Van Doemesnes loopt een quaet riff af seer schor ende steenich, ende streckt in Zee noordtoost, ende noordtoost ten oosten wel een mijl lanck. Van Doemesnes tot Oossel op de ree noordtwest, ende noordtwest ten westen dry mylen, ende is daer goet anckergront op seuen vadem diep. Daer streckt een riff vant zuydteynde van Oossel af wel twee mylen in Zee zuyden ende zuyden ten westen, welcke seer hert ende breet is. Item by westen dat riff ligghen veel dwaelgronden die om de noordtlant Oossel streckende sijn, tot sommighe plaetsen niet dieper dan twee, dry, vier ende vijf vadem, ende so voortaen: Ende daer sijn noch twee hauenen oft laet-plaetsen op Oossel, als Wijck, ende noch eenen by noorden Wijck vijf mylen. Item acht mylen by noorden Wijck leyt Hontsoort, ende van daer ses mylen noordt noordtwest leyt Dageroort, daer eennen hooghen toren op staet, diemen aen beyde zyden van t'lant sien mach. Tusschen beyde de voorsz. hoecken zeyltmen inde Hontwijck, t'welck eenen boosen inwijck is, door dien daer veel schepen (om datse daer niet wel bekent en zijn) verdolen.
Item om noch eenmael te weten t'innecomen van Moenzont, soo sult ghy van Runnen af zeylen noorden, ende noorden ten oosten tot dat noordteynde van Oossel, ende is thien mylen, maer wacht v voor dat Pater noster dat vanden hoeck van Oossel af leyt, ende alsmen om den hoeck is, soo salmen een cleyn Eylandeken sien datmen aen stuerboort laet, ende loopt tusschen dat landt van Oossel ende dat Eylandeken door, daer het acht vadem diep is, dan gaetmen noordtwest, tot datmen noch een ander Eylandt aen stuerboort van hem sal hebben, t'welcke van v leyt alst ander Eylant daer twee oft dry groote boomen op staen, maer hout dat lant van Oossel, tot dat ghy eenen grooten boom siet, de welcke (als ghy voor by sijt) wert ghy aen backboort sommighe Eylandekens ghewaer, die ghy een half mijl aen backboort laten sult. Hier moecht ghy alderbest sien aen t'Compas hoe dat alle raecken van dit gat strecken. Oossel is een ruych landt, ende seer onbekent alsmen buyten op de Cust is.
Item soo is hier oock een deel van Courlandt in begrepen, daer Der-Winde de vermaerste stadt van is, ende weynich vande Zeevarende luyden bekent: Dan alleenlicken datter altemet een Boyer oft twee met Claphout, ende Waghenschot gheladen wort.
Auteursrechtelijk beschermd
