Beschryuinghe van Lijflandt ontrent Rheuel, ende de Maenzont met alle haer ghelegentheden.
INden eersten van Nargen naer de tonne ist oost ten zuyden een groote mijl. Vande ton tot Rheuel ist twee groote mylen. Ende vant Eylant van Woijzont leyt een clip, ende als den toren van Rheuel comt ouer t'eynde vant Eylant, soo ismen neffens de clip, die van t'lant van Wolfsont een half mijl noordtwest af leyt. By oosten Wolfzont ligghen twee Eylandekens ghenaemt Wranghen, daer machment setten op thien vadem. Daer leyt oock een blinde clip noordt noordtwest anderhalf mijl daer af, met noch een blinde clip daer by noorden een half mijl vant voorsz. Eylandt, ende de Lijflantsche zyde is daer al schoon.
Item om van Oetkes-holm te zeylen inde Muyenzondt, salmen aengaen zuydt z.w. ende zuydtwest ten westen, tot datmen comt binnen de Osseholm, Ende Grasholm leyt binnen de Osseholm een mijl, al waermen rontsom zeylen ende setten mach. De Grasgront leyt een mijl binnen Grasholm mitswater, maer hout de zyde vant lant van Gybrichsnes oft Dageroort passelicken by de Eylandekens lancx, ende gaen van Grasholm binnen alle de Eylanden zuyden ten oosten ende zuyden, tot datmen comt aent westlant oft aen t'lant van Oossel tot eenen grooten boom, daer het diep is vier vadem, ende het wert altemet droogher tot dry vadem. Dan by het lant van Oossel lancx streckt het zuydtoost ten oosten wel vier oft vijf mylen, dan comt ghy by een cleyn Eylandeken, daer ghy tusschen dat Eylandt ende t'lant van Oossel door loopt, tot dat ghy teynde van Oossel hebt, ende tis daer diep acht vadem. Vant eynde van Oessel leyt dat Pater Noster af een half mijl, t'welcke ghy schouwen moet: dan moecht ghy weder zuyden aengaen naer Rhuynen op t'Rhijchsche Vaerwater, t'welck thien mylen van daer leyt.
In dit voorsz. Landt is Rheuel de vermaerste Coopstadt, de welcke ouer dertich Jaren bouen maten plach te floreren, alsoo dat daer alle Jaers ouer de hondert groote schepen met Sout gheladen pleghen te lossen, ende met Tarwe, Rogghe, Wasch, Vlasch, Hennip, alderley Vellewerck ende dierghelijcke costelicke waren wel gheladen mochte worden. Welcke door de ghestadighe oorloghe vande Moscowyter alsoo heeft afghenomen, datter nauwelicken ses schepen int Jaer moghen laden, tot groot bederf des voorsz. Stadts ende Landts.
Auteursrechtelijk beschermd
