Beschryuinghe vant noorderste deel van die oost-cust van Noorweghen, ende alle zijn gheleghentheden.
INden eersten om t'gat van Tromzont in te zeylen, zeyltmen achter t'landt van Maerdou in, ende is een schoone vaert: Ende aen de noortzyde staen twee warderen op eeenen hooghen berch, al waermen mach setten, ende achter t'lant om in Mardou zeylen.
Item om in Ocxevoert te zeylen, soo zeyltmen dicht by de clippe van Tromzont lancx, ende streckt eerst n. in: ende de lange clippe laetmen aen backboort ende zeylt al n. in: Ende een weynich daer in comende, so leyter een blinde clippe in t'gat, diemen aen stuerboort ligghen laet, ende also inzeylt tot om den westerhoeck, daer oock een clip dicht aen den hoeck onder water leyt, streckende van daer west ende west ten n. in tot Hoogelant aen den noortzyde, daer de warder op staet, ende settet daer op xx. oft xxv. vadem.
Item tusschen Ocxevoert ende Santfoert leyt Longhen, ende daer staet eenen mast met een tonne op de oostzijde, ende Santfoert leyt daer twee mylen by oosten, ende neffens Santfoert leyt een banck in Zee, ende is tot sommighe plaetsen niet dieper dan dry oft vier vadem, ende eyndicht by West-kiel. Item West-Kiel streckt in n. ende men loopt dicht by de wtclippen vant Jofferlant in, ende men mach achter t'Jofferlant om zeylen oft setten op xv. oft xx. vadem vant Oosteynde van Jofferlant tot Langezont n.n.o. een groote mijl. De Conincxhauen streckt in n.n.w. ende is daer diep xxx. vadem, ende men zeylt by een rughe hoeck in, daer de Baers van af leyt. Ende wilt ghy inde Nesse wesen, soo laet ghy de groote clip (daer de warder op staet) aen stuerboort, ende zeylt soo tusschen t'lant van oude Langhezont ende de voorsz. clip door tot inde Nesse, om dat rughe Eylant, ende settet daer op xx. oft xxx. vadem.
Item van Langhezont tot Farder zeyltmen o.n.o. ende daer tusschen leyt de Laentijck, Stauanghe ende Thonsberghen. Item van Farder tot Bas n. ende van daer zeyltmen tot Ansfloo, Coperwijck ende t'Zoenwater, tusschen de Lammeren door tot in Braeckenes, ende is een drooch afwater daermen de Delen principalijcken is saghende.
Item den hoeck van Roeghe leyt van Farder n.n.o. vier mylen, de Susters ligghen van Farder n.o. ten n. dry mylen. Dat Eylant van Aeckerzont leyt van daer noordtoost vijf mylen. Item in dese gheleghentheden oft contreyen ligghen de hauenen vant lant van n.o. daer nu ter tijt de principale Harinckvanck is, die in Maesterlant plach te wesen.
Wt alle dese hauenen comen de Delen van Masten ghesaecht, groote ende cleyne Masten, voorts Sparen, Caprauens, Barckuenen, Banthout, Barnhout ende ander dierghelijcke Hout-wercken.
Auteursrechtelijk beschermd
