Beschryvinghe van het landt van noordtoosten, waer inne Maesterlandt de voornaemste stadt oft hauen leyt.
TEn eersten om na Maesterlandt te loopen, moetmen van Schaghen af zeylen oost noordtoost, tot datmen een hooghe ronde clip oft berch (ghenaemt Bretto) siet, daer op men oost noordtoost zeylt, so langhe men dat Pater noster siet, t'welck men aen backboort van hem laet. Ende alsmen aen t'landt comt, sal hem t'gat van Maesterlandt openen aen de Zuydtsyde in streckende oost, ende oost zuydtoost: Dat Eylant daer de mast oft warder met de tonne op staet, die laetmen aen stuerboort, ende alsmen aen den hoeck comt, soo sietmen de Stadt voor hem ligghen, ende maeckt een tou aen de kaen vast, ende een ancker t'Zeewaerts. Ende men mach by zuyden wederomme in Zee loopen door twee oft dry gaten.
Item Calfzont zeyltmen by een groote clip in, ende staet een warder op, ende t'selfde gat zeyltmen oock in na Koeyhol ende Bahuys. Men mach oock binnen de clippen door zeylen na de Riuiere van Nijlues, ende aen de oostsyde van de Riuiere ist vast landt, ende men machse open in sien: Ende daer leyt een ruych Eylandt voor datmen aen backboort laet, ende settet onder dat Eylandt op vijfthien oft sesthien vadem. Ende de hauen hiet Reeffzondt.
Item twee mijlen by oosten Reeffzondt leyt Malezont, een Eylant datmen rontsom zeylen mach: Ende Coensback leyt daer af oost noordtoost twee mijlen. Daer leyt noch een hauen by oosten ghenaemt Monsterzont, daer Waersberch by zuyden leyt dry mijlen. Die in Waersberch wil zeylen, die laet dat slodt aen de zuydtzyde van hem opt vaste landt, ende zeylt midtswater tusschen het Eylant ende Oostlandt in, t'eylandt naest om de blinde Clippe die vanden oosthoeck af leyt. Vanden hoeck vant Eylandt leyt oock een clip onder water, ende alsmen daerinne is, soo machmen die noortzyde wel naest zeylen ende aldaer setten, want het al vlack water is vijf ende vier vadem diep.
Dese voorsz. Landen behooren eensdeels onder den Coninck van Sweden, ende oock onder den Coninck van Denemercken. Ende leueren wt alderley Vette-waer, Huyden, Vellewerck, Garste, ende in sonderheyt veel Hazenoten.
Auteursrechtelijk beschermd
