Beschryuinghe van Rhyga ende Parnout, met alle hare gheleghentheden.
TEn eersten van Domesnest tot Runnen zeyltmen oost, ende oost ten noorden ses mylen. Van Runnen tot dat noordteynde van Oossel, daer die Moenzont in gaet noorden, ende noorden ten oosten thien mylen. Van Runne tot Kijn oost noordtoost acht mylen. Van Kijn tot Parnout noordtoost ten oosten seuen mylen, ende t'gat is daer diep dry oft vier ellen: want het altemet verloopt, ende is goet voor cleyne boyers. Daer leyt noch een stedeken tusschen Parnout ende Rhyga, ghenaemt Salles, al waer een droochte voor t'gat leyt, ende tis voor cleyne boyers diep vier ellen.
Item van Runnen tot Dunemont, van Rhyga ist twaelf mylen zuytoost. De mercken om dat Duyns in te zeylen zijn als een wachthuysken dat een weynich van t'slodt tot Dunemonde staende ouer een grooten Boom comt, ende dat zuydteynde vande stadt van Rhyga, ende den hoeck vanTerspijlle ouer een comt, t'welck de rechte merckteeckenen sijn om een stuck in te zeylen: Ende alsdan moetmen altemet wat zuydtwaerts op wijcken, tot datmen comt tusschen beyde landen, ende kiest dan het zuydelandt tot den hoeck van Terspille, al waermen ouer al op seuen oft ses vadem setten mach, ende is lootsmans water, daeromme dat het meest alle Jaer verandert. Item vier mylen by zuyden Doemesnes leyt mede een afwaterken, ende daer laden wel cleyne Boyers.
In dese twee voorszeyde plaetsen is ouer dertich oft veertich Jaren groote handelinghe van alderley costelicke waren gheweest: Maer door den gheduerighen crijch vanden Moscowyter meest al vergaen. Doch is tot Rhy noch een weynich handelinghe, alsoo datter des Jaers noch wel dertich oft veertich schepen met sout ontladen, ende wel hondert af gheladen werden mit Tarwe, Rogghe, Claphout, Waghenschot, Was, Vlasch, Hennip, Peck, Leer, soute ende drooghe Huyden, Schaepvellen, ook Pelterye ende dierghelijcke costelicke waren.
Auteursrechtelijk beschermd
