Beschryvinghe vant noorderste deel van Enghelant, vande welcke de riuiere van Nieu-Casteel de vermaerste hauen is.
TEn eersten van Scherenborch tot Withbuy noordtwest ten westen vier mijlen, ende tis een Riuiere oft tye hauen. Aen die zuydtsijde vande hauen loopt een riff af een half mijle in Zee. Die in Withbuy wil wesen, die sal tusschen twee bakenen in zeylen, tot datmen comt tusschen beyde Landen daermen niet wel vlot liggen mach. Van Withbuy tot Hertepoel seuen mijlen, ende daer by westen gaet eenen grooten inwijck, ghenaemt de Teese, t'welck een schoone hauen is, instreckende west zuydtwest, int midden vande hauen ist diep dertich vadem: maer int innerste voor Stockton ist diep vier vadem.
Item seuen mijlen by noorden Hertepoel leyt den wthoeck van Sonderla. Van daer twee mijlen noordtwaerts leyt het Casteel van Tinmuyden, al waer by zuyden de Riuiere van Nieu-Casteel in strect. Die marcken sijn dese: Men sedt twee viertoornen, ende een Bossch boomen ouer een, ende zeylen t'gat alsoo wt ende in, tot binnen het Dorp daert diep is dry vadem en half, het is int innecomen met half vloet twee vadem. Van Tinmuyden tot Cogghen-Eylandt seuen mijlen noordt noordtwest, t'welck men rontsomme zeylen mach, ende rede maken op vier ende vijf vadem.
De traffijcke ende handelinge van dit voorsz. deel van Nieu-Casteel, is soo groot ende ouervloedich van Smeedtcolen, die van daer in alle Landen gheuoert worden. Gheeft oock wt Garst, Tarwe, Mout ende groue Laeckenen.
Auteursrechtelijk beschermd
