Beschryuinghe van Wyborch der Neruen, teynden van die Ooster-Zee: midtsgaders de gheleghentheyt van dien.
EErst van Hooghelant tottet Eylant Somere noordtoost wel soo oostelick ontrent neghen mijlen. Van Hooghelant tot het Eylant Putsvager noorden ten westen: al daer machmen binnen de Sweetsche Scharen zeylen al waer men wil. Van Putsvager tot Somere oost, ende oost ten zuyden. Van Somere tot die roode Helle noordtoost ende noordtoost ten noorden. Daer ligghen twee clippen int Vaerwater aen backboort, ende heeten die Ooster ende Wester Visscher. Vande roode Helle tot Tralesont ontrent noordtoost twee mijlen: dan van d'een baken tottet ander noortoost crom om ende wederom, tot die stede van Wyborch toe, al waer d'Ooster Zee eynde neemt. Somere leyt aen die russe syde, daer teghens ouer ligghen die Scharen van Oost Finlant.
Item van Hooghelant tot der Neruen zuydtoost thien mijlen. Ende men laet het Eylant Tutters aen stuerboort: als ghy voor der Neruen comt, soo staet daer eenen mast met een ton op die strant, dat houtmen ouer een houten slodt, ende zeylt alsoo aen die voetstrant tot binnen de Riuiere vander Neruen.
Item der Neruen kentmen by die ronde berghen op de zuytzyde van de rede, ende het is van daer tot Eeckholmen west ten noorden xiiij. mylen. Ontrent noorden ende noorden ten oosten van t'Elsborch ligghen de clippen van cleyne ende groote hoften, hebbende veel ondiepten daer een schip hem voor wachten sal. Van groote hoften loopen die calck gronden af lancx der Zee van twee ende dry vadem, bycans tot die Eeckholmen toe: Ende onder Eeckholmen is goede rede, ende is rontsom schoon gront. Die Lijflantsche syde is al schoone strant tot der Neruen toe. Item daer leyt een clip noordtwest ten westen van Hooghelandt onder water ontrent dry mijlen van lant, ende ist niet dieper dan twee vadem.
In dit voorsz. deel des Landts van Ruslant ende Sweden heeft in voortyden niemant moeten handelen, dan alleen die van Lubeck, door dien datse den handel alleen hadden seer rijck gheworden waren, ouermidts dat daer veel costelicke dingen int lant was, als alderley Pelterye, Hennip, Vlas, Was, Talch, Tarwe, Rogghe ende dierghelijcke Coopmanschappen.
Auteursrechtelijk beschermd
