Beschryuinghe vande Hommer van Lint, Hul, Philo, ende Scherenborch met d'ondiepten van dien.
EErst om buyten de Welle na t'diep van Lint te zeylen, die houde den langhen stompen toren tusschen de twee langhe toornen, soo zijt ghy int rechte Vaerwaer van Lint. Als Capelle dan oost van v leyt, ende de boomen ouer d'innerhoeck by westen Capelle comt, gaet dan in zuydtoost ende zuydtoost ten zuyden na d'eerste ton, soo sijt ghy int Ooster-diep van Lint dan zuydt zuydtwest, ende zuydt ten westen tot d'eerste baecken. Van daer tot de tweede baecken z.z.w. Ende voort tot dat derde baecken z.w. ten zuyden Van daer voorts tot de twee tonnen z.w. ende z.w. ten w. tot om den hoeck van t'landt: van waermen door de zanden loopen mach int wester gadt, ende zeylen t'selue by de tonnen ende mercken wederom wt. Ende t'selue wester gadt streckt in Zee noordtoost, ende n.o. ten o. Ende soo yemant in Bolstons diep begheerde te zeylen, die sal t'lant van Slegnesse aen boort loopen, ende zeylent dicht aen de voetstrant in, soo machmen Ellen-knock niet bezeylen. Als de dry boomen by z. Somkal oft de scherpe toren sijn, soo leyt Ellen-knock t'Zeewaerts van v, soo machmen op dry vadem om t'landt van Leck lancx zeylen tot de riuiere Bolston. Men mach tusschen Ellen-knock ende Langhesandt wederom in Zee loopen op dry vadem, ende streckt o.n.o. in Zee.
Item om op t'Hul-water te zeylen, die sal by den noorden hoeck van Rauenspurre in zeylen, want aen de Zuydtsyde ist vlack, ende alsmen een stuck binnen is, soo salmen naer d'ander syde over wijcken voor Grimby achter de banck, ende settent aldaer op ses, seuen vadem. Wiltmen inwaerts wesen voor Hul, soo salmen aen de zuydtzyde lancx zeylen w.n.w. ten eynde vant Sandt, ende wijcken dan n.waert op inde riuiere van Hul: t gadt van Hul streckt van buyten in w.z.w. ende west ten zuyden.
Item Barilton leyt in eenen inwijck, men mach daer ryden voor eenen noorden ende noordtwesten wint. Dry mylen by noorden Flamborch leyt d'inwijck van Phila, men mach tusschen t'hooft van Phila ende Phila-kraecke (t'welck een steen is, ligghende met t'hooch water onder) te Rede ligghen voor eenen n.n.o. wint. Twee mylen by n. Phila leyt Scherenborch, t'welck twee pieren oft hoofden heeft daermen achter ligghen mach, ende met t'leech water drooch sitten moet.
Dese Landen leueren mede wt Granen, als Garste, Mout, Tarwe, ende groue wollen Laeckenen.
Auteursrechtelijk beschermd
