Beschryuinghe vant wterste deel van Jutlandt, dat met een poinct opt wterste vande Noortzee tegehens Noorweghen ouer gheleghen is.
INden eersten om van Schaghen naer Sebuy te zeylen, is de rechte cours z. ten w. ses mylen, ende daer by zuyden ligghende dwael-gronden twee, dry oft vier vadem diep, maer inde Kil ist vijf oft ses vadem diep. Van Sebuy tot Hals, dat is eenen plompen toren, z.z.w. ende z. ten westen vijf mylen, ende daer by oosten gaet de riuiere van Aelburch in, ende daer ligghen twee tonnen int gadt, ende staet eenen toren ghenaemt de Hals op de noortzijde, Aelburch leyt int lant dry mylen: Ende twee mylen oostwaerts van Aelburger diep leyt die Zweterijn, is een ondiepte van ses oft seuen vadem: ende die Beltwerts in wil wesen moet daer ouer, ende de Kil is daer thien oft elf vadem diep. Lezu is rontsomme vlack wel een mijl van lant dry vadem: maer opt zuyteynde ist wel twee mylen van lant maer dry vadem diep, ende is rontsom vol reuen van een, twee ende dry vadem waters. Maer vant zuydtende (daer de Kerck op staet) loopt een riff af oost in Zee wel twee groote mijlen, men mach daer onder setten op ses oft seuen vadem voor eenen z.z.o. wint. Vant Noorteynde loopt mede een riff af een mijl in Zee. Ende vant selfde eynde leyt de Trindel af n.o. in Zee dry cleyne mylen, ende is een droechte van een morghen lants groot, ende daer en is gheen vier voeten waters op, maer daer leyt altijt een ton op de noortoost kant, op dat de Schepen (die van Schaghen af comen) daer niet op en zeylen. Het is van Schaghen tot den cleynen Helm z.z. west vier mylen, ende men mach daer rontsomme zeylen, want het is vlack water op vijf vadem oft daer ontrent, ende van Schaghen tot die Trindel zuydt oost wel soo oostelijck ses mylen.
Item die by nacht om Schaghen comt, ende wil inde Zont wesen, die brenghe dat Vier oft die Vierboet eerst z.w. ten w. van hem, aleer hy z.o. aenzeylt: ende die Vierboet staet dan midden in dat Oostersche dorp, dan ismen ruym ghenoech om dat riff van Schaghen, ende is by nacht een ghewis merck. Item alsmen de Sont by nacht wtcomt ende men wil om Schaghen, soo brengt dat Vier eerst z.z.w. van v, eer ghy om Schager riff op lueuet naer Hartzhals toe, ende als dat Vier z.z.w. van v is, so staet de Vierboet een spaeck lengte by oosten dat oostersche dorp, dit sijn goede mercken om by nachte om Schaghen te zeylen.
Item die by nacht om Schaghen comt wacht hem voor de Boltstroom als daer veel oostlijcke winden waeyen: want ghy haestlicken onder Noorweghen (daer het diep is) ghedreuen souden worden, waer op seer wel dient ghelet te worden.
In dit voors. lant is Aelborch de voornaemste Coopstadt, al waer veel Garste ende Mout, oock sommighe Huyden, Talck ende dierghelijcken van daer comende is: Maer de buyten custe na de Noortzee gheleghen, is een hert ende periculose strant daermen hem wel voor te wachten heeft, want daer veel Schepen op blijuen, aenghesien daer gheen hauenen oft reden en sijn.
Auteursrechtelijk beschermd
